އިންސާނީ ގުޅުންތަކުގެ ބިންގަލަކީ އިތުބާރެވެ. އެކަކު އަނެކަކަށް ކުރާ އިތުބާރަކީ މުޖުތަމައެއް ބަދަހިކަންމަތީ ދެމިއޮތުމަށް ކޮންމެހެން ބޭނުންތެރި ސިފައެކެވެ. ނަމަވެސް، މިއަދުގެ ހަލުވި ދުނިޔެއަށް ނަޒަރު ހިންގާލާއިރު، "އިތުބާރަކީ މިއަދު ކުރަން ހެޔޮވާވަރު އެއްޗެއް ނޫން" ބުނާ ބުނުމަކީ ހަގީގަތާ ގާތްކުރާ ވާހަކައެއްކަން ގަބޫލުކުރަން ޖެހެއެވެ. އިންސާނުންގެ އުޅުމާއި ގުޅުމަށް އައިސްފައިވާ ބަދަލުތަކުގެ ސަބަބުން، އިތުބާރުގެ ފޭރާން ވަނީ ވަރަށް ބޮޑަށް ވީދިފައެވެ.
މިއަދުގެ މުޖުތަމައުން ފެންނަމުންދާ އެންމެ ހިތާމަވެރި މަންޒަރަކީ އަމިއްލަ އެދުން އިސްކުރުމެވެ. ގިނަ މީހުންގެ ގުޅުންތައް ބިނާވެފައިވަނީ ތެދުވެރިކަމާއި އިޚުލާޞްތެރިކަމުގެ މައްޗަކަށް ނޫނެވެ. އޭގެ ބަދަލުގައި، އެ މީހަކަށް އެ ގުޅުމަކުން ލިބޭނެ ފައިދާއެއްގެ މައްޗަށެވެ. މާއްދިއްޔަތަށް ބޮޑު ސަމާލުކަމެއް ދެވޭ މި ޒަމާނުގައި، ތިމާގެ އަމިއްލަ މަންފާއަށްޓަކައި އަނެކާގެ އިތުބާރު ނަގާލުމަކީ ގިނަ ބަޔަކަށް މިއަދު އާދައިގެ ކަމެކެވެ. މިފަދަ މާހައުލެއްގައި މީހަކަށް ފުރިހަމައަށް އިތުބާރު ކުރުމަކީ އަމިއްލަ ނަފްސު ނުރައްކަލެއްގެ ތެރެއަށް ހުށަހެޅުން ފަދަ ކަމެކެވެ.
ޓެކްނޮލޮޖީއާއި ސޯޝަލް މީޑިއާގެ ސަބަބުން އިންސާނުންގެ އަސްލު ސޫރަ ފޮރުވުމަށް ވަނީ މަގުފަހިވެފައެވެ. މީހަކާ ބައްދަލުނުވެ، އިންޓަނެޓުގެ ޒަރީއާއިން ބާއްވާ ގުޅުންތަކުގައި އޮޮޅުވާލުމާއި މަކަރު ހެދުން ވަނީ އިންތިހާއަށް އިތުރުވެފައެވެ. "ފޭކު" އައިޑީތަކާއި، ދޮގު މައުލޫމާތު ފެތުރުމަކީ މިއަދު އާންމު ކަމެކެވެ. ހިތާމައަކީ، އެންމެ ގާތް ރަހުމަތްތެރިންނާއި އާއިލާގެ މީހުންގެ މެދުގައި އޮންނަންޖެހޭ އިތުބާރުވެސް، މިފަދަ ވަސީލަތްތަކުގެ ނުފޫޒުން ހީނަރުވަމުން ދިއުމެވެ. އެކަކު އަނެކަކަށް ދޭ ސިއްރުތައް ބޭޒާރުކޮށްލުމާއި، އަބުރު ނަގާލުމަކީ މިއަދު ފެންނަމުންދާ ހިތްދަތި ހަގީގަތްތަކެވެ.
އިސްލާމީ ރީތި އުސޫލުތަކަށް ބަލާއިރު، އަމާނާތްތެރިކަމަކީ މުއުމިނެއްގެ ކިބައިގައި ހުންނަންޖެހޭ އެންމެ މުހިންމު އެއް ސިފައެވެ. ކީރިތި ރަސޫލާ ﷺ ވަނީ އަމާނާތަށް ޚިޔާނާތްތެރިވުމަކީ މުނާފިގުންގެ ސިފައެއްގެ ގޮތުގައި ސިފަކުރައްވާފައެވެ. ނަމަވެސް، މިއަދުގެ މުޖުތަމައުގައި ދީނީ މިފަދަ މަތިވެރި އަޚުލާގީ ސިފަތަކަށްވުރެ ދުނިޔަވީ އެދުންތައް އިސްކުރެވޭތީ، އިތުބާރު ހިފެހެއްޓުމަކީ ނާދިރު ކަމަކަށް ވަނީ ވެފައެވެ. ވިޔަފާރީގެ މުއާމަލާތްތަކުގައާއި، ވަޒީފާގެ މައިދާނުގައިވެސް އިތުބާރަށްވުރެ ބޮޑަށް މިއަދު ބަލަންޖެހެނީ ލިޔެކިޔުންތަކަށާއި ގާނޫނީ އޮނިގަނޑުތަކަށެވެ.
އިތުބާރަކީ އަގުބޮޑު ޖަވާހިރެއް ފަދަ އެއްޗެކެވެ. އެއީ ހޯދަން އުނދަގޫ، ނަމަވެސް ގެއްލިއްޖެނަމަ އަނބުރާ ހޯދަން އެއަށްވުރެ މާ އުނދަގޫ އެއްޗެކެވެ. މިއަދުގެ ހާލަތަށް ބަލާއިރު، ކޮންމެ މީހަކަށްމެ ފުރިހަމައަށް އިތުބާރު ކުރުމަކީ ބުއްދިވެރި ކަމެއް ނޫނެވެ. ގުޅުންތައް ބަދަހިކުރަންވާނީ ހުށިޔާރުކަމާއި ބުއްދިވެރިކަމާ އެކުގައެވެ. އިތުބާރު ކުރަންވާނީ އެ މީހެއްގެ ތެދުވެރިކަން ތަކުރާރުކޮށް ސާބިތުވެފައިވާ މީހުންނަށް އެކަންޏެވެ. އެހެންނޫނީ، އިތުބާރު ކުރުމުގެ ނަތީޖާއަކަށް ވެގެންދާނީ ހިތާމައާއި ލަދުވެތިކަމެވެ.