ކޮންމެ އަހަރެއްގެ ސުކޫލު ބޮޑުބަންދުގައި އާންމުކޮށް ހުރިހާ ރަށެއްގައިވެސް ހިނގާ އެއްކަމަކީ ކުދިން ޚިތާނުކުރުންކަމުގައިވާނެއެވެ. ވަރަށް ގިނަ ތައްޔާރީތައް އެކަމަށްވެއެވެ. ވަރަށް ބޮޑު ހޭދަތަކެއްވެސްވެއެވެ. އަދި ކުރިޔާލާ އެކަމަށް ވަރަށް ގިނަ މަސައްކަތްތަކެއްވެސް ކުރެއެވެ. ކޮންމެ ފިރިހެން ކުއްޖެއްގެ ހަޔާތުގައިވެސް އަންނާނެ އެންމެ މުހިންމު އެއްދުވަސްވަރަށް މި ދުވަސްވަރު ވެގެންދެއެވެ.
އިހުގައި ކުދިން ޚިތާނުކުރުމަށް އިސްލާމްދީނަށް ވެއްދުމޭ ކިޔައެވެ. މާނައަކީ ޚިތާނު ކުރުމާއެކު އެކުދިން އިސްލާމްދީނުގެ އިމުގެ ތެރެއަށް ވަދެވުނީއެވެ. ބަރާބަރަށް ނަމާދުތައްކުރުމާއި، ދީނުގެ އެހެން އަޅުކަންތައްތައް ކުރުމަށް އުމުރު ހަމަވީއެވެ. އަދި އެކަންކަން ނުކޮށް ދޫކޮށްލާނަމަ، ނުވަތަ ފަރުވާ ކުޑަކުރާނަމަ، އަދަބު ދެވޭވަރަށް ކުދިން ބޮޑެތިވީއެވެ.
ޚިތާނުކުރީއޭ ކިޔާފައި ހަމަ ބާރަށް ލަވަ ޖަހަންޖެހޭ ހެއްޔެވެ؟ ނޫނީ ބާރަށް ލަވަޖެހީމާ އަވަހަށް ކުއްޖާ ރަނގަޅުވަނީ ހެއްޔެވެ؟ ނުވާވަރުން ތަންތަނުން ސާމާނާއި ރުފިޔާ ހޯދައިގެން އެންމެ ފެންވަރު ރަނގަޅު ޚިތާނީއެއް ހަދަން އުޅުމަށްވުރެ ލިބިފައިވާ މިންވަރަކުން ހަމަޖެހިލައިގެން އެކަން ކޮށްލުން މާ ހިތްހަމަޖެހޭ ނޫން ހެއްޔެވެ؟ ނުފޯރާފޮތިން ފޫގަޅައިގެން ޚިތާނުކޮށް ނިންމާލީމާ އެވޯޑެއް ލިބެނީ ހެއްޔެވެ؟
ނަމަވެސް، މިއަދަށް ޖެހިލާއިރު ކަންކަން ފެންނަނީ މިދެންނެވި ގޮތަކަށް ނޫނެވެ. ކުދިން ޚިތާނުކުރުމަށް ނިޔަތް ގަންނަ ހިސާބުން އެކަން ނިމެންދެން ލައްކަގިނަ ރުފިޔާ ޚަރަދުކުރެއެވެ. އެކަކަށްވުރެ އަނެކަކު މޮޅަށް، ރީތިކޮށް އަދި ފެންވަރުގައި އެކަން ކުރަން ބޭނުންވެގެންނެވެ. މުޅި ރަށުގައިވެސް އެއީ އެންމެ ރަނގަޅު ޚިތާނީކަމަށް ހެދުމަށެވެ. ހުސްނުވާވަރަށް ކެއުންތައް ހެދުމާއި، ބޭނުންވާ ވަރަށްވުރެ އިތުރަށް އެކިއެކި ސާމާނު ހޯދުމަކީ ބޭކާރު ޚަރަދުކުރުން ނޫން ދެން ކޮންކަމެއް ހެއްޔެވެ؟
ދެން އޮތީ ޚިތާނުކޮށްގެން ބާއްވާ ކުއްޖާ ހިތްހަމަ ޖައްސައިދިނުމަށްކަމަށްބުނެ ބާއްވާ މިއުޒިކް ޝޯތަކާއި، ގެންނަ ބޮޑުބެރު ގުރޫޕްތަކާއި ނަށާ ގުރޫޕްތަކާއި ދަމުފޯރިއަށް ތިބޭ މީހުން ސަކަރާތްޖެހުމަށް ކުރާ ބޭކާރު ޚަރަދުތަކުގެ ވާހަކައެވެ. ކުއްޖާ ޚިތާނުކުރަނީ އިސްލާމްދީނުގައި އެކަން ކުރުމަށް އަންގަވާފައިވާތީއެވެ. އެއީ ދީނާ ގުޅުންހުރި ކަމެކެވެ. ނަމަވެސް، މިހާރު ޚިތާނީ ކަންކަމުގައި ފެންނަނީ ދީނާ ބީރައްޓެހި، އެހެން ދީންތަކުގެ މީހުންގެ ކަންކަން ފެތުރިގެންގޮސްފައިވާ މަންޒަރެވެ.
މިއީ ވިސްނާލަންޖެހޭ ކަމެކެވެ. ދީނީ ކަމެއްގައި މިހާރު އަހަރުމެން ގޮސްފައި މިތިބި ހިސާބަކީ ބިރު ގަންނަންޖެހޭ ހިސާބެކެވެ. މިކަން ބަދަލުކުރަންޖެހެއެވެ. އެއްޗެއް ޖަހާ ހިތްވަންޏާ މަދަހަ ޖެހިދާނެ ނޫން ހެއްޔެވެ؟ ބާރަށް ލަވަޖަހާ ކަރޯކޭ ޖެއްސީމާ ކައިރި ގެތަކުގެ މީހުން އަންނާނީ ރުޅިއެވެ. އޭގެ ބަދަލުގައި އެއަވަށްޓެރިންވެސް ހިތްހަމަ ޖެހޭ ގޮތަށް ގުޅިގެން އެކުވެރިކަމާއެކު އެދުވަސްކޮޅު ހޭދަކޮށްލައިފިނަމަ، ކިހާ އުފާވެރި ވާނެހެއްޔެވެ؟