އެމެރިކާގެ ފެޑަރަލް ކޯޓެއްގެ ފަނޑިޔާރަކަށް މުސްލިމަކު އައްޔަންކުރުމަށް ސެނެޓުން ފާސްކޮށްފިއެވެ. މިއީ އެ މަގާމަށް މުސްލިމަކު އައްޔަން ކުރުމަށް ފާސްކުރި ފުރަތަމަ ފަހަރެވެ.
"އެމެރިކާ-ޕާކިސްތާނު" ގެ ރައްޔިތެއްކަމަށްވާ ޒާހިދް ގުރައިޝީ، އެމެރިކާގެ ޑިސްޓްރިކްޓް އޮފް ނިއު ޖާޒީގެ ފެޑެރަލް ކޯޓުގެ ފަނޑިޔާރަކަށް އައްޔަން ކުރަން ފާސްކޮށްފައި ވަނީ 16-81 ވޯޓު ލިބިގެންނެވެ.
ސެނެޓުގެ މެޖޯރިޓީ ލީޑަރު، ޗަކް ޝުމާ ވިދާޅުވީ ގުރައިޝީ ވެގެން ދާނީ އެމެރިކާގެ ތާރީހުގައި ވެސް ފެޑެރަލް ކޯޓުގެ ފަނޑިޔާރެއްގެގޮތުގައި މަސައްކަތް ކުރާ ފުރަތަމަ މުސްލިމު ފަނޑިޔާރުކަށެވެ.
މެޖިސްޓްރޭޓް ކޯޓުގެ ފަނޑިޔާރަކަށް އައްޔަން ވުމުގެ ކުރިން ގުރައިޝީ މަސައްކަތް ކޮށްފައިވަނީ ޗެއާ އޮފްވައިޓް ކޮލާ ކްރިމިނަލް ޑިފެންސް އެންޑް އިންވެސްޓިގޭޝަން ގުރޫޕާއި ފާމްގެ ފުރަތަމަ ޗީފް ޑައިވާސިޓީ އޮފިސަރެއްގެ މަގާމުގައެވެ.
މީޑިއާރިޕޯޓުތައް ބުނާ ގޮތުގައި އޭނާ ޕްރޮފެސަރެއްގެ ގޮތުގައި ޔުނިވާސިޓީގައި މަސައްކަތް ކޮށް، އަދި ފަސް އަހަރު ދުވަސް ވަންދެން އެސިސްޓެންޓް ޔުނައިޓެޑް ސްޓޭޓްސް އެޓާނީއެއްގެ ގޮތުގައި މަސައްކަތް ކޮށްފައިވެއެވެ.
އެމެރިކާގެ ވެރިކަމާއި ޖޯ ބައިޑެން ހަވާލުވެލެއްވި ފަހުން މުސްލިމުންނަށް ކަންކަމުގައި އިސްކަން ދޭން ފަށާފައިވާ ކަމަށް ގިނަބަޔަކު އަންނަނީ ބުނަމުންނެވެ.