ދިރިއުޅުމުގެ ދަތުރުގައި ކޮންމެ އިންސާނަކަށްވެސް ތަފާތު ގޮންޖެހުންތަކާއި ހާސްކަމުގެ ވަގުތުތަކާ ކުރިމަތިލާންޖެހެއެވެ. ބައެއް ފަހަރު ވަޒީފާގެ މާހައުލުންނެވެ. އަނެއްބައި ފަހަރު އާއިލީ ނުވަތަ މާލީ ކަންކަމާ ހުރެއެވެ. މިފަދަ ހާސްކަމުގެ ތެރޭގައި ތިމާގެ ނަފްސު ގެނބިގެންދާއިރު، އުފާވެރިކަމާއި ހިތްހަމަޖެހުން ހޯދާނެ މަގުތައް ބަންދުވެފައިވާ ކަމަށް އިހުސާސް ކުރެވިދާނެއެވެ. ނަމަވެސް، މިއީ ހައްލެއް ނެތް ކަމެއް ނޫނެވެ. ކަންކަމާ މާބޮޑަށް ހާސްވާނަމަ، ތިރީގައިވާ ކަންކަމަށް އަމަލުކުރުމުން ހިތްހަމަޖެހުން ހޯދިދާނެއެވެ.
އެންމެ ފުރަތަމަ އަދި އެންމެ މުހިންމު ކަމަކީ މާތްﷲ އާ އޮންނަ ގުޅުން ވަރުގަދަކުރުމެވެ. މުސްލިމަކަށް ވީތީ، އަޅުގަނޑުމެން ގަބޫލުކުރަންޖެހޭ ހަގީގަތަކީ ކޮންމެ ކަމެއްވެސް ވަނީ އެކަލާނގެ މިންވަރުފުޅާއެކު ކަމެވެ. ނަމާދު ގާއިމުކުރުމާއި، ގިނަގިނައިން ޛިކުރުކުރުމަކީ ހިތްތަކަށް ލިބޭ އެންމެ ބޮޑު ޝިފާއެވެ. ކީރިތި ގުރުއާނުގައި މާތްﷲ ވަހީކުރައްވާފައިވާ ފަދައިން، ހިތްތަކަށް ހަމަޖެހުން ލިބެނީ ﷲ ހަނދުމަކުރުމުންނެވެ. އެހެންކަމުން، ހާސްވާ ވަގުތު ތަވައްކަލްކުރުން އިސްކޮށް، ދުޢާގެ އެހީތެރިކަން ހޯދާށެވެ.
ދެވަނަ ކަމަކަށް، ތިމާގެ ވިސްނުން ހުންނަ ގޮތް ބަދަލުކޮށްލަން ޖެހެއެވެ. ގިނަ ފަހަރަށް ހާސްކަން އިތުރުވަނީ މާދަމާ ވާނެ ގޮތަކާމެދު ނުވަތަ އަތުން ބީވެފައިވާ ކަމަކާމެދު މާބޮޑަށް ފިކުރު ކުރުމުންނެވެ. މާޒީއަށް ބަދަލެއް ނުގެނެވޭނެއެވެ. އަދި މުސްތަގުބަލަކީ އަދި ނާަންނަ ދުވަހެކެވެ. އެހެންކަމުން، މިހާރު ތިމާގެ ކުރިމަތީގައި އޮތް ވަގުތުގެ ބޭނުން އެންމެ ހެޔޮގޮތުގައި ހިފުމަށް އަޒުމް ކަނޑައަޅާށެވެ. ކަންކަމުގެ "ނެގެޓިވް" ކޮޅަށް ވުރެ "ޕޮޒިޓިވް" ކޮޅަށް ބަލަން އާދަކުރާށެވެ.
ތިމާގެ ދިރިއުޅުމުގެ އާދަކާދަތަކަށް ބަދަލު ގެނައުމަކީވެސް ހާސްކަން ކުޑަކުރުމަށް ވަރަށް މުހިންމު ކަމެކެވެ. ފައިދާހުރި ކާނާ ކެއުމާއި، ހަށިގަނޑަށް ބޭނުންވާ މިންވަރަށް ނިދި ހަމަކުރުމަކީ ސިކުނޑީގެ ދުޅަހެޔޮކަމަށް ކޮންމެހެން ބޭނުންތެރި ކަންކަމެވެ. މީގެ އިތުރުން، ކޮންމެ ދުވަހަކުވެސް ކޮންމެވެސް ވަރަކަށް ކަސްރަތު ކުރުމަކީ ހަށިގަނޑުގައި ހުންނަ ސްޓްރެސް ހޯރމޯންތައް މަދުކޮށްދޭނެ ކަމެކެވެ. ހަމައެހެންމެ، ހިތްހަމަޖެހޭ ފަދަ މާހައުލެއްގައި ވަގުތު ހޭދަކުރުމާއި، ގުދުރަތީ ރީތި މަންޒަރުތައް ބަލާލުމަށް ވަގުތު ހޯދާށެވެ.
ހާސްކަން ބޮޑުވާ ވަގުތު، އެކަމެއް ހިތުގައި ބާއްވައިގެން އެކަނި އިނުމުގެ ބަދަލުގައި، އިތުބާރު ކުރެވޭ ގާތް މީހަކާ އެ ވާހަކަ ހިއްސާކޮށްލާށެވެ. ބައެއް ފަހަރު ވާހަކައެއް ބޭރުކޮށްލުމުންވެސް ހިތަށް ވަރަށް ބޮޑު ލުޔެއް ލިބިގެންދެއެވެ. އަދި އަމިއްލަ ނަފްސަށް މާބޮޑަށް ބާރުބޮޑުނުކޮށް، ކުރަން ހުންނަ ކަންކަން ތަރުތީބުކޮށްލާށެވެ. އެއްފަހަރާ ހުރިހާ ކަމެއް ނިންމަން އުޅުމުގެ ބަދަލުގައި، ކުދިކުދި ފިޔަވަޅުތަކުން ކުރިއަށްދާން އާދަކުރާށެވެ.
ހާސްކަމަކީ ދިރިއުޅުމުގެ ބައެއް ކަމުގައި ވިޔަސް، އެއީ ތިމާގެ މުޅި ދިރިއުޅުން ކޮންޓްރޯލް ކުރަންޖެހޭނެ އެއްޗެއް ނޫނެވެ. މަތީގައި ބަޔާންކުރެވުނު ކަންކަމަށް އަމަލުކޮށް، އަމިއްލަ ނަފްސަށް އިތުބާރުކޮށް، މާތްﷲ ގެ ހަޟްރަތުން އެހީތެރިކަމަށް އެދޭށެވެ. އޭރުން ހަމަޖެހޭ އުފާވެރި ދިރިއުޅުމަކަށް މަގުފަހިވެގެންދާނެއެވެ. ކޮންމެ ދަތިކަމަކާއެކު ފަސޭހަކަމެއް ވާކަން އަބަދުވެސް ހަނދާނުގައި ބަހައްޓާށެވެ.