ފަތުރުވެރިކަމުގެ ސިނާޢަތުގައި ދުނިޔޭގެ އެންމެ މަޝްހޫރު އެއް މަންސަކަމަށްވާ ޓްރިޕްއެޑްވައިޒާގެ ބޭނުންކުރާ ފަތުރުވެރިންގެ ވޯޓުން ކޮންމެ އަހަރަކުވެސް ނެރޭ ދުނިޔޭގެ "ބެސްޓް އޮފް ދި ބެސްޓް" ލިސްޓުގެ އިސް ސަފުގައި ދިވެހިރާއްޖެ ފައިތިލަ ސާބިތުކޮށްފިއެވެ.
މި ލިސްޓުގައި ރާއްޖެ ހިމެނިފައިވަނީ، ޓްރިޕްއެޑްވައިޒާގެ އަށް މިލިއަން ލިސްޓިންގެ ތެރެއިން އެންމެ ފާހަގަކޮށްލެވޭ އެއް އިންސައްތައިގެ ތެރޭގައި ހިމެނިގެންނެވެ.
މި ރޭންކިންގްތައް ކަނޑައަޅަނީ ވޭތުވެދިޔަ 12 މަސްދުވަހުގެ ތެރޭގައި ފަތުރުވެރިން ދީފައިވާ ރިވިއުތަކުގެ ފެންވަރަށާއި އަދަދަށް ބަލައިގެންނެވެ. މީގެ މައިގަނޑު ބޭނުމަކީ ފަތުރުވެރިންނަށް ހިތްހަމަޖެހޭ ރަނގަޅު ހިދުމަތްތަކާއި ތަޖުރިބާތަކެއް ފޯރުކޮށްދޭ މަންޒިލްތައް ފާހަގަކޮށް އަގުވަޒަންކުރުމެވެ.
ޓްރިޕްއެޑްވައިޒާގެ މިއަހަރުގެ ދުނިޔޭގެ ރޭންކިންގްގައި، ރާއްޖެއިން ވަނީ ފަތުރުވެރިކަމުގެ ގޮތުން ނަން މަޝްހޫރު ބޮޑެތި މަންޒިލްތަކާ ވާދަކޮށް ދެކުނު ކޮރެއާގެ ސޯލް، ހަނގަރީގެ ބުޑަޕެސްޓް، އަދި އެކުވެރި އަރަބި އިމާރާތުގެ ވެރިކަށް އަބޫދާބީ ފަހަތަށް ޖައްސާލާ، ލިސްޓުން ޖާގަ ހޯދާފައެވެ.
މަންޒިލްތަކުގެ ޖުމްލަ ރޭންކިންގްގެ އިތުރުން، ދުނިޔޭގެ "ބެސްޓް ހަނީމޫން ޑެސްޓިނޭޝަން" ކެޓަގަރީގެ ތިންވަނަ މަގާމުވެސް ރާއްޖެއަށް ވަނީ ލިބިފައެވެ. ފަތުރުވެރިންގެ ފަރާތުން ލިބިފައިވާ އިތުބާރު ހުރި ހިޔާލުތަކަށް ބިނާކޮށް ލިބުނު މި ފާހަގަކޮށްލެވޭ ކުރިއެރުމުން، ލަގްޒަރީ އަދި ހަނީމޫން މަންޒިލެއްގެ ގޮތުގައި ފަތުރުވެރިންގެ މެދުގައި ރާއްޖެއަށް އޮތް އިތުބާރާއި މަގުބޫލުކަން ހާމަވެއެވެ.
ޓްރިޕްއެޑްވައިޒާގެ "ޓްރެވަލާސް ޗޮއިސް ބެސްޓް އޮފް ދަ ބެސްޓް" އެވޯޑް ދިވެހިރާއްޖެއަށް ލިބުނުއިރު، ބައިނަލްއަގުވާމީ ފެންވަރުގައި ރާއްޖޭގެ ފަތުރުވެރިކަން ފާހަގަކުރެވޭ ފަދަ ބޮޑެތި ކާމިޔާބީތަކެއް އަންނަނީ ލިބެމުންނެވެ. އެގޮތުން، 2025 ވަނަ އަހަރު ވޯލްޑް ޓްރެވަލް އެވޯޑްސްގެ "ވޯލްޑްސް ލީޑިންގް ޑެސްޓިނޭޝަން"ގެ ޝަރަފު ޖެހިޖެހިގެން ހަވަނަ އަހަރު ރާއްޖެއިން ވަނީ ކާމިޔާބުކޮށްފައެވެ. މިއީ ދުނިޔޭގެ ރެކޯޑެއްގެ ގޮތުގައި ފާހަގަކުރެވޭ ކާމިޔާބީއެކެވެ. މީގެ ސަބަބުން ބައިނަލްއަގުވާމީ ފަތުރުވެރިކަމުގެ ދާއިރާގައި ރާއްޖެއަކީ ނަމޫނާ ގައުމެއްގެ ގޮތުގައި ވަނީ ފާހަގަވެފަ އެވެ.
ވޯލްޑް ޓްރެވަލް އެވޯޑްސްގެ އިތުރުން، "ކޮންޑޭ ނާސްޓް ޓްރެވަލާ" އިން ދޭ އެކި އެވޯޑްތަކާއި، ޝަރަފުވެރި "މިޝެލިން ކީ" ގެ ލަގަބުތައް ވެސް ރާއްޖޭގެ ގިނަ ރިސޯޓުތަކަކުން ވަނީ ހޯދާފައެވެ. މިއީ މަތީ ފަންތީގެ ފަތުރުވެރިކަމުގެ މަންޒިލެއްގެ ގޮތުގައި ރާއްޖެއިން ހޯދަމުންދާ ކުރިއެރުންތަކަށް އިތުރުވެ، ރާއްޖެއަށް ފަތުރުވެރިންގެ މެދުގައި އޮތް މަގުބޫލުކަމާއި އިތުބާރު ދެމެހެއްޓުމަށް މުހިންމު ކާމިޔާބީތަކެކެވެ.