ބޮޑުމަހެއްގެ އަނގަތެރެއަށް ދިޔަ މީހަކު ސަލާމަތްވެ އޭނާ އަށް ކުރެވުނު އިހުސާސްތައް ވަނީ ކިޔައިދީފައެވެ.
އެމެރިކާގެ އިހި މަސްވެރިކަން ކުރާ މީހެއް ކަމަށްވާ މައިކަލް ޕެކާޑްއާ ދިމާވި މި ހާދިސާ އަކީ އޭނާގެ ހަނދާނުން ދުވަހަކު ވެސް ފިލައިގެން ދާނެ ހާދިސާ އަކަށް ނުވާނެއެވެ. ޕެކާޑް ބުނިގޮތުގައި 40 ވަރަކަށް ސިކުންތު ވަންދެން ބޮޑުމަހެއްގެ އަނގަތެރޭގައި އޭނާ އޮންނަން ޖެހުނެވެ.
ހަމްޕެކް ވޭލްއެއްގެ އަނގަތެރެއިން ސަލާމަތްވެ އެ އިހުސާސްތައް ކިޔާދެމުން ޕެކާޑް ބުނީ ބޮޑުމަސް އުޅުނީ އޭނާ ކާލަން ކަމަށެވެ. ބޮޑުމަހުގެ އަނގަތެރެއިން ސަލާމަތްވީ އޭނާގެ ހަށިގަނޑުގެ އެއްވެސް ކައްޓެއްހާ މިންވަރު ވެސް ހަލާކު ނުކޮށް ކަމަށް ޕެކާޑް ބުންޏެވެ. ނަމަވެސް ޕެކާޑް ގެ ހަށިގަނޑުގައި ގިނަ ތަންތަން ނޫފައިގަނެފައި ހުއްޓެވެ.
ބޮޑުމަހެއްގެ އަނގަތެރެއަށް ޕެކާޑް ދިޔައީ މެސެޗޫޓެސްގެ މޫދުގައި އިހި ނަގަން ފައިބައި އޮއްވައެވެ. ބޮޑުމަހުގެ އަނގަތެރެއަށް އޭނާ ދިޔައީ މަސް އަނގަހުޅުވައި އަނގައިގެ ތެރެއަށް ފެން ދަމާލި ވަގުތުގައި އޭނާ ވެސް ފެނާއެކު ގޮސްގެންނެވެ.
އިހި ނަގަން ޕެކާޑް ފީނައިފައި ދިޔައީ މޫދުގެ 35 ފޫޓު އަޑިޔައެވެ. ޕެކާޑް ފުރަތަމަ ހީކުރީ އޭނާއަށް ހަމަލާދެނީ މިޔަރެއް ކަމަށެވެ. ނަމަވެސް ލޮނުގަނޑުގެ ޕްރެޝަރު ހުރި ގޮތުންނާއި މިޔަރުގެ ދަތްތައް ނުފެންނާތީ އޭނާ އަށް ހަމަލާދެނީ މިޔަރެއް ނޫންކަން އޭނާ އަށް އެނގުނެވެ.
މި ހާދިސާގައި ޕެކާޑް އަށް ބޮޑު އަނިޔާއެއް ނުލިބެއެވެ. އަދި ކުޑަ ވަގުތުކޮޅެއްގެ ތެރޭގައި އޭނާ ސަލާމަތް ވުމުން އެއީ އޭނާއަށްލިބުނު ނަސީބެއްކަމަށް އޭނާ ސިފަކުރެއެވެ.