މިއަދުގެ ދުނިޔެއަކީ ޓެކްނޮލޮޖީ އާއި ސޯޝަލް މީޑިއާގެ ވަސީލަތްތަކުން އިންސާނާގެ ދިރިއުޅުން ފުރިފައިވާ ދުނިޔެއެކެވެ. މީގެ ތެރެއިންވެސް، ހާއްސަކޮށް ޒުވާނުންގެ މެދުގައި އެންމެ މަގުބޫލު އެއް ކަމަކީ "ސްނެޕްޗެޓް ސްޓްރީކް" ހިފެހެއްޓުމެވެ. ކޮންމެ ދުވަހަކު މެދުނުކެނޑި އެކަކު އަނެކަކަށް ފޮޓޯއެއް ނުވަތަ ވީޑިއޯއެއް ފޮނުވައިގެން އެ ހޯދާ "ސްޓްރީކް" އަކީ ގިނަ ކުދިންގެ ނަޒަރުގައި ވަރަށް މުހިންމު ކަމެކެވެ. ނަމަވެސް، މި ދުނިޔެވީ "ސްޓްރީކް" ދަމަހައްޓަން ކުރާ މަސައްކަތާއި، ދޭ ސަމާލުކަން އާޚިރަތުގެ ބާއްޖަވެރިކަމަށްޓަކައި ކުރަންޖެހޭ "ނަމާދު ސްޓްރީކް" އަށް ނުދެވޭކަމީ ހިތާމަހުރި ކަމެކެވެ.
ސްނެޕްޗެޓް ސްޓްރީކެއް ގެއްލިދާނެތީ ގިނަ ކުދިން ތިބެނީ ވަރަށް ބޮޑަށް ސަމާލުވެގެންނެވެ. ދަތުރެއްގައި އުޅުނަސް، ބަލިވެ އުޅުނަސް ނުވަތަ ކިތަންމެ ބުރަކޮށް އުޅުނަސް އެ ސްޓްރީކް ކެނޑުނަ ނުދިނުމަށްޓަކައި ވަގުތު ހޯދައެވެ. އެކަމަކު، ހަމަ އެ ސަމާލުކަން ދުވާލަކު ފަސް ފަހަރު ކުރަންޖެހޭ ނަމާދަށް ދެވޭބާވައެވެ؟ ފަތިސް ނަމާދަށް ހޭނުލެވި، ނުވަތަ ބުރަ މަސައްކަތެއްގައި އުޅެނިކޮށް ނަމާދު ވަގުތު ފާއިތުވެގެންދާއިރު، އެ ގެއްލުނު "ނަމާދު ސްޓްރީކް" އާ މެދު އަޅުގަނޑުމެންގެ ހިތުގައި ހިތާމައެއް އުފެދޭބާވައެވެ؟
ސްނެޕް ސްޓްރީކަކީ ހަމައެކަނި ފޯނުގެ ސްކްރީނުން ފެންނަ ނަންބަރެކެވެ. އޭގެން ދުނިޔަވީ ގޮތުންވެސް އަދި އާޚިރަތުގެ ގޮތުންވެސް ކުރާނެ އެއްވެސް ފައިދާއެއް ނެތެވެ. އެހެނަސް، ނަމާދަކީ މުސްލިމަކާއި ކާފަރަކާ ދެމެދުގައިވާ ފަރަގެވެ. މިއީ އަޅާ އާއި އޭނާ ހެއްދެވި ފަރާތާ ދެމެދުގައި އޮންނަ ގުޅުމެވެ. ނަމާދު މެދުނުކެނޑި ކުރުމަކީ ނަފްސަށް ހިތްހަމަޖެހުން ލިބި، ދިރިއުޅުމުގައި ބަރަކާތް އިތުރުވެގެންދާނެ ކަމެކެވެ. ޤިޔާމަތް ދުވަހުން އެންމެ ފުރަތަމަ ސުވާލު ކުރެވޭނީވެސް ނަމާދާ މެދުގައެވެ. އެހެންކަމުން، އެންމެ މުހިންމު "ސްޓްރީކް" އަކީ ނަމާދުކަން ކަށަވަރެވެ.
ދުނިޔެވީ ކަންކަމުގައި އަވަދިނެތި އުޅޭއިރު، ޝައިތާނާ އަޅުގަނޑުމެންނަށް ދައްކަނީ މިފަދަ ބޭކާރު ކަންކަމުގެ މުހިންމުކަމެވެ. ސްޓްރީކް ގެއްލިއްޖެނަމަ އެކަމާ ދެރަވެ، އަލުން އެ ސްޓްރީކް ފެށުމަށް އަޒުމް ކަނޑައަޅާއިރު، ނަމާދުތައް ގަަވާއިދުން ކުރުމަށް އެފަދަ އަޒުމެއް ކަނޑަނޭޅޭނީ ކީއްވެގެންތޯ އަމިއްލަ ނަފްސާ ސުވާލުކޮށްލަން ޖެހެއެވެ.
ވިސްނާލަންޖެހޭ ކަމަކީ، ސްނެޕް ސްޓްރީކަށްވުރެ ބޮޑަށް ނަމާދުގެ "ސްޓްރީކް" އަށް ސަމާލުކަން ދޭން ދަސްކުރަން ޖެހޭކަމެވެ. ފޯނުގެ ނޮޓިފިކޭޝަނަށް އިޖާބަދޭ ފަދައިން، ބަންގީގެ އަޑަށް އިޖާބަދީ މިސްކިތަށް ދިއުމަށް ނުވަތަ ނަމާދު ގާއިމުކުރުމަށް އަވަސްވެގަންނަން ޖެހެއެވެ. މަރުވުމަށްފަހު އަޅުގަނޑުމެންނާއެކު ދާނީ އަޅުގަނޑުމެން ކުރި ހެޔޮ އަމަލުތަކެވެ. އެދުވަހުން ސްނެޕްޗެޓް ސްޓްރީކްގެ އެއްވެސް ބޭނުމެއް ނޯންނާނެއެވެ. އެހެންކަމުން، މިއަދުން މިއަދަށް އަޅުގަނޑުމެންގެ އިސްކަންދޭ ތަރުތީބު ބަދަލުކޮށް، ނަމާދަކީ ދިރިއުޅުމުގެ އެންމެ މުހިންމު "ސްޓްރީކް" ކަމުގައި ހަދަމާ ހިނގާށެވެ.