މުސްލިމުންގެ ހައިސިއްޔަތުން ޖިންނި ޝައިތާނުންނަކީ ވުޖޫދުގައިވާ ބައެއްކަން އަހަރެމެން އެންމެން ވެސް ގަބޫލުކުރަމެވެ. އަދި ބައެއް ފަހަރު އިންސާނުން ދިރިއުޅޭ ގެތަކުގައި މިފަދަ މަހުލޫގުން އުޅުމަކީ ވެދާނެ ކަމެކެވެ. ދީނީ އިލްމުވެރިން ހާމަކުރައްވާ ގޮތުގައި ގޭތެރޭގައި ޝައިތާނުން އުޅޭނަމަ ފެނިދާނެ ބައެއް އަލާމާތްތައް ހުރެއެވެ. މީގެ ތެރެއިން ފަސް ކަމެއް ފާހަގަކޮށްލެވޭއިރު، މިއީ ހަމައެކަނި ޝައްކުތަކެއްގެ މައްޗަށް ބިނާކޮށް ބިރުގަންނަން ޖެހޭ ކަންކަމެއް ނޫނެވެ.
އެންމެ އާންމު އެއް އަލާމާތަކީ ގޭތެރެއިން ސަބަބެއް ނޭނގޭ ނުބައި ވަސް ދުވުމެވެ. ގޭތެރެ ކިތަންމެ ސާފުކޮށް ބެލެހެއްޓި ނަމަވެސް، ކުނިވެފައިވާ އެއްޗެއްގެ ވަސް ނުވަތަ އެނޫން ވެސް ނުބައި ވަހެއް ގޭގެ ވަކި ތަނަކުން ދުވުމަކީ ވެދާނެ ކަމެކެވެ. އަދި މީގެ އިތުރުން ގޭތެރޭގައި ހުންނަ ތަކެތި އަމިއްލައަށް ބަދަލުވުމާއި، ބަހައްޓާ ތަނުން ގެއްލުމަށްފަހު ފަހުން ފެނުން ފަދަ ކަންކަން މެދުވެރިވުމަކީ ވެސް ފާހަގަކުރެވޭ ކަމެކެވެ.
ތިން ވަނަ ކަމަކަށް ފާހަގަކުރެވެނީ ގޭތެރޭގައި ދިރިއުޅޭ މީހުންނަށް ނަފްސާނީ ގޮތުން ކުރެވޭ އިހުސާސްތަކެވެ. އެގޮތުން ގޭގައި އެކަނި އުޅޭ ވަގުތު މީހަކު ބަލަން ހުންނަ ކަމުގެ އިހުސާސްވުމާއި، ސަބަބެއް ނެތި މޭ ނުބައިކުރުމާއި ބޮލަށް ބަރުވުން ހިމެނެއެވެ. އަދި ހަތަރުވަނަ ކަމަކަށް، ރޭގަނޑު ނިދާއިރު ބިރުވެރި ހުވަފެން ފެނުމާއި، ނިދީގައި ހަޅޭއްލެވުމާއި ނޭވާ ހާސްވުން ފަދަ ކަންކަން ތަކުރާރުވުމަކީ ވެސް ޝައިތާނާގެ އުނދަގޫ ޖެހިފައިވާކަމުގެ ނިޝާނަކަށް ވެދާނެއެވެ.
އެންމެ ނުރައްކާތެރި އަދި ފަސް ވަނަ އަލާމާތަކީ ގޭތެރޭގައި ޒުވާބު ގިނަވުމެވެ. ޝައިތާނާ އެންމެ ބޭނުންވާނެ އެއް ކަމަކީ އާއިލާގެ ގުޅުން ކަނޑާލައި ފިތުނަ އުފެއްދުމެވެ. އެހެންކަމުން ކުދިކުދި ކަންކަމާ ދެމަފިރިންގެ މެދުގައި ނުވަތަ އާއިލާ މެމްބަރުންގެ މެދުގައި އަބަދު ޒުވާބު ހިނގައި، ރުޅިވެރިކަން އުފެދޭނަމަ އެއީ ޝައިތާނާގެ ނުފޫޒެއް ކަމަށް ވެދާނެއެވެ.
މިފަދަ ކަންކަމުން ސަލާމަތްވުމަށް އޮތް އެންމެ ބޮޑު ހައްލަކީ ގޭގައި ގުރުއާން ކިޔެވުމެވެ. ރަސޫލާ ހަދީސްކުރައްވާފައިވާ ގޮތުގައި ބަގަރާ ސޫރަތް ކިޔަވާ ގެއަކަށް ޝައިތާނާ ނުވަންނާނެއެވެ. އަދި ގެއަށް ވަންނައިރުއާއި ކާއިރު ބިސްމި ކިޔުމަށާއި، ގޭތެރެ ސާފުތާހިރުކޮށް ބެހެއްޓުމަށް އިސްލާމްދީން ބާރުއަޅައެވެ. ބިރުގަތުމުގެ ބަދަލުގައި الله އަށް ވަކީލުކޮށް ޒިކުރުތައް ކިޔުމަކީ ރައްކާތެރިކަން ލިބޭނެ ކަމެކެވެ.