ބަވަނަވެފައިވާ މި ދުނިޔޭގައި ތަފާތު އެކި ވިޔަފާރިތައް ކުރެވެއެވެ. ކޮންމެ ވިޔަފާރިއަކީވެސް ގިނަބަޔަކަށް ނަފާތަކެއް ކުރުވާ ވިޔަފާރިތަކެކެވެ. ވިޔާފަރިވެރިން އެބައިމީހުންގެ ވިޔަފާރިތައް ފުޅައިކުރުމުގައި އަވަދިނެތި އުޅެއެވެ. ވިޔަފާރިތައް ކުރިއެރުވުމުގައިވެސް ތަފާތު އެކި ހަރަކާތްތައް ކުރެއެވެ. ފުޅާދާއިރާގައި ކުރެވޭ ހަރަކާތްތަކާއި ހަނިދާއިރާތަކުން ކުރެވޭ ހަރަކާތްތަކެވެ. އެގޮތުން ވިޔަފާރިވެރިން އެބައިމީހުންގެ ވިޔަފާރިތައް ކުރިއެރުވުމުގައި އެންމެފުޅާ ދާއިރާއެއްގައި ކުރާ އެއްކަމަކީ އިޝްތިހާރު ކުރުމެވެ. އިޝްތިހާރަކީ ވިޔަފާރި ކުރިއެރުވުމަށްބޭނުން ކުރެވޭ "މޮޅު" އާލާތެކެވެ.
"މޮޅެތި" އެތައް އިޝްތިހާރުތަކެއް މުޖުތަމައުތަކުގައި ދައުރުވާއިރު، ވިޔަފާރިވެރިންނަށް އޭގެ ސަބަބުން ފައިދާއާއި ގެއްލުމާއިވެސް ކުރިމަތިލާން އެބަޖެހެއެވެ. ނަމަވެސް އިޝްތިހާރޭ ބުނުމުން ހަމަ އެކަނި ވިޔަފާރިވެރިންގެ ނަޒަރުން ވިސްނުމަކީ މީޒަމާނުގައި އިޝްތިހާރު މިނެކިރުން ރަނގަޅު ގޮތެއް ނޫނެވެ. އެހެނީ އާންމު ކުރެވޭ ކޮންމެ އިޝްތިހާރަކީ އާންމުންގެ މީހާ އާއި ހަމައަށް ފޯރާނޭ އިޝްތިހާރެކެވެ. ވަކި ގިންތިއެއް ނެތި މުޅި މުޖުތަމައަށް އެ އިޝްތިހާރެއް ފޯރާނެއެވެ. 18 އަހަރުން މަތީގެ މީހުން އެކަނި ބެލުމަށް ހެދޭ ފިލްމްތަކާ މަގުމަތީގައި ނުވަތަ ޓީވީ އާއި އިންޓަރނެޓްގެ އެކި ޕޭޖްތަކުގައި ހުންނަ އިޝްތިހާތުރަކާތައި ވަރަށް ތަފާތެވެ.
ހާލަތު ޒަމާނާއި ބައްދަލު ކުރީ ވިސްނުން ކަސިޔާރު ކުރުވަމުންނެވެ. އަދުގެ ބައެއް އިޝްތިހާރުތަކަކީ އިޖްތިމާއީ މިންގަނޑުތަކަށް ނުފެތޭ އިޝްތިހާރުތަކެވެ. ދިވެހި މި މުޖުތަމައުގައިވެސް މިފަދަ ބައެއް ހުތުރު އަމަލުތައް އެބަ ހިނގައެވެ. މުޅިއަކުން އިޖްތިމާއީ މިންގަނޑާއި ހިލާފުވަނީކީއެއް ނޫނެވެ. ނަމަވެސް ބޭނުން ކުރެވިފައި ހުންނަ ލަފުޒުތަކާއި ބަސްތަކާއި، މޮށެ އުޅޭ އިބާރާތްތަކުން ދެ މާނަ ދޭހަވަނީއެވެ. ހުތުރު މާނަތައް ދޭހަ ކޮށްދޭ އިބާރާތްތައް ބޭނުން ކޮށްފައި ހުންނަނީ ވަކި މަދެއްކޮށެއް ނޫނެވެ. އާއިލާއާއި އެކު އެއްތަންވެ، އެފަދަ އިޝްތިހާރަކަށް ބަލާލުން ވަނީ އަމުދުން ލަދުވެތި ކަމަކަށެވެ. މިއީ އެކަންކަމާއި މެދު އެންމެންވެސް ވިސްނާލުން މުހިންމު ކަންކަތައްތަކެވެ. ވިޔަފާރިވެރިންގެ ނަޒަރުގައި މިކަމުގައި ގޯސްވާނީ އެގޮތައް އެ މާނަ ނަގާ މީހާއެވެ. ނަމަވެސް މިކަމަކީ އާދަވެ މި މުޖުތަމައުގައި ހިނގަމުން އަންނަ ކަންތައްތަކެކެވެ. އެންމެ މިސާލެއް ދައްކާލާނަމެވެ.
މިއީ އެކި ބޯމިނުގެ ކަރުދާހަށް ޕްރިންޓް ކޮށްދޭކަމަށް ބުނެ ކޮށްފައިވާ އިޝްތިހާރެކެވެ. "ބޯ" އެއީ ނަން އިތުރެކެވެ. "ގަނޑު" މިއީ ކަރުދާހަށް ކިޔާ އެހެން ނަމަކެވެ. ދިވެހިބަހުގެ ހަމާގައި ނަމާއި ނަން އިތުރުގެ ދޭތެރެއަށް ހުސްތަންކޮޅެއް އަންނަން ޖެހެއެވެ. މިހެން ހުސްޖާގަ ނުދީ ލިޔަނީ ހަމަ ގަސްތުގައި މިއިން ނުބައި މާނާ ދޭހަކޮށްދޭން ނޫން ކޮން ބޭނުމެއްގައި ހެއްޔެވެ؟ މި އިޝްތިހާރުގައިވާ "ބޯގަނޑު" ގެ މާނަ ބެލުމަށް ކިޔުންތެރިންނަށް ދޫކޮށްލާނަމެވެ. މިއީ ދެމާނަ ނެގޭ ބަހެއް ނޫނެވެ. ކަނޑައެޅިގެން ލިޔެފައިވާ ހުތުރު އަދި ކަމާ ނުގުޅޭ ބަހެކެވެ.
މިއީ ފޯނު މަރަމާތު ކުރާ ފިހާރައެއްގެ ބޭރުގައިވާ ލިޔުމެކެވެ. "ލޯބިވަންޏާ ހަދާދޭނެ" ކަމަށް ބުނެއެވެ. ލޯބިވާންވީ ކާކު ހެއްޔެވެ؟ ފިހާރަ ސޭޓް ނުވަތަ ފޯން މަރާމާތުކުރަން ހުރި ޓެކްނިޝަން ހެއްޔެވެ؟ އެހެނީ ފޯން މަރާމާރު ކުރާނީ އެމީހުނެވެ. ނަމަވެސް އެމީހުންގެ ޚިދުމަތް ހޯދަން އަންނަ މީހުންދެކެ ލޯބިވާކަން ނުވަތަ ނުވާކަން ވެސް ޔަގީނެއް ނުވެއެވެ. "ވަންޏާ" އޭ ބުންނަން ޖެހެނީ ޔަގީން ނުވާ ޙާލަތުގައެވެ. މިތަނަށް ގޮސް ފޯނެއް ހަދަން ދީގެން އެ ފޯނު ނުހެދުން ނަމަ އެތަނުގެ ވެރިން ނުވަތަ މުވައްޒަފުން، ޚިދުމަތް ހޯދަން ދިޔަ މީހާ ދެކެ ލޯބި ނުވަނީހެއްޔެވެ؟
މިނޫނަސް މާލެ ތެރޭގައި ދުއްވާ ޕިކަޕްތަކުގެ ފަހަތުގައިވެސް މިފަދަ އެތައް ލިޔުމެއް ލިޔެފައި ހުއްޓާ ފެންނާނެއެވެ. މިލިޔުމުގެ ބޭނުމަކީ އެހުރިހާ އިޝްތިހާރު އަލުން އާންމު ކުރުމެއް ނޫނެވެ. ނަމަވެސް މި މެސެޖް ތިލަކޮށްލުމުގެ ގޮތުން ދެ މިސާލެއް ހާމަކޮށްލީއެވެ. މިފަދަ މިބާރާތްތަކުގެ އިޝްތިހާރުތައް އާންމުވެގެން ދާއިރު، މުޖުތަމައަށް މިކަމުން ކުރާ ނޭދެވޭ އަސަރާއި މެދު ފަރުވާލެއް ބަހައްޓާ ފަރުދަކު އުޅޭތޯއެވެ؟ އަދި މި މޭރުމުން ކުރެވޭ އަމަލުތަކާއި މެދު ފިޔަވަޅެއް ނުވަތަ އިސްލާހުކުރުމަށް ނަސޭހަތެއް ދޭނޭ ބާރުހުރި މުއައްސަސާއެއް ނުވަތަ އެފަދަ އިޖްތިމާއީ ވިއުގައެއްވެސް ނެތީތޯއެވެ؟
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން