އިނގިރޭސި ވިލާތުގައި ކުރި ދިރާސާއަކުން ދައްކާ ގޮތުގައި، އޯޓިސްޓިކް މީހުންނާއި އޯޓިސްޓިކް ނޫން މީހުން އިހުސާސްތައް ފާޅުކުރުމުގައި މޫނުމަތީގެ ހަރަކާތްތައް ބޭނުންކުރާ ގޮތުގައި މުހިންމު ތަފާތުތަކެއް ހުރެއެވެ.
ސައިންސްވެރިންނަށް ފާހަގަކުރެވުނު ގޮތުގައި އޯޓިސްޓިކް މީހުން ރުޅިވެރިކަމާއި، އުފާވެރިކަމާއި، އަދި ހިތާމަ ފަދަ އިހުސާސްތައް ފާޅުކުރަނީ އެހެން މީހުންނާ ތަފާތު ގޮތަކަށެވެ. ރުޅި އަންނަ ވަގުތު އޯޓިސްޓިކް ބައިވެރިން އަނގަޔަށް ގެންނަ ބަދަލުތައް ގިނަ ނަމަވެސް، ބުމަ ބޭނުންކުރާ މިންވަރު މަދެވެ. އެމީހުންގެ ހިނިތުންވުންތަކަކީ އާންމުކޮށް މަޑުމައިތިރި ހިނިތުންވުންތަކެކެވެ. ލޮލާއި ކޮލަށް ގެންނަ ހަރަކާތްތައް މަދުވުމުގެ ސަބަބުން، މޫނުގެ މަތީބައިން އުފާވެރިކަން ފެންނަނީ ވަރަށް ކުޑަކޮށެވެ. ހިތާމަ ފާޅުކުރާއިރު، މަތީ ތުންފަތަށް ގެންނަ ބޮޑު ބަދަލަކާއެކު އަނގަ ތިރިއަށް ލެނބޭ މިންވަރު އިތުރެވެ.
ޔުނިވަރސިޓީ އޮފް ބާމިންހަމްގެ ދިރާސާވެރިން ހާމަކުރި ގޮތުގައި، އޯޓިސްޓިކް މީހުންނާއި އޯޓިސްޓިކް ނޫން މީހުންނާ ދެމެދު އިހުސާސްތައް ދެނެގަތުމުގައި އޮޅުންއަރަނީ މި ތަފާތުތަކުގެ ސަބަބުންނެވެ. މިއީ ހަމައެކަނި އެއް ފަރާތަކަށް ދިމާވާ ދަތިކަމެއްގެ ބަދަލުގައި، ދެފަރާތުން ވެސް އެކަކު އަނެކަކުގެ މޫނުމަތީގެ ހަރަކާތްތައް ދެނެގަތުމުގައި ދިމާވާ ގޮންޖެހުމެއްކަން މި ހޯދުންތަކުން ހާމަވެއެވެ.
އޯޓިޒަމް ސްޕެކްޓްރަމް ޑިސްއޯޑަރގެ ސަބަބުން މުއާމަލާތް ކުރުމަށާއި، އިޖުތިމާއީ ގުޅުންތަކަށާއި، އަދި ހިއްސުތަކުން މައުލޫމާތު ނަގައިގަތުމަށް އަސަރުކުރެއެވެ. އަދި މީގެ އަލާމާތްތައް ކޮންމެ މީހެއްގެ ކިބައިގައިވެސް ހުންނަނީ ތަފާތު މިންވަރަކަށެވެ. 'އޯޓިޒަމް ރިސާޗް' މަޖައްލާގައި ޝާއިއުކޮށްފައިވާ މި ދިރާސާގައިވާ ގޮތުން، އޯޓިސްޓިކް ނޫން މީހުންނާ އަޅާބަލާއިރު، އޯޓިސްޓިކް މީހުންގެ މޫނުމަތީގެ ހަރަކާތްތަކަކީ ކޮންމެ މީހަކަށްވެސް ޚާއްޞަ، އަދި އެކަކު އަނެކަކާ އެއްގޮތްކަން ކުޑަ ހަރަކާތްތަކެކެވެ.
ދިރާސާވެރިން ވަނީ 'އެލެކްސިތައިމިއާ' އަށްވެސް ބަލާފައެވެ. މިއީ އަމިއްލަ އިހުސާސްތައް ދެނެގަތުމަށް ދަތިވާ ހާލަތެކެވެ. މި ހާލަތު އޯޓިސްޓިކް ބައިވެރިންގެ މެދުގައި އާންމެވެ. އެލެކްސިތައިމިއާގެ ސަބަބުން ތަފާތު އިހުސާސްތައް ވަކިކުރަން އުނދަގޫވި ނަމަވެސް، މީގެ ސީދާ ސަބަބަކީ އޯޓިޒަމެއް ނޫނެވެ.
އޯޓިސްޓިކް ބައިވެރިންނަށް ހަގީގީ އިންސާނުންގެ މޫނަށްވުރެ، ކޮމްޕިއުޓަރުން ތައްޔާރުކޮށްފައިވާ އާދައިގެ މޫނުތަކުން އިހުސާސްތައް ދެނެގަންނަން ފަސޭހަވިއެވެ. ދިރާސާވެރިން ގަބޫލުކުރާ ގޮތުގައި މީގެ ސަބަބަކީ އެމީހުންގެ އަމިއްލަ މޫނުމަތީގެ ހަރަކާތްތަކާއި އެހެން މީހުންގެ ހަރަކާތްތަކާ ދިމާނުވުމެވެ. އެހެންކަމުން، އެމީހުން އިހުސާސްތައް ދެނެގަތުމަށްޓަކައި އައި.ކިއު ފަދަ އާންމު ބުއްދީގެ ގާބިލުކަމަށް ބަރޯސާވާން ޖެހެއެވެ.
ޑރ. ކޮނަރ ކީޓިންގް ފާހަގަކުރެއްވި ގޮތުގައި، އޯޓިސްޓިކް މީހުންނާއި އޯޓިސްޓިކް ނޫން މީހުން ތަފާތުވަނީ ހަމައެކަނި މޫނުމަތީގެ ހަރަކާތްތައް ހުންނަ ގޮތަކުން ނޫނެވެ. އެ ހަރަކާތްތައް މޫނުމަތިން ފެންނަ އޮމާންމިނުގައިވެސް ތަފާތުތަކެއް ހުރެއެވެ. ޕްރޮފެސަރ ޖެނިފަރ ކުކް ފާހަގަކޮށްފައިވާ ގޮތުގައި، މި ހޯދުންތަކުގެ ސަބަބުން އިހުސާސްތައް ދެނެގަތުމުގެ ދަތިކަމަކީ ހަމައެކަނި އޯޓިސްޓިކް މީހުންނަށް އޮތް ކަމެއް ކަމަށް ބެލެވޭ ބެލުމަށް ބަދަލު އާދެއެވެ.
މި ދިރާސާގައި އުމުރާއި، ޖިންސާއި، އަދި އައި.ކިއު އެއްވަރުގެ 25 އޯޓިސްޓިކް ބޮޑެތި މީހުންނާއި 26 އޯޓިސްޓިކް ނޫން ބޮޑެތި މީހުން ބައިވެރިވިއެވެ. ބައިވެރިން ދެއްކި އެތައް ހާސް މޫނުމަތީގެ ހަރަކާތްތަކެއް، އެންމެ ޒަމާނީ ސޮފްޓްވެއަރ ބޭނުންކޮށްގެން ދިރާސާވެރިން ވަނީ ބަލާފައެވެ.
ދިރާސާ ކުރި ފަރާތްތަކުން ފާހަގަކުރި ގޮތުގައި، ގަސްދުގައި ދައްކާ މޫނުމަތީގެ ހަރަކާތްތަކާއި ގުދުރަތީ ގޮތުން އަންނަ ބަދަލުތައް ތަފާތުވެދާނެއެވެ. އެހެންކަމުން، ކުރިމަގުގައި ކުރެވޭ ދިރާސާތަކުގައި މި ތަފާތުތަކުގެ ސަބަބުން ހަގީގީ ދުނިޔޭގެ އިޖުތިމާއީ ގުޅުންތަކަށް ކުރާ އަސަރު ބަލަންޖެހެއެވެ.
އެމެރިކާގެ ސެންޓަރސް ފޯ ޑިޒީޒް ކޮންޓްރޯލް އެންޑް ޕްރިވެންޝަންގެ އެންމެ ފަހުގެ ތަފާސްހިސާބުތަކުން ދައްކާ ގޮތުގައި، ކޮންމެ 31 ކުއްޖަކުން އެކަކީ އޯޓިޒަމް ހުންނަ ކުއްޖެކެވެ. މިއީ އިހުސާސްތައް ފާޅުކުރުމުގައި އެކަކު އަނެކަކަށް އޮންނަ ތަފާތުތައް ދެނެގަތުމުގެ މުހިންމުކަން ހާމަކޮށްދޭ ކަމެކެވެ.
ރިފަރެންސް: ޑެއިލީމެއިލް (2026)