ކޮތަންބިރި ފަތަކީ ޒަމާނުއްސުރެ ކެއްކުމުގެ ތެރޭގައްޔާއި، ދިވެހި ބޭސްވެރިކަމުގެ އިތުރުން ދުނިޔޭގެ އެކި ކަންކޮޅުތަކުގައި ތަފާތު ބަލިތަކަށް ފަރުވާ ހޯދުމަށް ބޭނުންކުރަމުން އަންނަ ފަތެކެވެ. ނަމަވެސް، މިއަދުގެ ޒަމާނީ ސައިންސްވެރިން އަންނަނީ މި ފަތުގެ ބޭނުން ހިފައިގެން "ޕްރެސިޝަން މެޑިސިން" ނުވަތަ ސީދާ ބަލިޖެހިފައިވާ ސަރަހައްދަށް އަމާޒުކޮށްގެން ދެވޭ ފަރުވާތައް ތަރައްގީ ކުރަމުންނެވެ.
ސައިންސް ޑެއިލީ (2026) ގައި ފާހަގަ ކޮށްފައިވާގޮތުން ކޮތަންބިރި ފަތުގެ ދިޔައިގައި ސިއްހަތަށް ފައިދާހުރި އެތައް މާއްދާތަކެއް އެކުލެވިގެންވެއެވެ. އޭގެ ތެރޭގައި ހަށިގަނޑުގެ ދިފާއީ ނިޒާމު ވަރުގަދަކޮށްދޭ އެންޓިއޮކްސިޑެންޓްތަކާއި، ޖަރާސީމާ ދެކޮޅަށް މަސައްކަތްކުރާ "ތައިމޯލް" ފަދަ މާއްދާތައް ހިމެނެއެވެ. މި މާއްދާތަކަކީ އިންފެކްޝަންތަކާއި ދެކޮޅަށް އަދި ކެންސަރު ފަދަ ނުރައްކާތެރި ބަލިތަކާ ދެކޮޅަށް މަސައްކަތް ކުރުމުގެ ގާބިލުކަން ލިބިގެންވާ މާއްދާތަކެއް ކަމަށް ދިރާސާތަކުން ދައްކައެވެ.
މިހާ ގިނަ ފައިދާތަކެއް ހުރި ނަމަވެސް، ކޮތަންބިރި ފަތުގެ ދިޔަ، ބޭހެއްގެ ގޮތުގައި ބޭނުންކުރުމުގައި ބޮޑެތި ގޮންޖެހުންތަކެއް ހުރެއެވެ. މީގެ ތެރެއިން އެންމެ ފާހަގަކޮށްލެވޭ އެއް ކަމަކީ، މި ދިޔައިގައި ހުންނަ ބާރުގަދަ މާއްދާތައް ކޮންޓްރޯލް ކުރުމަކީ އުނދަގޫ ކަމަކަށް ވުމެވެ. އަދި ހަށިގަނޑުގެ ތެރެއަށް މި މާއްދާތައް ދިއުމުން، ބޭނުންވާ ސަރަހައްދަށް ފޯރުމުގެ ކުރިން ވަރަށް ފަސޭހައިން ބޭކާރުވެގެން ދެއެވެ. މިސާލަކަށް، ގޮހޮރުގެ ތެރޭގައި ހުންނަ އެސިޑްގެ ސަބަބުން ނުވަތަ ލޭގެ ތެރޭގައި ހުންނަ އެންޒައިމްތަކުގެ ސަބަބުން މި މާއްދާތަކުގެ އަސްލު ބާރު ކެނޑިގެންދެއެވެ.
މި މައްސަލައަށް ހައްލެއް ހޯދުމަށް ސައިންސްވެރިން މިހާރު ބޭނުންކުރަމުންދަނީ "ނެނޯޓެކްނޮލޮޖީ" އެވެ. މިގޮތުން ކޮތަންބިރި ފަތުގެ މާއްދާތައް ކުދިކުދި "ކެޕްސޫލް" ތަކެއްގެ ތެރޭގައި ބަންދުކޮށް، ސީދާ ބަލިޖެހިފައިވާ ސެލްތަކަށް އަމާޒުކޮށް ފޮނުވާލެވެއެވެ. މީގެ ސަބަބުން ބޭސް ބޭކާރުވުން ހުއްޓުވައި، އޭގެ ފުރިހަމަ ފައިދާ އެންމެ އެދެވޭ ގޮތުގައި ހަށިގަނޑަށް ލިބިގެންދެއެވެ.
ކޮތަންބިރި ފަތަކީ ހަމައެކަނި ކެއުމުގެ ރަހަ މީރުކޮށްދޭ އެއްޗެއް ނޫނެވެ. އެއީ ސައިންސްގެ އެހީގައި އިންސާނުންނަށް ބޭނުންވާ މުހިންމު ފަރުވާތަކެއް ފޯރުކޮށްދޭނެ އަގުހުރި ވަސީލަތެކެވެ. މިފަދަ ގުދުރަތީ ވަސީލަތްތަކުގެ ބޭނުން އެންމެ ފުރިހަމަ ގޮތުގައި ހިފުމަކީ މުސްތަގުބަލުގެ ބޭސްވެރިކަމަށް ލިބޭނެ ވަރަށް ބޮޑު ކުރިއެރުމެކެވެ.