ކައިވެންޏަކީ އިންސާނާގެ ދިރިއުޅުމަށް އަންނަ އެންމެ ބޮޑު އެއް ބަދަލެވެ. "ކައިވެނިކުރުމަށް އެންމެ ރަނގަޅު އުމުރަކީ ކޮބައިތޯ؟" މިއީ ވަރަށް ގިނަ މީހުން ކުރާ ސުވާލެކެވެ. ނަމަވެސް މި ސުވާލަށް ދެވޭނެ ސީދާ ސާދާ އެއް ޖަވާބެއް ނެތެވެ. ސަބަބަކީ ކޮންމެ އިންސާނަކީވެސް ތަފާތު މިޒާޖެއްގެ، ތަފާތު ހާލަތްތަކެއްގައި ދިރިއުޅޭ މީހަކަށް ވާތީއެވެ. އެހެންކަމުން ހުރިހާ އެންމެންނަށް ފެތޭނެ ވަކި "ފުރިހަމަ" އުމުރެއް ކަނޑައެޅުމަކީ އުނދަގޫ ކަމެކެވެ.
އެހެންނަމަވެސް، ނަފްސާނީ ދުޅަހެޔޮކަމަށް ބަލާއިރު، ވަކި އުމުރަކަށްވުރެ ފަސްވާއިރުވެސް ކައިވެނި ނުކޮށް ހުރުމަކީ އިންސާނާގެ ޖަޒުބާތީ ދުޅަހެޔޮކަމަށް އަސަރުކުރާ ކަމެއްކަން ދިރާސާތަކުން ދައްކައެވެ. މިގޮތުން ސްވިޒަލޭންޑްގެ ޔުނިވާސިޓީ އޮފް ޒިއުރިކުން ވަނީ މި މައުޟޫއަށް ހާއްސަ ދިރާސާއެއް ކޮށްފައެވެ. ތިން ބޮޑު ރިސާޗް ރިޕޯޓެއްގެ މައްޗަށް ބިނާކޮށް ކުރި މި ދިރާސާގައި 17،000 އަށްވުރެ ގިނަ ޒުވާނުން ބައިވެރިވިއެވެ. މި ދިރާސާގައި ބައިވެރިންގެ އުމުރުން 16 އަހަރުން ފެށިގެން 30 އަހަރު ވަންދެން އެމީހުންގެ ނަފްސާނީ ހާލަތަށް އަންނަ ބަދަލުތައް ވަނީ ބަލާފައެވެ.
މި ދިރާސާގެ ނަތީޖާއިން ހާމަވި ގޮތުގައި، ވަކި އުމުރަކަށްވުރެ ބޮޑުވާއިރުވެސް ކައިވެނި ނުކޮށް ހުރުމުން ދިރިއުޅުމާމެދު އޮންނަ ހިތްހަމަޖެހުން ކުޑަވެ، އެކަނިވެރިކަމުގެ އިހުސާސް ބޮޑުވެއެވެ. އަދި ވަގުތު ފާއިތުވަމުންދާ ވަރަކަށް މިއީ ނަފްސާނީ ބަލިމަޑުކަމެއް ނުވަތަ ޑިޕްރެޝަނަށް މަގުފަހިވާ ކަމެކެވެ.
އުމުރުގެ އެކި މަރުހަލާތަކުގައި ނަފްސާނީ ހާލަތަށް އަންނަ ބަދަލުތަކަށް ބަލާއިރު، އުމުރުން 16 އަހަރާއި 17 އަހަރުގައި ކައިވެނި ނުކޮށް ތިބޭ ކުދިންގެ ނަފްސާނީ ދުޅަހެޔޮކަން ވަރަށް ރަނގަޅެވެ. އަދި އުފާވެރިކަން ހުންނަ މިންވަރުވެސް މަތީގައި ހުރެއެވެ. ނަމަވެސް އުމުރުން 18 އަހަރުވުމުން، ދިރިއުޅުމާމެދު އޮންނަ ހިތްހަމަޖެހުން ކުޑަކޮށް ދަށްވާން ފަށައެވެ. އެހެންނަމަވެސް މިއީ އެހާ ބޮޑަށް ފާހަގަކުރެވޭ ބަދަލެއް ނޫނެވެ.
އުމުރުން 19 އަހަރަށް އެޅުމުން އެކަނިވެރިކަމުގެ އިހުސާސްތައް ފެންމަތިވާން ފަށައެވެ. އަދި އަހަރުތައް ފާއިތުވާ ވަރަކަށް މި އިހުސާސް ދަނީ އިތުރުވަމުންނެވެ. ނަފްސާނީ ދުޅަހެޔޮކަން ބޮޑަށް ދަށްވާން ފަށަނީ އުމުރުން 24 އަހަރުވުމަށްފަހުއެވެ. މި އުމުރުގައި އެކަނިވެރިކަން ވަރަށް ހަލުވިކަމާއެކު އިތުރުވެ، ދިރިއުޅުމާމެދު އޮންނަ ހިތްހަމަޖެހުން ދަށްވެ، ޑިޕްރެޝަންގެ އަލާމާތްތައް ފެންނަން ފަށައެވެ. ފުރަތަމަ މިކަން ފެންނަނީ ކުޑަ މިންވަރަކަށެވެ. ދިރާސާވެރިން ގަބޫލުކުރާ ގޮތުގައި ފުރަތަމަ އުފެދެނީ އެކަނިވެރިކަމުގެ އިހުސާސެވެ. އަދި ވަގުތާއެކު ޖަޒުބާތީ ދުޅަހެޔޮކަން ދަނީ ދަށްވަމުންނެވެ.
އެކަނިވެރިކަމުގެ އިހުސާސް އެންމެ މައްޗަށް ދަނީ އުމުރުން 29 އަހަރުގައެވެ. މި އުމުރަށް ދާއިރު ޑިޕްރެޝަންގެ އަލާމާތްތައް ސީރިއަސް މަރުހަލާއަކަށް ދެއެވެ. އެހެންކަމުން، ދިރާސާވެރިންގެ ހޯދުންތަކަށް ބަލާއިރު، ނަފްސާނީ ދުޅަހެޔޮކަން އެންމެ ރަނގަޅު ގޮތުގައި ހިފެހެއްޓުމަށްޓަކައި ކައިވެނިކުރަން އެންމެ އެކަށީގެންވާ އުމުރަކީ 25 އަހަރާއި 26 އަހަރާ ދެމެދުގެ އުމުރެވެ. މި އުމުރަށްވުރެ ފަސްވުމުން އެކަނިވެރިކަން އިތުރުވެ، ނަފްސާނީ ގޮތުން ނުރައްކަލަށް ހުށަހެޅުމުގެ ފުރުސަތު ބޮޑުވެގެންދެއެވެ.
ނިންމާލަމުން ބުނެވޭނީ، ކައިވެންޏަކީ ހަމައެކަނި ދެމީހަކު ގުޅުމެއް ނޫނެވެ. އެއީ ނަފްސާނީ ހަމަޖެހުމާއި، ދިރިއުޅުމުގެ އުފާވެރިކަން ދެމެހެއްޓުމަށްޓަކައި މުހިންމު ދައުރެއް އަދާކުރާ ކަމެކެވެ. ކޮންމެ މީހެއްގެ ހާލަތު ތަފާތުވި ނަމަވެސް، އެކަށީގެންވާ އުމުރުގައި ކައިވެނިކުރުމަކީ ދުޅަހެޔޮ މުޖުތަމައަކަށް މަގުފަހިވާނެ ކަމެކެވެ.