މިހާރު ކުޅެމުންދާ ޔޫރޯ ފުޓްބޯޅަ މުބާރާތުގައި ރޭ ކުޅުނު މެޗުގައި ސްވިޒަލޭންޑް އަތުން 3-0 އިން ހޯދީ މޮޅާއެކު އިޓަލީ އިން އެ މުބާރާތުގެ ދެވަނަ ބުރުން ޖާގަ ހޯދައިފިއެވެ.

މި މެޗާއެކު އިޓަލީ އިން ވަނީ ބަލިނުވެ 29 މެޗު ހަމަކޮށްފައެވެ. އަދި އެ ޓީމު އެންމެ ފަހުން ކުޅުނު 10 މެޗުން ވެސް މޮޅުވިއިރު، ބައިކޮޅަށް އެންމެ ލަނޑެއްވެސް ވަދެފައެއްނުވެއެވެ. މީގެއިތުރުން، ސްވިޒަލޭންޑާ ދެކޮޅަށް އިޓަލީ އެންމެ ފަހުން ކުޅުނު ނުވަ މެޗުން ވެސް ބަލިވެފައެއްނުވެއެވެ.

ރޭގެ ނަތީޖާއާއެކު އިޓަލީ އިން ވަނީ ގްރޫޕް ސްޓޭޖުގައި މިހާތަނަށް ކުޅުނު ދެ މެޗުން ހަ ޕޮއިންޓް ހޯދައި، ތާވަލްގެ އެއްވަނަ އަށް ޖެހިލާފައެވެ. އޭގެ ދެ ޕޮއިންޓް ފަހަތުން ދެވަނައިގައި އޮތީ ވޭލްސް އެވެ. ތިންވަނައިގައި އެއް ޕޮއިންޓާއެކު ސްވިޒަލޭންޑް އޮތްއިރު، އެންމެ ފުލުގައި އޮތް ތުރުކީ އަށް އަދި ޕޮއިންޓެއް ނުލިބެއެވެ.

ރޯމްގެ އޮލިމްޕިކް ސްޓޭޑިއަމްގައި އަމިއްލަ ސަޕޯޓަރުންގެ ކުރިމަތީގައި ރޭ ކުޅުނު މި މެޗުގައި އިޓަލީ އިން ޖެހި ތިން ލަނޑުގެ ތެރެއިން ދެ ގޯލްޖެހީ ފުރަތަމަ ހާފުގައެވެ. މެޗުގެ 26 ވަނަ މިނެޓުގައި އެ ޓީމަށް މިލަނޑުޖަހައިދިނީ ސަސުއޯލޯގެ މިޑްފީލްޑަރު މެނުއަލް ލޮކަޓެއްލީ އެވެ. މިއީ އެ ޓީމުގެ ވިންގަށް ކުޅެމުންދިޔަ ޑޮމެނިކޯ ބެރާޑީ ނަގައިދިން ހުރަހަކުން ލޮކަޓެއްލީ ކާމިޔާބުކުރި ގޯލެކެވެ.

މި މެޗުގައި އިޓަލީ އިން ޖެހި ދެވަނަ ލަނޑު، ފަހު ހާފުގެ ކުޅުން ފެށިތާ ހަތްވަނަ މިނެޓުގައި ކާމިޔާބުކޮށްދިނީ ވެސް ލޮކަޓެއްލީ އެވެ. އޭނާ މި ލަނޑުޖެހީ އިންޓަ މިލާންގެ މިޑްފީލްޑަރު ނިކޯލޯ ބަރޭލާ ދިން ބޯޅައަކުންނެވެ. އޭގެފަހުން، މެޗު ނިމެން މިނެޓަކަށްވެފައިވަނިކޮށް އެ ޓީމުގެ ފަހު ލަނޑުޖަހައިދިނީ ލާޒިއޯގެ އިތުބާރު ފޯވާޑް ޗީރޯ އިމޯބިލޭ އެވެ. މިއީ ސްވިޒަލޭންޑްގެ ކުޅުންތެރިންނަށް ހެދުނު ގޯހެއްގެ ފައިދާނަގައި ފަހު ހާފުގައި ކުޅެން ނިކުތް ރަފައެލް ޓޮލޯއީ ދިން ބޯޅައަކުން އިމޯބިލޭ ކާމިޔާބުކުރި ގޯލެކެވެ.

މި މުބާރާތުގައި މިއަދު ކުޅުމަށް ހަމަޖެހިފައިވާ މެޗުތަކުގެ ތެރޭގައި، ޔޫކްރޭނާ ދެކޮޅަށް ނޯތު މެސެޑޯނިއާ ނިކުންނައިރު ބެލްޖިއަމް ނިކުންނާނީ ޑެންމާކާ ދެކޮޅަށެވެ. އަދި މިއަދުގެ ފަހު މެޗުގައި އޮސްޓްރިއާ ނިކުންނާނީ ނެދަލެންޑްސްއާ ދެކޮޅަށެވެ.