ދަރިންނަށް އެސްފީނާ ޖެހިދާނެތީ މައިންބަފައިން ކަންބޮޑުވެއެވެ. އެސްފީނާ ޖެހިއްޖެ ނަމަ އަމުދުން އެކަމާ ދެރަވެ މާޔޫސްވެއެވެ. ނަމަވެސް ހިތާމައަކީ، އަދުގެ މައިންބަފައިން އެމީހުންގެ ދަރިންނަށް އެސްފީނާ ޖެހިދާނެ ފަދަ ކަންކަން ކުރަން ޖެހިލުން ނުވާތީއެވެ. އެފަދަ އަމަލުތައް ކުރުމާއިމެދު ދެކެވެނީ އެއީ "މޮޅު" ކަމެއް ކަމަށެވެ. ވީމާ މިކަމަކީ ވަރަށް ބޮޑަށް ވިސްނަން ޖެހި އަދި ހޭލުންތެރިވާންވެސް ޖެހިފައިވާ ކަމެކެވެ. 

"އަދި ހަސަދަ ވެރިއަކު ހަސަދަވެރިވެއްޖެހިނދު، އޭނާގެ ނުބައިކަމުންވެސްމެއެވެ." (ފަލަޤް 5). ހަސަދަވެރިންގެ ނުބައިކަން ކީރިތި ޤުރުއާނުގައި މިހާ ސާފުކޮށް ބަޔާންވެފައި އޮތުމުން އެކަމުގެ ބިރުވެރިކަން ބޮޑުކަން ހާމަވެއެވެ. އެކަމުން މީސްތަކުންނަށް ގެއްލުމެއް ނުވާނަމަ މިފަދައިން ކީރިތި ޤުރުއާނުގައި ބަޔާން ނުކުރެއްވީހެވެ. 

ނަމަވެސް މިކަމަށް އަހަރެމެންގެ ތެރެއިން ފުންކޮށް ވިސްނަނީ ވަރަށް މަދު މީހެކެވެ. ދަރިންނަށް ކިތަންމެ ކުޑަ ކާމިޔާބީއެއް ލިބުނު ނަމަވެސް މީސްމީޑިއާގައި ލިޔެގެންނާއި ވީޑިއޯ އަދި ފޮޓޯ އާންމު ކޮށްގެން މުޅި ދުނިޔެއަށް އެކަން އަންގަމުއެވެ. ގިނަ ބަޔަކަށް ދައުވަތުދީގެން ބޮޑެތި ޕާޓީތަކާއި ހަފްލާތައް އެބަ ބާއްވަމުއެވެ. ޙަޤީޤަތުގައި މިހިރީ ވަރަށް ނުރައްކަތެރި ކަންކަމެވެ. ދަރިންގެ އުފަލައްޓަކައި ނަމަވެސް ކުރެވޭ މިފަދަ ބައެއް ކަންކަމުގެ ސަބަބުން ދަރިންގެ ކުރިއެރުން މުޅިންހެން ހުއްޓިގެން އެބަދެއެވެ. ދަރިންގެ ކުރިއެރުން "ގައުވެގެން" ދެއެވެ. 

ހަސަދަވެރިކަން އުފެދެނީ ހަމައެކަނި ލޮލަށް ފެނުމަކުން ނޫނެވެ. ކަންފަތަށް އަޑު އިވުމުންވެސް ހަސަދަވެރިކަން އުފެދެއެވެ. ގަބޫލުކުރާ ގަބޫލު ކުރުމެއްގެ ސަބަބުންވެސް ހަސަދަވެރިކަން އުފެދެއެވެ. ވީމާ ހަޔާތުގެ ކޮންމެ ކަމަކީ ހުރިހާ އެންމެންނަށް އަންގަންޖެހޭ ކަމެއް ނޫނެވެ. މީހެއްގެ ހަސަދަވެރިކަން އެނގުމުން ޖިންނިންނާއި ޝައިޠާނުންނަށް އިތުރު ހިއްވަރެއް ލިބިގެންދެއެވެ. 

ހަމައެއާއިއެކު ވިސްނާށެވެ! ތިބާއަށް ތަނަވަސްކަން ދެއްވަވާފައިވީނަމަވެސް އެކަން މީސްތަކުންނަށް ހާމަކޮށް ނުދައްކާށެވެ. މާނައަކީ މީސްތަކުންގެ ކުރިމައްޗަށް ނުކުންނައިރު ނުވަތަ ތިބާގެ ދަރިން މުޖުތަމައަށް ނެރޭއިރު އެހެން މީހުން ހަސަދަވެރިވާފަދަ ގޮތްތަކަށް ނުނެރޭށެވެ. އެހެން މީހުން އަޅައިގަންނަ ފަދައިން ޒީނަތްތެރިކޮށްގެން ނެރެ މީސްތަކުންނަށް ނުދައްކާށެވެ. އެހެން ކުދީންނާއި ތަފާތުވާނޭހެން ގައިގައި އަގުބޮޑު ގަހަނާތައް އަޅުވައިގެން ނުނެރޭށެވެ. އެފަދަ ކަންކަމަށް ހަސަދަވެރިވާނެ ބައަކު އަބަދުވެސް ތިބޭނޭކަން ހަނދާނުގައި ބަހައްޓަން ވާނެއެވެ. 

ހަމައެއާއިއެކު ހަސަދަވެރިންގެ ކިބައިންނާއި ޖިންނި ޝައިޠާނުންގެ ކިބައިން ސަލާމަތްކުރެއްވެވުން އެދި ކުރަން ޖެހޭ ދުޢާތައްކޮށް ޛިކުރުކޮށްގެން ނޫނީ ގެއިން ނުނެރޭށެވެ. އެކުދިން ލައްވާ ނުކިއުއްވޭނަމަ، މައިންބަފައިން ނަމަވެސް އެ ދުޢާތައް ކިޔަންވާނެއެވެ.

އެންމެ ކުޑަމިނުން ފަތިސް ނަމާދާއި މަޣްރިބް ނަމާދަށްފަހު އާޔަތުލްކުރުސި އަދި ތިރީ ތިން ސޫރަތް، ކޮންމެ ސޫރަތެއް 3 ފަހަރު މައިންބަފައިންވެސް ކިޔަވާށެވެ. އަދި ދަރިންލައްވައިވެސް ކިޔުއްވާށެވެ. ރޭގަނޑު ކުދިން ނިންދަވާއިރު ޢާޔަތުލްކުރުސި ކިޔުއްވާށެވެ. މިއީ ޒަމާނުއްސުރެ ދިވެހިންގެ ތެރޭގައި އޮތް ރިވެތި އާދައެކެވެ. 

މާތް ﷲ ގެ ވާގިފުޅައި އެކު މިކަންކަން ކުރަމުން ގެންދާނަމަ ހަސަދަވެރިންގެ އެސްފީނާއިންނާއި، އެސްފީނާގެ އުނދަގޫތައް ހިފައިގެން އަންނަ ޖިންނި ޝައިތާނުންނަށް ދަރިންނާއި ކައިރިވެސް ނުވެވޭނެއެވެ.