ޔޫރޯ ފުޓްބޯޅަ މުބާރާތުގައި މިރޭ ކުޅުނު މެޗުތަކުން ސްލޮވާކިއާ އާއި ޗެކް ރިޕަބްލިކް މޮޅުވެއްޖެއެވެ.

ރަޝިޔާގައި ޕޯލެންޑްއާ ދެކޮޅަށް ކުޅުނު މެޗުން ސްލޮވާކިއާ 2-1 އިން މޮޅުވިއިރު، އަމިއްލަ ސަޕޯޓަރުންގެ ކުރިމަތީގައި ސްކޮޓްލެންޑުން ޗެކް ރިޕަބްލިކް އަތުން ބަލިވީ 2-0 އިންނެވެ.

ސެއިންޓް ޕީޓަސްބާގުގައި ހުންނަ ކްރެސްޓޯވްސްކީ ސްޓޭޑިއަމްގައި މިރޭ ކުޅުނު މެޗުގައި ހީކުރި ގޮތާއި ހިލާފަށް ކުރީން ލީޑްނެގީ ސްލޮވާކިއާ އިންނެވެ. މެޗުގެ 18 ވަނަ މިނެޓުގައި ސްލޮވާކިއާގެ ރޮބަޓް މަކް ފޮނުވާލި ބޯޅަ ގޯލްގެ ތެރެއަށް ވަނީ ޕޯލެންޑްގެ ކީޕަރު ވޮޝިއެކް ޝެޒްނީ ގައިގަ ޖެހިފައެވެ. މި މެޗުގެ ފުރަތަމަ ހާފު ނިމުނީ 1-0 އިން ސްލޮވާކިއާ ކުރީގައި އޮވެގެންނެވެ.

ދެވަނަ ހާފުގެ ކުޅުން ފެށިގެން މިނެޓެއްގެ ތެރޭގައި ޕޯލެންޑުން އެއްވަރުކުރީ ކެރޯލް ލިނޭޓީ ކާމިޔާބުކުރި ގޯލުންނެވެ. މިއީ އެ ޓީމުގެ ފުލްބެކް މަސިއެޖް ރީބަސް ދިން ބޯޅައަކުން ލިނޭޓީ ކާމިޔާބުކުރި ގޯލެކެވެ. މި ގޯލާއެކު މެޗުގެ ކޮންޓްރޯލް އަތުލައިގެން ކުޅެމުންދިޔަ ޕޯލެންޑަށް މައްސަލަތައް ކުރިމަތިވީ މެޗުގެ 62 ވަނަ މިނެޓުގައި އެ ޓީމުގެ މިޑްފީލްޑަރު ގްރެގޯ ކްރިކޯވިއަކް އަށް ދެވަނަ ރީނދޫ ކާޑާއެކު ރަތެއް ދެއްކުމުންނެވެ.

އޭގެ ހަތް މިނެޓުފަހުން، ސްލޮވާކިއާ އިން މި މެޗުގައި ދެވަނަ ފަހަރަށް ލީޑްނެގީ އެ ޓީމުގެ ކެޕްޓަން މަރެކް ހަމްސިކް ނަގައިދިން ކޯނަރަކުން ލިބުނު ބޯޅައަކުން މިލާން ސްކްރިނިއާރް އެވެ. މިއީ އިންޓަ މިލާނަށް ކުޅެމުން އަންނަ ސްކްރިނިއާރް، ގައުމީ ޓީމަށް އެންމެ ފަހުން ކުޅުނު ފަސް މެޗުގައި ޖެހި ތިންވަނަ ގޯލެވެ. ޕޯލެންޑުން ނަތީޖާ ހަމަހަމަކުރަން ކުރި މަސައްކަތުގައި އެ ޓީމުގެ ކެޕްޓަން ރޮބަޓް ލެވަންޑޯސްކީ އާއި ޔެން ބެޑްނަރެކް އަދި ކެރޯލް ސްވިޑާސްކީ އަށް ލިބުނު ފުރުޞަތުތަކުގެ ބޭނުންހިފޭގޮތެއްނުވިއެވެ. ބެޑްނަރެކް ފޮނުވާލި ބޯޅަ ގޯލްގެ ދަނޑިކައިރިން ދިޔައިރު، ސްވިޑާސްކީ ފޮނުވާލި ބޯޅަ ސްލޮވާކިއާގެ ކީޕަރު މާޓިން ޑުބްރާވްކާ މަތަކުރިއެވެ.

މި މުބާރާތުގައި ސްކޮޓްލެންޑްގެ ގްލާސްގޯގައި ހުންނަ ހެމްޕްޑެން ޕާކްގައި އެ ޓީމު ކުޅުނު މެޗުގައި ޗެކް ރިޕަބްލިކުން ޖެހި ދެ ލަނޑުވެސް ކާމިޔާބުކޮށްދިނީ ބަޔާ ލެވަކޫސަންގެ ފޯވާޑް ޕެޓްރިކް ޝިކް އެވެ. ކުރީން އިޓަލީގެ އޭއެސް ރޯމާ އަށް ކުޅުނު ޝިކް، މި މެޗުގައި ޖެހި ފުރަތަމަ ގޯލް ކާމިޔާބުކުރީ 42 ވަނަ މިނެޓުގައެވެ. މިއީ ޗެކް ރިޕަބްލިކްގެ ފުލްބެކް ވްލަޑްމިރް ސޯފާލް ނަގައިދިން ހުރަހަކުން ލިބުނު ބޯޅައެއް ޕެނަލްޓީއޭރިޔާތެރޭގައި ހުރެ ބޮލުން ފޮނުވާލައިގެން ޝިކް ކާމިޔާބުކުރި ރީތި ގޯލެކެވެ.

މި މެޗުގައި ޗެކް ރިޕަބްލިކުން ޖެހި ދެވަނަ ލަނޑުވެސް ކާމިޔާބުކޮށްދިނީ ޝިކް އެވެ. ދެވަނަ ހާފުގެ ކުޅުން ފެށިގެން ހަތްވަނަ މިނެޓުގައި އެ ޓީމުގެ ތޯމަސް ޝޫޗެކް ދިން ބޯޅައަކުން ޝިކް މިލަނޑުޖެހީ ހާފުގެ މެދެއްހާ ހިސާބުންނެވެ. މި ބޯޅަ ޝިކް ފޮނުވާލީ ސްކޮޓްލެންޑްގެ ކީޕަރު ޑޭވިޑް މާޝަލް ކުރިއަށް އަރައި އޮއްވާ އެ ބޯޅަ މަތިން ގޯލްގެ ތެރެއަށް އޮއްސާލައިގެންނެވެ. މިއީ ގައުމީ ޓީމަށް އޭނާ އެންމެ ފަހުން ކުޅުނު 11 މެޗުގައި ޖެހި 8 ވަނަ ގޯލެވެ.

މިއީ 2004 ވަނަ އަހަރުގެ ޔޫރޯގައި ޑެންމާކް އަތުން ޗެކް ރިޕަބްލިކް 3-0 އިން މޮޅުވި މެޗުގައި މިލާން ބަރޮސް ދެލަނޑުޖެހިފަހުން މި މުބާރާތުގެ މެޗެއްގައި އެ ޓީމުގެ ކުޅުންތެރިއަކު ދެ ގޯލް ކާމިޔާބުކުރި ފުރަތަމަ ފަހަރެވެ. އަދި، މިއީ އެ ޓީމު އެންމެ ފަހުން ކުޅުނު ބައިނަލްއަގުވާމީ 18 މެޗުގެ ތެރެއިން ބައިކޮޅަށް ލަނޑެއްވަނަނުދީ ނިންމާލި ތިންވަނަ މެޗެވެ.