ދުނިޔޭގެ މަޝްހޫރު ކުޅޭ އެއްޗެހި އުފައްދާ ކުންފުނި، މެޓެލް އިން އޯޓިޒަމް ހުންނަ ކުދިން ރަމްޒުކޮށްދޭ ފުރަތަމަ ބާބީ ޑޯލް ދައްކާލައިފިއެވެ. މިއީ ދުނިޔޭގެ ކުޅޭ އެއްޗެހި އުފައްދާ ސިނާއަތުގައި ފާހަގަކޮށްލެވޭ މުހިންމު ފިޔަވަޅެއްގެ ގޮތުގައި ގިނަ ބަޔަކު ދަނީ ސިފަކުރަމުންނެވެ.
މި އައު ބާބީ އަކީ އެކި ކަހަލަ ނުކުޅެދުންތެރިކަން ހުންނަ ކުދިންނާއި، ތަފާތު ސިފަތައް ހުންނަ މީހުން ރަމްޒުކޮށްދިނުމަށް މެޓެލް އިން ނެރެމުންދާ "ބާބީ ފެޝަނިސްޓާސް" ރޭންޖުގެ ދަށުން ނެރުނު އުފެއްދުމެކެވެ.
މި ބާބީ ފަރުމާކޮށްފައިވަނީ "އޯޓިސްޓިކް ސެލްފް އެޑްވޮކަސީ ނެޓްވޯކް" އާ ގާތުން މަޝްވަރާކޮށްގެންނެވެ. މެޓެލް އިން ހާމަކުރި ގޮތުގައި، މި މަސައްކަތަށް އަހަރަކަށްވުރެ ގިނަ ދުވަސް ހޭދަވެފައިވާއިރު، މި ފަރުމާ ފުރިހަމަކޮށްފައިވަނީ އޯޓިޒަމް ހުންނަ ފަރާތްތަކުގެ އަމަލީ ތަޖުރިބާގެ މައްޗަށް ބިނާކޮށެވެ.
މި ބާބީގެ ހާއްސަ ސިފަތަކުގެ ތެރޭގައި، ހިއްސުތަކަށް އުނދަގޫ ނުވާނޭ ފަދަ މަޑު ފޮއްޗަކުން ތައްޔާރުކޮށްފައިވާ ހެދުމާއި، އަޑުގަދަވުމުން ރައްކާތެރިވުމަށް ބޭނުންކުރާ "ނޮއިސް ކެންސަލިން" ހެޑްފޯނާއި، މުއާމަލާތް ކުރުމަށް ބޭނުންކުރާ ޓެބްލެޓެއް ހިމެނެއެވެ. މީގެ އިތުރުން، އޯޓިޒަމް ހުންނަ ބައެއް ކުދިންގެ ކިބައިން ފެންނަ ހަރަކާތްތަކާއި މޫނުމަތީގެ ކުލަވަރުތައް ވެސް މި ބާބީން ރަމްޒުކޮށްދެއެވެ.
މެޓެލް އިން ބުނީ މި ބާބީ ނެރުމުގެ މަގްސަދަކީ ކުޅިވަރުގެ ތެރެއިން ކުދިންނަށް އެކަކު އަނެކަކު ބަލައިގަތުމާއި، ހަމްދަރުދީވުމުގެ ސިފަ އަށަގަންނުވައި، ހުރިހާ ކުދިންނަކީ ވެސް މުޖުތަމައު ބަލައިގަންނަ ބައެއްކަން އިހުސާސްކޮށްދިނުން ކަމަށެވެ.
މި އައު ބާބީއަށް އޯޓިޒަމް ހުންނަ ކުދިންގެ އާއިލާތަކުންނާއި އެހީތެރިވާ ޖަމިއްޔާތަކުން ވަނީ ބޮޑު ތަރުހީބެއް ދީފައެވެ. ގިނަ ބަޔަކު ގަބޫލުކުރާ ގޮތުގައި މީގެ ސަބަބުން ކުޑަކުދިންގެ މެދުގައި ހުންނަ ތަފާތުތަކަށް އިހުތިރާމްކުރަން ދަސްވެ، ނުކުޅެދުންތެރިކަމާ މެދު މުޖުތަމައުގައި އޮންނަ ނުރަނގަޅު ތަސައްވަރު ބަދަލުވުމަށް އެހީތެރިވެދޭނެއެވެ.
މިދިޔަ އަހަރުތަކުގައި މެޓެލް އިން ވަނީ ޑައުން ސިންޑްރޯމް ހުންނަ ބާބީއާއި، އަޑުއިވުމުގެ އެހީ ބޭނުންކުރާ ބާބީގެ އިތުރުން، ވީލްޗެއާ ބޭނުންކުރާ ބާބީ ފަދަ ތަފާތު އެތައް އުފެއްދުންތަކެއް ބާޒާރަށް ނެރެފައެވެ.