ޔޫރޯ ފުޓްބޯޅަ މުބާރާތުގައި ރޭ ސްޕެއިން އާއި ސްވިޑެން ބައްދަލުކުރި މެޗު 0-0 އިން އެއްވަރުވެ، ދެ ޓީމު ވެސް ޕޮއިންޓަކުން ފުއްދާލަން ޖެހިއްޖެއެވެ.

ރޭގެ މެޗަށް ނިކުތްއިރު ސްޕެއިނަށް ދިމާވެފައިވާ އެންމެ ބޮޑު މައްސަލަ އަކީ އެ ޓީމުގެ ކެޕްޓަން ސާޖިއޯ ބުސްކެޓްސް، ކޮވިޑް-19 އަށް ޕޮޒިޓިވްވެ އައިސޮލޭޝަނަށް ދާން ޖެހުމުން ރޭގެ މެޗުގައި ނުކުޅެވުމެވެ. ރޭގެ މެޗުގައި އެ ޓީމުގެ ކެޕްޓަންކަންކުރީ ބާސެލޯނާގެ ފުލްބެކް ޖޯޑީ އަލްބާ އެވެ.

ސެވިއްޔާގެ ލަ ކަރްޓޫހާ ސްޓޭޑިއަމްގައި ސްޕެއިނުގެ އަމިއްލަ ސަޕޯޓަރުންގެ ކުރިމަތީގައި ރޭ ކުޅުނު މި މެޗު ފެށިގެން ޑޮމިނޭޓްކުރަމުންދިޔައީ އެ ޓީމުންނެވެ. ފުރަތަމަ ހާފުގައި ސްޕެއިނުގެ ޑެނީ އޮލްމޯ ފޮނުވާލި ދެ ހަމަލާއެއް ސްވިޑެންގެ ކީޕަރު ރޮބިން އޯލްސަން މަތަކުރިއިރު، ސްވިޑެންގެ މާކަސް ޑެނިއަލްސަން އަށް ހެދުނު ގޯހަކުން ސްޕެއިނުގެ ފޯވާޑް އަލްވާރޯ މޮރާޓާ ފޮނުވާލި ބޯޅަ ދިޔައީ ދަނޑިކައިރިން ބޭރަށެވެ. މި ހާފުގައި ސްވިޑެން އަށް ލިބުނު އެންމެ ރަނގަޅު ފުރުޞަތުގައި ސްޕެނިޝް ލީގުގައި ރެއާލް ސޮސިއެޑާޑަށް ކުޅެމުން އަންނަ އަލެކްސެންޑަ އީސާކް ފޮނުވާލި ބޯޅަ ގޯލްގެ ރޮނގުމަތީން ސަލާމަތްކުރި މާކޯސް ލޮރެންޓޭ އެވެ. ދުވެލިބާރު އީސާކް ޖެހި ބޯޅަ ލޮރެންޓޭގެ ފައިގައި ޖެހިފައި އަމާޒުވީ ގޯލްގެ އަރިމަތީދަނޑިއަށެވެ.

ދެވަަނަ ހާފުގެ ކުޅުން ފަށައިގެން ސްޕެއިނުގެ ފޯވާޑް މޮރާޓާ އަށް ލިބުނު ފުރުޞަތުވެސް ބޭނުމެއް ނުކުރެވުނެވެ. އޭގެފަހުން، ސްވިޑެން އަށް ލީޑްނަގައިދޭން ހުސްކޮށް ހުރެ މާކަސް ބާގަށް ލިބުނު ފުރުޞަތުގައި ފޮނުވާލި ބޯޅަ ދިޔައީ ދަނޑިކައިރިން ބޭރަށެވެ. އަދި އޭގެފަހުން، ދެވަނަ ހާފުގައި ސްޕެއިންގެ ކޯޗު ލުއިސް އެންރީކޭ ގެނައި ބަދަލުތަކާއެކު އެޓޭކްތައް ކުރިއަށްވުރެ އިތުރުވި ނަމަވެސް ގޯލެއް ކާމިޔާބުކުރެވޭގޮތެއްނުވިއެވެ. މެޗުގެ ފަހުވަގުތު ކޮޅުގެ ތެރޭގައި ސްޕެއިނުގެ ފޯވާޑް ޖެރާޑް މޮރޭނޯ ބޮލުން ފޮނުވާލި ބޯޅަ ސްވިޑެންގެ ކީޕަރު އޯލްސަން މަތަކުރިއެވެ.