އިސްރަށްވެހިން ޓެކްނޮލޮޖީއަށް އަހުލުވެރިކޮށް، ޑިޖިޓަލް ދުނިޔޭގެ މަންފާ ހޯދައިދިނުމުގެ ގޮތުން އުރީދޫ މޯލްޑިވްސްއިން ހާއްސަ ޕްރޮގްރާމެއް ފަށައިފިއެވެ. މިއަހަރުގެ ޑިޖިޓަލް ލިޓްރަސީ ޕްރޮގްރާމްތައް ފެށުމުގެ ގޮތުން މާލެ އާއި ހުޅުމާލޭގައި މިހާރު ވަނީ ސެޝަންތަކެއް ކުރިއަށް ގެންގޮސްފައެވެ.
އިސްރަށްވެހިންގެ ނާދީއާ ގުޅިގެން ކުރިއަށް ގެންދިޔަ މި ސެޝަންތަކުގައި، ސްމާޓް ފޯނު ބޭނުންކުރާނެ ގޮތާއި އާންމު ދިރިއުޅުމަށް ބޭނުންވާ އެކި ކަހަލަ ހިދުމަތްތައް އޮންލައިންކޮށް ހޯދާނެ ގޮތް ވަނީ ކިޔައިދީފައެވެ. މީގެ އިތުރުން ޑިޖިޓަލް ވަސީލަތްތައް ބޭނުންކޮށްގެން މުއާމަލާތް ކުރުމާއި، ޒަމާނީ ޓެކްނޮލޮޖީގެ އެހީގައި ދުވަހުން ދުވަހަށް ކުރަންޖެހޭ ކަންކަން ފަސޭހައިން ކުރާނެ ގޮތްތައް ބައިވެރިންނަށް ވަނީ އަމަލީ ގޮތުން ދަސްކޮށްދީފައެވެ.
އުރީދޫއިން މި ޕްރޮގްރާމް ފަރުމާކޮށްފައިވަނީ އުމުރުން ދުވަސްވީ މީހުންނަށް އުނގެނެން ފަސޭހަވާނެ ގޮތްތަކަށް ބަލައިގެންނެވެ. އެގޮތުން ސެޝަންތަކުގެ ދުވެލި ބައްޓަންކޮށްފައިވަނީ ބައިވެރިންނަށް މައުލޫމާތު ނަގައިގަންނަން ފަސޭހަވާނެ ގޮތަށް، އެކުވެރި މާހައުލެއްގައެވެ. މީގެ ސަބަބުން ޓެކްނޮލޮޖީއަށް އަލަށް އަހުލުވެރިވާ ފަރާތްތަކަށް ވެސް ޖެހިލުންވުމެއް ނެތި ސުވާލުކޮށް ކަންކަން އޮޅުންފިލުވުމަށް ފުރުސަތު ލިބިގެންދެއެވެ.
މި ހަރަކާތުގެ މައިގަނޑު މަގުސަދަކީ ޓެކްނޮލޮޖީ ހަލުވިކަމާއެކު ކުރިއަރަމުން އަންނަ ޒަމާނެއްގައި މުޖުތަމައުގެ އެއްވެސް ފަރުދަކު ބާކީވިޔަ ނުދިނުމެވެ. ހާއްސަކޮށް ޒުވާން ޖީލާއި ދޮށީ އުމުރުގެ މީހުންނާ ދެމެދު އޮންނަ ޑިޖިޓަލް ފަރަގު ކުޑަކޮށް، ހުރިހާ އުމުރުފުރައެއްގެ މީހުންނަށް ވެސް ޑިޖިޓަލް ދުނިޔޭގައި ޝާމިލުވެ އުޅުމުގެ ފުރުސަތު ފަހިކޮށްދިނުމަށް އުރީދޫއިން އަމާޒު ހިފާފައިވެއެވެ.
އުރީދޫ މޯލްޑިވްސްއިން އަންނަނީ 2018 ވަނަ އަހަރުން ފެށިގެން މެދުނުކެނޑި ރާއްޖޭގެ އެކި ކަންކޮޅުތަކުގައި ޑިޖިޓަލް ލިޓްރަސީ ޕްރޮގްރާމްތައް ހިންގަމުންނެވެ. މި މަސައްކަތުގެ ތެރެއިން ގިނަ އަދަދެއްގެ އިސްރަށްވެހިންނަށް ޒަމާނީ ވަސީލަތްތައް ބޭނުންކުރަން ދަސްވެ، އަމިއްލަ މިނިވަންކަމާއެކު ޑިޖިޓަލް ހިދުމަތްތައް ހޯދުމުގެ ގާބިލުކަން ލިބިފައިވާކަން އެ ކުންފުނިން ފާހަގަކުރެއެވެ.