މައްކާގައި ހުންނަ މަސްޖިދުލް ހަރާމް އާއި މަދީނާގައި ހުންނަ މަސްޖިދުއް ނަބަވީގައި، އަޅުކަމުގައި ތިބޭ މީހުންނަށް ޒަމްޒަމް ފެން ބެހުމުގައި ހަރަކާތްތެރިވާނީ ރޮބޮޓްތަކެއް ކަމަށް، ސައޫދީ އަރަބިއްޔާގެ ރަސްމީ ނޫސް އޭޖެންސީން ބުނެފި އެވެ.
މި ހިދުމަތް ފައްޓަވައިދެއްވީ، ދެ ހަރަމްފުޅުގެ ކަންތައް ބަލަހައްޓާ އިދާރާގެ ރައީސް، އައްޝައިޚް އަބްދުއްރަހްމާން އައް ސުދައިސް އެވެ. ރޮބޮޓް ބޭނުންކޮށްގެން، ޒަމްޒަމް ފެން ބަހާއިރު، އެކަމަށް އެއްވެސް މީހަކު ބޭނުން ނުކުރާނެ ކަމަށާއި، މީހެއްގެ ބައިވެރިވުން ވެސް ނޯންނާނެ ކަމަށް މައްކާގެ ކަމާ ބެހޭ އިދާރާތަކުން ބުނެ އެވެ.
ޒަމްޒަމް ފެން ބެހުމުގައި ރޮބޮޓް ބޭނުން ކުރަން މި ފެށީ، މިހާރު ފެތުރެމުންދާ ކޮވިޑް ބަލިން ރައްކާތެރިވުމަށް އަޅާ ފިޔަވަޅެއްގެ ގޮތުންނެވެ. މި ރޮބޮޓްތައް މިސްކިތުގެ ތެރޭގައި ދަތުރުކުރަމުން ދިއުމުގައި މިސްކިތުގައި ތިބޭ މީހުންނަށް އުނދަގު ނުވާނޭ ގޮތަށް އެކަން ހިނގުމުގެ ނިޒާމެއް ވަނީ މި ރޮބޮޓުތަކުގައި ހަމަޖައްސާފައެވެ.
ހައްޖުގެ އަޅުކަމުގައި ބައިވެރިވާ މީހުންގެ މެދުގައި ކޮވިޑު ފެތުރުނަ ނުދިނުމަށްޓަކައި، މިދިޔަ އަހަރުގެ ހައްޖުގައި ވެސް ބައިވެރިކުރީ، ސައޫދީ އަރަބިއްޔާގައި ތިބި، އެކި ގައުމުތަކުގެ މީހުންނެވެ. އެހެން އެއްވެސް ގައުމަކުން ހައްޖަށް މީހުން އައުމަށް ފުރުސަތެއް ނުދެ އެވެ. މި އަހަރުގެ ހައްޖުގެ އަޅުކަން ވެސް ކުރިއަށް ގެންދާނީ، ސައޫދީގައި ތިބި އެކި ގައުމުތަކުގެ މީހުން ބައިވެރިކޮށްގެންނެވެ.
މިއަހަރުގެ ހައްޖުގައި ބައިވެރިކުރަން ސައޫދީން ނިންމާފައިވަނީ، އުމުރުން 18 އަހަރާއި 56 އަހަރާ ދެމެދުގެ މީހުންގެ ތެރެއިން ކޮވިޑް ވެކްސިންގެ ދެ ޑޯޒް ފުރިހަމަކޮށްފައިވާ މީހުންނާއި، ކޮވިޑް ޖެހި ރަނގަޅުވެފައިވާ މީހުންނާއި ފުއްޕާމޭގެ ބަލިތައް ނުހުންނަ މީހުންނެވެ. އެ ޝަރުތުތައް ހަމަވާ މީހުންގެ ތެރެއިން ވެސް މުޅިއެކު 60،000 މީހުންނެވެ.