ކެއުމުގައި ގެންގުޅެންވާ ހަމަތައް އެންމެނަށްވެސް އެނގެއެވެ. ކާންވީ އެއްޗެއްސާއި، ކާންވާ ގަޑިތައްވެސް އެނގެއެވެ. އަމްދުން ބަރުދަން އެއްވަރެއްގައި ހިފަހައްޓަން ނުވަތަ ބަރުދަން ލުއިކޮށްލަން ބޭނުންނަމަ ކަންކުރަންވާ ގޮތްވެސް އެނގެއެވެ. ނަމަވެސް ބައެއް ފަހަރަށް އެއްޗެއް ކާހިތްވެގެން ހަމަ ހިފަހައްޓާނުލެވެނީއެވެ. ގިނަ ފަހަރަށް މިހެންވަނީ ރޭގަނޑު ނުނިދާ ފޫހިވެގެން އުޅޭ ނަމައެވެ. މިހެން ފޫހިވެގެން ނުވަތަ ކަމަކާ ހާސްވެގެން ކާނަމަވެސް ކައްޓާއަށް "ސިއްރުން" ކެވޭނެ އެއްޗެހި ހުންނާނެއެވެ. އާންމުގޮތެއްގައި 200 ކެލޮރީއަށްވުރެ މަދުން ކެލޮރީ ހުންނަ އެއްޗެއް ރޭގަނޑު ކެއުމަކުން ބަރުދަނަށް އެނގިގެން ނުދާނެއެވެ. ފަސޭހަ ކޮށްލަން ލިސްޓެއް ހިމަނާލާނަމެވެ.

  1. އާމަންޑް ބަޓަރާއި ދޮންކެޔޮ

16 ގްރާމް ހުންނަ ވަރުގެ (ފޮނިރަހަ ނުލައްވާ ހުންނަ) އާމަންޓް ބަޓަރކޮޅެއްގެ ތެރެއަށް ކުޑަ ދޮންކެޔޮ ވަކެއް ގަންބާލުމަށްފަހު ކާލާށެވެ. މީގައި 165 ކެލޮރީ ހުންނަ އިރު މި ކައިގެން ނިދަންވެސް ފަސޭހަ ވާނެއެވެ. އާމަންޑް އަދި އާމަންޑް ބަޓަރުގައި ވިޓަމިން އީގެ އިތުރުން ގިނަ އަދަދަކަށް މެގްނީޒިއަމް ހިމެނޭނެއެވެ. މެގްނީޒިއަމްގެ ސަބަބުން ހަށިގަނޑުގައި މެލަޓޮނިން ކިޔާ ހޯމޯނެއް އުފައްދާ އޭގެ ސަބަބުން ފަސޭހައިން ނިދި އަދި ގިނައިރު ނިދާފައި އޮވެވޭނެއެވެ. އެހެން ކަމުން ދެން އިތުރަށް ރޭގަނޑު ކާން ޖެހުންވެސް މަދުވާނެއެވެ.

  1. ކިވީ

ކިވީއަކީ ރަހަމީރު ވުމުގެ އިތުރުން ބައްޓަން ރީތިކޮށް ބަހައްޓަން އެހީތެރިވެދޭ މޭވާއެކެވެ. މަށާލާފައި އޮންނަ 2 ކިވީގައި ހުންނާނީ އެންމެ 93 ކެލޮރީއެވެ. މީގައި 5 ގްރާމްގެ ފައިބަރ ހިމެނޭއިރު ދުވާލަކަށް ބޭނުންވާ ވިޓަމިންގެ 190 އިންސައްތަ ލިއްބައިދޭނެއެވެ. މިއީ ވެސް ދޮންކެޔޮ ފަދައިން ނިދުމަށް އެހީތެރިވެދޭނެ މޭވާއެކެވެ. ނިދުމުގައި އުނދަގޫހުރި 24 މީހަކު ބައިވެރިކޮށްގެން ހެދުނު ދިރާސާއަކުން އެނގުނު ގޮތުގައި ނިދުމުގެ 1 ގަޑިއިރު ކުރިން ކިވީ ކެއުމުން ފަސޭހައިން ނިދުމުގައި ބޮޑު އެހީތެރިކަމެއް ލިބުނެވެ. މި މީހުންގެ ނިދީގެ ފެންވަރު ބެލުމަށް ސްލީޕް ޓްރެކިންގ އެޕްތައް ބޭނުން ކުރެވުނެވެ.

  1. ޕިސްޓާޝިއޯ

ބަދަންތަކުގެ ތެރެއިން، ނިދުމުގައި އެންމެ ބޮޑު އެހީތެރިކަމެއް ފޯރުކޮށްދޭ މެލަޓޮނިން އެންމެ ގިނަ އަދަދަކަށް ހިމެނޭ ޕިސްޓާޝިއޯއަކީ އަގު ބޮޑު ނަމަވެސް މީރު ބަދަނެވެ. ނޮޅާފައިވާ 28 ގްރާމް ޕިސްޓާޝިއޯގައި ހުންނާނީ 160 ކެލޮރީއެވެ. އެއިން 6.5 ގްރާމްގެ މެލަޓޮނިން ލިބޭނެއެވެ. ނިދުމަށް ހަށިގަނޑަށް ބޭނުންވަނީ 0.5 އާއި 5 މިލިގްރާމްގެ މެލަޓޮނިންއެވެ.

  1. ބިސް

ބިހަކީ ވަރަށް ގިނަމީހުނަށް ކަމުދާ އަދި ވަރަށް ގިނަ ގޮތްގޮތަށް ހަދައިގެން ކެވޭ އެއްޗެކެވެ. ބޮޑު ބިހެއްގައި ހިމެނޭނީ 72 ކެލޮރީއެވެ. އަދި މީގެ ސަބަބުން ވަރަށް ގިނަ ވަގުތު ބަނޑު ފުރިފައި ހުންނަކަމުގެ އިޙްސާސް ކުރެވޭނެއެވެ. ރޭގަނޑު ބަނޑުހައިވެގެން އުޅެން ޖެހޭ ނަމަ ހައެއްކަ ބިސް ފެނުކައްކަލާފައި ފްރިޖްގައި ބަހައްޓާށެވެ.

  1. ޔޯގަޓް

ޔޯގަޓަކީ ކެލްސިއަމްގެ ވަރަށް މުހިންމު ވަސީލަތެކެވެ. ކެލްސިއަމްގެ ސަބަބުން ކަށިތަކުގެ ސިއްޙަތު ފުރިހަމަވާ ކަމަށް ކުރިންވެސް އެނގިފައިވާއިރު ފަހުގެ ދިރާސާތަކުން ސާބިތުވާ ގޮތުން ކެލްސިއަމްއަކީ އަރާމުކޮށް ނިދުމަށްވެސް ވަރަށް މުހިންމު މާއްދާއެކެވެ. ސަބަބަކީ މެލަޓޮނިން އުފެއްދުމަށް ކެލްސިއަމްގެ އެހީތެރިކަން ބޭނުންވެއެވެ. 170 ގްރާމް ހުންނަ ޔޯގަޓް ތައްޓެއްގައި ހުންނާނީ 94 ކެލޮރީއެވެ. ބައި ޖޯޑު ބްލޫބެރީ އަޅައިގެން ކޭ ނަމަވެސް އޭގެ ތެރެއަށް އިތުރުވާނީ 42 ކެލޮރީއެވެ.