ކައިވެނީގެ ގުޅުމަކީ ލޯތްބާއި އޯގާތެރިކަމުގެ މައްޗަށް ބިނާވެފައިވާ މާތް ގުޅުމެކެވެ. ނަމަވެސް މުޖުތަމައުގައި ބައެއް ފަހަރު "ކިޔަމަންތެރި އަނބިމީހާ" ގެ މާނަ ނަގަނީ ވަރަށް ހަނި އަދި ގޯސް ގޮތަކަށެވެ. ގިނަ ބަޔަކު ހީކުރާ ގޮތުގައި ކިޔަމަންތެރިވުމަކީ ފިރިމީހާ ބުނާހާ ގޮތަކަށް ހަދައިގެން، އަމިއްލަ ޝަހުސިއްޔަތެއް ނެތި، އަޅެއް ފަދައިން އުޅުމެވެ. ނަމަވެސް އިސްލާމްދީނުގައި އަންހެނުންނަށް ދީފައިވާ މަތިވެރި މަގާމާއި ހައްގުތަކަށް ބަލާއިރު މިއީ މުޅިން ކުށް ހީއެކެވެ.
އިސްލާމްދީނުގައި އަނބިމީހާ ފިރިމީހާއަށް ކިޔަމަންވާން ޖެހޭނެ ކަމަށް އަންގަވާފައި އޮތުމުގެ މާނައަކީ އަނބިމީހާގެ އަމިއްލަ ނަފްސުގެ އިހުތިރާމް ގެއްލުވާލުމެއް ނޫނެވެ. އެ ކިޔަމަންތެރިކަމަކީ "ހެޔޮ ކަންކަމުގައި" ވާ ކިޔަމަންތެރިކަމެކެވެ. ދީނުގައި ކަނޑައަޅާފައިވާ އުސޫލަކީ، ﷲ އަށް އުރެދުމެއް ވާ ކަމެއްގައި ފިރިމީހާއަށް، އަދި އެހެން މީހަކަށް ވެސް ކިޔަމަންވުމެއް ނެތް ކަމެވެ. އެހެންކަމުން، ފިރިމީހާ ނުބައި ކަމަކަށް އަމުރުކުރިޔަސް، ނުވަތަ އަނބިމީހާގެ ހައްގަކަށް އަރައިގަތަސް، އެކަމަށް ބޯލެނބުމަކީ ކިޔަމަންތެރިކަމެއް ނޫނެވެ.
ކައިވެންޏެއްގައި ފިރިމީހާއަށް ޒިންމާތަކެއް ހަވާލުކޮށްފައިވަނީ އާއިލާގެ ހިމާޔަތާއި ރައްކާތެރިކަން ކަށަވަރުކުރުމަށެވެ. މީގެ މާނައަކީ ފިރިމީހާއަކީ އަނބިމީހާގެ މައްޗަށް ހުރި ވެރިއެއްގެ ގޮތުގައި، ގޭތެރޭގެ ކަންކަމުގައި މަޝްވަރާކުރުމެއް ނެތި އަމުރު ހިންގުމެއް ނޫނެވެ. ރަސޫލާގެ ސީރަތުން ފެންނަން އޮތީ އެކަލޭގެފާނު އަނބިއަނބިކަނބަލުންނާ މަޝްވަރާކުރައްވައި، އެކަނބަލުންގެ ހިޔާލުފުޅުތަކަށް އިހުތިރާމް ކުރެއްވި ތަނެވެ. ހަގީގީ ލީޑަރަކީ އަނެކުންގެ އަޑު އަހައި، އޯގާތެރިކަމާއެކު ކަންކަން ނިންމާ މީހާއެވެ.
ކިޔަމަންތެރިވުމޭ ބުނުމުން، އެއީ ހަމައެކަނި އަނބިމީހާ އަދާކުރަން ޖެހޭ ވާޖިބެއްގެ ގޮތުގައި ދެކުމަކީ ވެސް ގޯހެކެވެ. ފިރިމީހާގެ މައްޗަށް އަނބިމީހާގެ ހައްގުތަކެއް ވާ ފަދައިން، އަނބިމީހާގެ މައްޗަށް ފިރިމީހާގެ ހައްގުތަކެއް ވެއެވެ. ގެއެއްގެ ހަމަޖެހުން އަންނަނީ ދެ ފަރާތުން ވެސް މި ހައްގުތަކާއި ވާޖިބުތައް އަދާކޮށްގެންނެވެ. އެހެންކަމުން، ހަގީގީ ކިޔަމަންތެރިކަމަކީ ބިރުން ނުވަތަ މަޖުބޫރުން ކުރާ ކަމެއް ނޫނެވެ. އެއީ ދެމަފިރިންގެ ދެމެދުގައި އޮންނަ ލޯތްބާއި އިހުތިރާމުގެ ސަބަބުން އުފެދިގެން އަންނަ ގުޅުމެކެވެ. ފިރިމީހާގެ ފައިބުޑަށް ވެއްޓި، އަމިއްލަ ނަފްސުގެ އަގު ވައްޓާލުމަކީ ދީން ބާރުއަޅާ ގޮތެއް ނޫނެވެ.