އޭ.ޑީ.އެޗް.ޑީ އަކީ އާންމުކޮށް ކުޑަކުދިންގެ ކިބައިން ފެންނަ، ސަމާލުކަން ދިނުމަށް ދަތިވުމާއި، ހަލަނިވުމުގެ އުނދަގޫތަކެއް ކުރިމަތިވާ ހާލަތެކެވެ. ގިނަ ބަޔަކު ގަބޫލުކުރާ ގޮތުގައި މިއީ ހަމައެކަނި ކިޔެވުމަށާއި، އަހުލާގަށް ނުވަތަ ސުލޫކަށް ބުރޫއަރުވާ ކަމެކެވެ. ނަމަވެސް، ދާދި ފަހުން ކުރެވުނު ދިގު މުއްދަތުގެ ދިރާސާތަކުން ދައްކާގޮތުގައި، ކުޑައިރު އޭ.ޑީ.އެޗް.ޑީގެ ސިފަތައް ހުންނަ ކުދިން ބޮޑުވުމުން އެކަމުގެ ނޭދެވޭ އަސަރު އެކުދިންގެ މުޅި ސިއްހަތަށް އިންތިހާއަށް ކުރެއެވެ.
އެތައް އަހަރަކަށް ދެމިގެންދިޔަ މި ފުޅާ ދިރާސާގެ ނަތީޖާތަކުން ހާމަވާގޮތުގައި، ކުޑައިރު އޭ.ޑީ.އެޗް.ޑީގެ އަލާމާތްތައް ފެންނަ ކުދިންނަށް ބޮޑުވުމުން ދިމާވާ ސިއްހީ މައްސަލަތައް ހަމައެކަނި ކްލާސްރޫމުގެ މާހައުލަކަށް ނުވަތަ އިޖުތިމާއީ ގުޅުންތަކަކަށް ހަނިވެފައެއް ނުވެއެވެ. މި ސިފަތަކުގެ ސަބަބުން މީހާގެ ހަށިގަނޑުގެ ދުޅަހެޔޮކަމަށް ދުރު މުއްދަތުގައި ބޮޑެތި ގޮންޖެހުންތަކެއް ކުރިމަތިވެއެވެ. މީގެ ތެރޭގައި ހިތުގެ ބަލިތަކާއި، ހަކުރު ބައްޔާއި، މެޓަބޮލިކް ނިޒާމަށް ދިމާވާ އެކި މައްސަލަތައް ހިމެނެއެވެ.
މިކަން މިހެން ދިމާވާ އެއް ސަބަބަކީ އޭ.ޑީ.އެޗް.ޑީގެ ސަބަބުން ދިރިއުޅުމުގެ އާދަކާދަތަކަށް އަންނަ ބަދަލުތަކެވެ. މިސާލަކަށް، މިފަދަ ކުދިން ބޮޑުވަމުން އަންނައިރު ނިދުމުގެ މައްސަލަތަކާއި، ކެއުމުގެ ނޭދެވޭ އާދަތަކުގެ އިތުރުން ނަފްސާނީ ދުުޅަހެޔޮކަން ކުޑަވުމުގެ ފުރުސަތު ބޮޑެވެ. މި ކަންކަމަކީ އިންސާނާގެ ޖިސްމާނީ ދުޅަހެޔޮކަމާ ސީދާ ގުޅިފައިވާ ކަންކަމެވެ. މީގެ އިތުރުން، އޭ.ޑީ.އެޗް.ޑީގެ ސިފަތައް ހުންނަ މީހުންނަށް ދިރިއުޅުމުގެ ކަންކަން ރޭވުމުގައާއި ކަންކަމަށް އިޖާބަދިނުމުގައި ދަތިތަކެއް ހުރުމަކީ، ސިއްހީ ގޮތުން ރަނގަޅު ނިންމުންތައް ނިންމުމަށް އެޅޭ ހުރަހަކަށް ވެދެއެވެ.
މި ދިރާސާގެ އަލީގައި ސިއްހީ މާހިރުން ބާރުއަޅުއްވަނީ، އޭ.ޑީ.އެޗް.ޑީއަކީ ހަމައެކަނި "ހަލަނި" ކުދިންގެ ކިބައިން ފެންނަ ސިފައެއްގެ ގޮތުގައި ދެކުމުގެ ބަދަލުގައި، އެއީ މުޅި އުމުރަށް މީހާގެ ސިއްހަތަށް އަސަރުކޮށްފާނެ ކަމެއްގެ ގޮތުގައި ބަލައިގަތުމަށެވެ. އެހެންކަމުން، ކުޑައިރުއްސުރެ މިފަދަ ކުދިންނަށް ބޭނުންވާ އެހީތެރިކަމާއި، ލަފައާއި، ފަރުވާ ދިނުމަކީ ބޮޑުވުމުން ދިމާވެދާނެ ސިއްހީ ބޮޑެތި މައްސަލަތަކުން ރައްކާތެރިވުމަށް އެޅޭ މުހިންމު ފިޔަވަޅެކެވެ.
އޭ.ޑީ.އެޗް.ޑީގެ ސިފަތަކަކީ ހަމައެކަނި ކިޔެވުމުގައި ދިމާވާ ގޮންޖެހުމެއް ނޫނެވެ. އެއީ މީހާގެ މުޅި ދިރިއުޅުމުގެ ފެންވަރާއި، ދުޅަހެޔޮކަމާ ގުޅިފައިވާ ސިއްހީ ހާލަތެކެވެ. މިކަމަށް މުޖުތަމައު ހޭލުންތެރިވެ، އަވަސް ފުރުސަތެއްގައި އެހީތެރިކަން ފޯރުކޮށްދިނުމަކީ ދުޅަހެޔޮ ޖީލެއް ބިނާކުރުމަށް ކޮންމެހެން ބޭނުންތެރި ކަމެކެވެ.
ހަވާލާ: ސައިންސް ޑެއިލީ 2026