ގިނަ މީހުންނަކީ ކޮންމެ ދުވަހަކުވެސް ނަފްސާނީ ގޮތުން ބޮޑެތި ބުރަތަކެއް އުފުލަމުންދާ ބައެކެވެ. ނަމަވެސް، މި ތަކުލީފުތަކަކީ ތިމާގެ ދިރިއުޅުމާ އިންތިހާއަށް ލާމެހިފައިވާ ކަންކަމަށް ވާތީ، އެއީ އެހީތެރިކަން ބޭނުންވާ ފަދަ ސީރިއަސް ކަންތައްތަކެއްގެ ގޮތުގައި ގިނަ ފަހަރަށް އިހުސާސެއް ނުކުރެވެއެވެ. އަބަދު ވަރުބަލިވެފައި ހުރުމާއި، މީހުންނާ ދުރުވެއުޅުމާއި، އަވަހަށް ރުޅިއައުން ނުވަތަ ހިތަށް އެއްވެސް އިހުސާސެއް ނުވާ "ހުސްކަން" އިހުސާސުވުމަކީ އާދައިގެ ކަމެއްގެ ގޮތުގައި ބައެއް މީހުން ބަލައިގަނެއެވެ. ސިކުނޑިއަކީ އުނދަގޫތަކަށް ހޭނުމުގެ ބާރު ލިބިފައިވާ އެއްޗަކަށް ވުމުން، މި ބުރަތައް އުފުލުމަކީ ހިމޭން ތަކުލީފަކަށް ބަދަލުވެއެވެ. ބޭރުފުށުން ބަލާއިރު ޒިންމާތައް އަދާކޮށް، ހުރިހާ ކަމެއް ރަނގަޅުހެން ހީވި ނަމަވެސް، އެތެރެފުށުން އެމީހަކު ހުންނަނީ ނަފްސާނީ ގޮތުން ވަރުބަލިވެ، ދިރިއުޅުމާ ވަކިވެފައިވާ ފަދަ އިހުސާސެއްގައެވެ.
ސައިންސް ޑެއިލީ (2026) ގައި ހާމަކޮށްފައިވާގޮތުން، އަޅާނުލާ ދޫކޮށްލެވޭ އިހުސާސްތަކަކީ ފިލައިގެންދާ އެއްޗެއް ނޫނެވެ. އޭގެ ބަދަލުގައި އެ އިހުސާސްތައް ހިތުގެ އަޑީގައި ބަދަލުވަނީ މާބޮޑަށް ފިކުރުކުރުމާއި ، ކަންކަން ކުރުމުގެ ޝައުގުވެރިކަން ގެއްލުމާއި، ސަމާލުކަން ދިނުމަށް އުނދަގޫވުމަށެވެ. އަދި ދިރިއުޅުމުން ލިބެންޖެހޭ އުފަލާއި ހިތްހަމަޖެހުން މިކަމުގެ ސަބަބުން ގެއްލިގެންދެއެވެ. މިފަދަ ހާލަތެއްގައި ހުންނަ މީހާ އަބަދުވެސް ހުންނަނީ ނުވެދިޔަ ކަންކަމާ ކަންބޮޑުވުމާއި ނުވަތަ ކުރިމަތިވެދާނެ މައްސަލަތަކަށް ބިރުގަތުމެއްގެ ތެރޭގައެވެ. މީގެ ސަބަބުން، ހަށިގަނޑު އަރާމުކުރާ ވަގުތުތަކުގައިވެސް ސިކުނޑި އޮންނަނީ ވަރުބަލިވެފައެވެ.
މިފަދަ އާދަތައް ދިގުލައިގެން ދިއުމުން، މީހާ އަމިއްލަ ނަފްސާ ދޭތެރޭ ދެކޭ ގޮތް ބަދަލުވެއެވެ. އަމިއްލަ ނަފްސަށް ފާޑުކިޔުމަކީ އާދައިގެ ކަމަކަށް ވެ، އަމިއްލަ ނަފްސުގެ އިހުސާސްތަކަށް ދޭންޖެހޭ އަހައްމިއްޔަތުކަން ކުޑަކުރެވެއެވެ. އަދި ތިމާ ތަހައްމަލުކުރާ ތަކުލީފަކީ ބަލިކަށިކަމެއްގެ ގޮތުގައި ދެކެން ފަށައެވެ. ނަމަވެސް ހަގީގަތަކީ މިއީ ތިމާގެ ސިކުނޑި އަޅާލުމާއި ސަމާލުކަމަށް އެދި ގޮވާ ގޮވުންތަކެއް ކަމެވެ. ދިރިއުޅުމުގެ އާދައިގެ ކަންކަމުގެ ގޮތުގައި ހީވާ ކަންތައްތަކަކީ، އަސްލުގައި އަޅާލުމާއި، ވިސްނައިދިނުމާއި، އަދި އެހީތެރިކަން ބޭނުންވެފައިވާ ނަފްސާނީ ބުރަތަކެކެވެ. މިއީ ފޮރުވައިގެން އުޅުމުގެ ބަދަލުގައި، ބަލައިގަނެ ހައްލުކުރަން ޖެހިފައިވާ ކަންކަމެވެ.