ދިވެހި މުޖުތަމަޢުގެ ތެރޭގައި އަށަގަނެފައިވާ ބައެއް އާދަތަކަކީ އާއިލީ ގުޅުންތަކަށް ބައެއް ފަހަރު ބުރަބޮޑުވާ ކަންކަމެވެ. އޭގެ ތެރެއިން އެއް ކަމަކީ "ކާން ހެދުމުގެ" މަސައްކަތެވެ. މިތަނުގައި "ކާން ހެދުމޭ" މިބުނަނީ ކެއްކުމުގެ ވާހަކައެއް ނޫނެވެ. ކައްކާ ނިމިފައި ހުންނަ ތަކެތި ތަށިތަކަށް އަޅައި، ކާމޭޒުމައްޗަށް ނެރެ، އަތުރާލުމުގެ ވާހަކައެވެ. ހިތާމައަކީ، އަދުގެ ބައެއް ފިރިހެނުންގެ ކިބައިގައި ހުންނަ ކަންނެތް ކަމެއްގެ ސަބަބުން، ކާން ތައްޔާރުކޮށްފައި ހުއްޓަސް މޭޒުމައްޗަށް ނާރުވަނީސް ނުކާން ތިބޭ ތިބުމެވެ.
އަނބިމީހާ ނުވަތަ ގޭގެ އަންހެންވެރިން ބަދިގޭގައި އެތައް އިރެއްވަންދެން ހޫނުގައި މަސައްކަތްކޮށް، މީރުކޮށް ކައްކާފައި ހުންނައިރު، އެކަން ބަލައިގަތުމަކީ ފިރިހެނުންގެ ވާޖިބެކެވެ. ނަމަވެސް، ބައެއް ފިރިހެނުންނަށް ހީވެފައި އޮންނަނީ ކާންބޯން ދިނުމަކީ ހަމައެކަނި ކެއްކުން ނޫން ކަމަށާއި، ތަށި ކުރިމައްޗަށް ގެނެސް ބެހެއްޓުމަކީ ވެސް ހަމަ އަންހެނުން ކުރަންޖެހޭ ކަމެއް ކަމަށެވެ. މިއީ ވަރަށް "ގޮތްކޮޅު ބޮޑު" އާދައެކެވެ. ކައްކާފައި ހުރިއްޔާ، އަމިއްލައަށް ބަދިގެއަށް ވަދެ، ތަަށްޓަށް އަޅައިގެން ކާލުމަކީ އެކަމުގައި މައްސަލައެއް އޮތްކަމެއް ނޫނެވެ.
ބަދިގެއިން އަމިއްލައަށް އަޅައިގެން ކެއުމަކީ ފިރިހެނެއްގެ ގަދަރަށް އުނިކަން އަންނާނެ ކަމެއް ނޫނެވެ. އޭގެ ބަދަލުގައި، އެއީ ގޭތެރޭގެ މަސައްކަތުގައި އަނބިމީހާއަށް ލުއިކޮށްދިނުމުގެ ގޮތުން ކުރެވޭ ވަރަށް މަތިވެރި ކަމެކެވެ. އަންހެނުންނަކީ މުޅި ދުވަހު ގޭތެރޭގެ އެކި މަސައްކަތްތަކުގައާއި ކުދިންގެ ކަންކަމުގައި ބުރަކޮށް އުޅޭ ބަޔަކަށްވާއިރު، ކޮންމެ ފަހަރަކު ފިރިމީހާ ކާންވާއިރަށް މޭޒުމަތި ތައްޔާރުކުރަން މަޖުބޫރުވުމަކީ އެމީހުންނަށް ދެވޭ އިތުރު ތަކުލީފެކެވެ.
އެހެންކަމުން، ކަންނެތްކަން ދޫކޮށްލައި، ގޮތްކޮޅު ބޮޑުވުން އެއްފަރާތް ކުރަން އެބަޖެހެއެވެ. ކައްކާފައި ހުރިއްޔާ، ކާމޭޒުމައްޗަށް ނުނެގިޔަސް ބަދިގެއަށް ވަދެ އަމިއްލައަށް އަޅައިގެން ކާލަން ދަސްކުރާށެވެ. މިއީ އާއިލީ ދިރިއުޅުމުގައި އެކަކު އަނެކަކަށް އެހީތެރިވުމުގެ ރީތި ނަމޫނާއެކެވެ. ކާން ނުހެދިޔަސް ކެވޭނެކަން ގަބޫލުކޮށް، އަމިއްލަ ފައިމައްޗަށް ތެދުވުމަކީ އުފާވެރި އާއިލާއެއް ބިނާކުރުމަށް އެޅޭ މުހިންމު ފިޔަވަޅެކެވެ.