އިޓަލީގެ ލެޖެންޑަރީ ފެޝަން ޑިޒައިނަރު ވެލެންޓީނޯ ގަރަވާނީ، އުމުރުން 93 އަހަރުގައި ރޯމްގައި ހުންނަ އޭނާގެ ގޭގައި މަރުވެއްޖެއެވެ. އޭނާ މަރުވި ސަބަބު އަދި މިހާތަނަށް ހާމަކޮށްފައެއް ނުވެއެވެ. ވެލެންޓީނޯގެ ވަކިވެދިއުމަކީ ދުނިޔޭގެ ހައި-ފެޝަން ނުވަތަ "އޯޓް ކޫޓޫރް" ގެ ރަން ޒަމާނަކަށް އައި ނިމުމެއްގެ ގޮތުގައި ގިނަ ބަޔަކު ސިފަކުރެއެވެ.
ވެލެންޓީނޯ ބޮޑަށް މަޝްހޫރުވެފައިވަނީ އޭނާގެ ފަރުމާތަކުގައި ހުންނަ ފުރިހަމަކަމާއި، އަމިއްލަވަންތަ ކަމުގެ ސަބަބުންނެވެ. ވަކިން ހާއްސަކޮށް އޭނާގެ ނަމާ ގުޅުވައިގެން މަޝްހޫރުވެފައިވާ "ވެލެންޓީނޯ ރެޑް" ނުވަތަ ރަތްކުލައަކީ އޭނާގެ ފަރުމާތަކުގެ އެންމެ ހާއްސަ އެއް ސިފައެވެ.
ފެޝަންގެ ދުނިޔޭގައި ވެލެންޓީނޯގެ މަގުބޫލުކަން އިތުރުވާން ފެށީ 1960 ގެ އަހަރުތަކުގައެވެ. އޭނާއަކީ ފަރަންސޭސިވިލާތުގެ ޕެރިހުގެ އެކްސްކްލޫސިވް ރަންވޭތަކުގައި ފަރުމާތައް ދައްކާލި ފުރަތަމަ އިޓަލީގެ ޑިޒައިނަރެވެ. އޭނާގެ ފަރުމާތަކަކީ ހޮލީވުޑްގެ އެންމެ މަޝްހޫރު ތަރިން ކަމަށްވާ އެލިޒަބަތު ޓޭލާ، ލާނާ ޓާނާ، ޖޫޑީ ގާލަންޑް، ޝެރަން ސްޓޯން އަދި ޕެނެލޮޕޭ ކްރޫޒް ފަދަ ބޭފުޅުންގެ އެންމެ ފޭވަރިޓް ބްރޭންޑެވެ. މީގެ އިތުރުން އެމެރިކާގެ ކުރީގެ ފަސްޓް ލޭޑީ ޖެކީ ކެނެޑީއަކީވެސް ވެލެންޓީނޯގެ ފަރުމާތަކަށް ވަރަށް ބޮޑަށް ލޯބިކުރެއްވި ބޭފުޅެކެވެ.
ވެލެންޓީނޯގެ އެންމެ ފާހަގަކޮށްލެވޭ ރަތްކުލަ ތައާރަފްކުރީ 1959 ވަނަ އަހަރުއެވެ. މި ކުލަ އޭނާއަށް އިންސްޕަޔާވީ ބާސެލޯނާގެ އޮޕެރާ ހައުސްއަކުން ފެނުނު އުމުރުން ދުވަސްވީ އަންހެނެއްގެ ހެދުމަކުންނެވެ. ވެލެންޓީނޯ ގަބޫލުކުރާ ގޮތުގައި ރަތްކުލައަކީ ހިތްވަރާއި، ރީތިކަމުގެ ރަމްޒެކެވެ.
އިޓަލީގެ ވޮގޭރާއަށް އުފަން ވެލެންޓީނޯ ކިޔެވީ މިލާން އަދި ޕެރިހުގައެވެ. އޭނާގެ އަމިއްލަ ފެޝަން ހައުސް ރޯމްގައި ހުޅުވީ 1960 ވަނަ އަހަރުއެވެ. ހަމަ އެ އަހަރު އޭނާގެ ވިޔަފާރި ބައިވެރިޔާ ޖިއަންކާލޯ ގިއަމެޓީއާ ބައްދަލުވިއެވެ. ގިއަމެޓީ ވިޔަފާރީގެ ކަންކަން ބަލަހައްޓަމުން ދިޔައިރު، ވެލެންޓީނޯ ހުރީ ހަމައެކަނި ފަރުމާކުރުމުގެ މަސައްކަތުގައެވެ.
ބައިނަލްއަގުވާމީ ފެންވަރުގައި ބޮޑު މަޝްހޫރުކަމެއް ލިބިފައިވީ ނަމަވެސް، ވެލެންޓީނޯއަކީ އަމިއްލަ ދިރިއުޅުން ސިއްރުކުރަން ބޭނުންވި މަޑުމައިތިރި މީހެކެވެ. އޭނާ ވަނީ 2008 ވަނަ އަހަރު ފެޝަންގެ ދާއިރާއިން ރިޓަޔާކޮށްފައެވެ. އޭނާ ބުނެފައިވަނީ ރިޓަޔާކުރަން ނިންމީ މަގުބޫލުކަން އެންމެ މަތީގައި އޮތް ވަގުތުގައެވެ.