އިންސާނާ ދުނިޔެއަށް އުފަންވުމުގެ މަރުހަލާއަކީ މާތް ﷲ ގެ ކުޅަދުންވަންތަކަމުގެ މަތިވެރި ހެތްކެކެވެ. ބަނޑުގައިވާ ދަރިފުޅު ބޭރުކޮށްލުމަށްޓަކައި ރަހިމުގެ މަސްތައް ކޮންޓްރެކްޓްވާން ނުވަތަ ލެނބެން ފަށާ ސީދާ ވަގުތު ދެނެގަންނަ ގޮތާ ބެހޭގޮތުން ސައިންސްވެރިން ވަނީ ފާހަގަކޮށްލެވޭ އައު ހޯދުމެއް ހޯދާފައެވެ.
ޒަމާނުއްސުރެ ބޭސްވެރިކަމުގެ ދާއިރާގައި ގަބޫލުކުރެވެމުން އައީ، ވިހެއުމުގެ މަރުހަލާ ފެށެނީ ހަމައެކަނި ހަށިގަނޑުން ބޭރުކުރާ ހޯރމޯންތަކެއްގެ (ޚާއްޞަކޮށް އޮކްސިޓޯސިން ފަދަ ހޯރމޯންތަކުގެ) ސަބަބުން ކަމަށެވެ. ނަމަވެސް، އެންމެ ފަހުގެ ދިރާސާތަކުން ދައްކާގޮތުގައި، ވިހެއުމުގެ މަރުހަލާ ފެށުމުގައި ހޯރމޯންތަކުގެ އިތުރުން ރަހިމަށް އިހުސާސްވާ "ފިޒިކަލް ފޯސް" ނުވަތަ ބާރަކީ ވަރަށް މުހިންމު ދައުރެއް އަދާކުރާ އެއްޗެކެވެ.
ސައިންސު ޑެއިލީ (2026) ގައި ހާމަކޮށްފައިވާ މި ދިރާސާ ކުރި ސައިންސްވެރިން ބަޔާންކުރާ ގޮތުގައި، ދަރިފުޅު ބޮޑުވަމުން އަންނައިރު ރަހިމުގެ ފާރުތަކަށް ބާރުބޮޑުވެ، މަސްތައް ދެމެން ފަށައެވެ. ރަހިމުގެ މަސްތަކުގައި ހުންނަ "މެކަނޯސެންސިޓިވް" ސެލްތަކަށް މި ދެމުމުގެ އިހުސާސް ކުރެވުމުން، އެ ސެލްތަކުން ވިހެއުމަށް މަގުފަހިކޮށްދޭ ސިގްނަލްތައް ފޮނުވަން ފަށައެވެ. އެހެންކަމުން، ވިހެއުމުގެ ވަގުތު ޖެހުމުން ރަހިމަށް އެކަން އެނގެނީ ހަމައެކަނި ކެމިކަލް ބަދަލުތަކަކުން ނޫނެވެ. އޭގެ ބަދަލުގައި، ރަހިމުގެ ފާރުތަކަށް ކުރިމަތިވާ ފިޒިކަލް ޕްރެޝަރ ނުވަތަ ބާރު ދެނެގަތުމުގެ ގާބިލުކަން ރަހިމަށް ލިބިގެންވެއެވެ.
މި ހޯދުމުގެ ސަބަބުން، ދުވަސް ނުފުރާ ވިހެއުމުގެ މައްސަލަތައް ކުރިމަތިވާ ސަބަބުތައް ދެނެގަތުމަށް އައު ދޮރުތަކެއް ހުޅުވިގެންދާނެއެވެ. ބައެއް ހާލަތްތަކުގައި ހޯރމޯންތަކަށް ބަދަލު ނައިސް ހުއްޓައިވެސް، ރަހިމަށް ކުރިމަތިވާ މިފަދަ ފިޒިކަލް ބާރެއްގެ ސަބަބުން ވިހެއުމުގެ ވޭން ފެށިދާނެކަން މިހާރު ސައިންސްވެރިން ގަބޫލުކުރެއެވެ.
ވިހެއުމަކީ ހަށިގަނޑުގެ ހޯމޯންތަކާއި، ރަހިމުގެ މަސްތަކަށް ކުރިމަތިވާ ފިޒިކަލް ބާރު ގުޅިގެން ހިނގާ ވަރަށް ފުރިހަމަ ނިޒާމެކެވެ. މިއީ އިންސާނާގެ ހަށިގަނޑު ފަރުމާކުރައްވާފައިވާ ފުރިހަމަކަމާއި ހިކުމަތްތެރިކަން ވަރަށް ރަނގަޅަށް ހާމަކޮށްދޭ ކަމެކެވެ. މިފަދަ ހޯދުންތަކުގެ ސަބަބުން މާބަނޑު މީހުންނަށް ދެވޭ ފަރުވާތަކާއި، ދުވަސް ނުފުރާ ވިހެއުން ހުއްޓުވުމަށް ކުރެވޭ މަސައްކަތްތަކަށް ބޮޑު ކުރިއެރުމެއް ލިބިގެންދާނެކަމީ ޝައްކެއް އޮތް ކަމެއް ނޫނެވެ.