އުތުރު ކޮރެއާގެ ލީޑަރު ކިމް ޖޮން އުންގެ ބަރުދަން ލުއިވެފައިވާކަން އޭނާގެ ފޮޓޯތަކުން ހާމަވެއްޖެއެވެ. މި ފޮޓޯތައް އާންމުކޮށްފައި ވަނީ އުތުރު ކޮރެއާގެ ގައުމީ މީޑިއާއަކުންނެވެ.
ކިމްގެ ފޮޓޯތަކެއް އުތުރު ކޮރިޔާގެ ގާއުމީ މީޑިއާއިން އާންމުކޮށްފައި މިވަނީ އެއްމަސް ދުވަސް ވަންދެން މީޑިއާއާ ދުރުގައި ކިމް އުޅުމަށް ފަހުގައެވެ. އުތުރު ކޮރެއާގެ ލީޑަރުންނާ ބެހޭ ވާހަކަތައް ދިރާސާ ކުރާ ފަރާތްތަކުންވެސް ވަނީ ކިމްގެ ބަރުދަން ލުއިވެފައިވާކަމަށް ބުނެފައެވެ.
ދިރާސާކުރާ ފަރާތްތަކުން ބުނެފައިވަނީ އެންމެ ފަހުން ކިމް ފެނުނު ގޮތާއި އޭގެ މަހެއްހާ ދުވަސް ކުރިން ކިމް ފެނުނު ގޮތާ ތަފާތުކަމަށެވެ. އަދި އޭނާގެ ބަރުދަން ލުއިވުން އެއީ ކިމްގެ ސިއްހީ ހާލު ގޯސްވުމުގެ ހެއްކެއް ކަމަށެވެ.
ކިމްގެ ސިއްހީ ހާލުކޮޅާ ގުޅޭގޮތުން ވާހަކަތައް ދެކެވެމުންދާ މި ދަނޑިވަޅަކީ އުތުރު ކޮރެއާގައި ކިމްގެ ދަށުން ކޮމާންޑު ކުރައްވާނޭ މީހަކު އައްޔަން ކޮށްފައިވާކަންވެސް އިއުލާން ކޮށްފައިވާ ދަނޑިވަޅެކެވެ. އެގޮތުން ސެކަންޑް އިން ކޮމާންޑް އައްޔަންކޮށްފައިވާކަން އެ ގައުމުން ހާމަކުރީ މިމަހުގެ އެއްވަނަ ދުވަހުއެވެ.
މިދިޔަ އަހަރުގެ ނޮވެމްބަރު މަހު، ދެކުނު ކޮރެއާގެ ގާނޫނު ހަދާ ފަރާތްތަކުން ބުނެފައިވާ ގޮތުގައި ކިމްގެ ބަރުދަނުގައި 140 ކިލޯހުރެދާނެއެވެ. އަދި ކިމްގެ އާއިލާގައި ހިތުގެ ބަލި އާންމުވެފައި އޮންނާތީ އެއީ ކިމްގެ ސިއްހަތަށް ހުރި ބިރެއްގެ ގޮތުގައި ވެސް ދެކޭ ކަމަށް ބައެއް ފަރާތްތަކުން ބުނެއެވެ.