އިންޑިއާގެ 77 ވަނަ ޖުމްހޫރީ ދުވަހުގެ މުނާސަބަތުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ފޮނުއްވި ތަހުނިޔާގެ މެސެޖަށް ޝުކުރު އަދާކުރައްވައި، އިންޑިއާގެ ޕްރައިމް މިނިސްޓަރު ނަރެންދުރަ މޯދީ ދިވެހި ބަހުން ޓުވީޓެއް ކުރައްވައިފިއެވެ.

ރައީސް މުއިއްޒު ސޯޝަލް މީޑިއާ ޕްލެޓްފޯމް "އެކްސް" ގައި ކުރެއްވި ޕޯސްޓެއްގައި ވަނީ އިންޑިއާގެ ރައީސް ދުރޫޕަދީ މުރުމޫ އާއި ޕްރައިމް މިނިސްޓަރު މޯދީއަށް އަދި އިންޑިއާގެ ރައްޔިތުންނަށް ޖުމްހޫރީ ދުވަހުގެ ހޫނު ތަހުނިޔާ އާއި ހެޔޮއެދުންތައް ފޮނުއްވާފައެވެ.

މި މެސެޖަށް ޖަވާބު ދެއްވަމުން މޯދީ "އެކްސް" ގައި ކުރެއްވި ޕޯސްޓު ލިޔުއްވާފައިވަނީ ދިވެހި ބަހުންނެވެ. އެ ޕޯސްޓުގައި މޯދީ ވިދާޅުވީ ރައީސް މުއިއްޒު އަރިސްކުރެއްވި ހޫނު ތަހުނިޔާ އާއި ހެޔޮއެދުންތައް އިހުތިރާމާ އެކު ބަލައިގަންނަ ކަމަށެވެ. އަދި ރައީސް މުއިއްޒަށް އެމަނިކުފާނު ޝުކުރު އަދާކުރައްވާފައިވެއެވެ.

މޯދީގެ މެސެޖުގައި އިތުރަށް ވިދާޅުވީ ދެ ގައުމުގެ ރައްޔިތުންގެ މަންފާއަށްޓަކައި އެކުގައި ކުރަމުންދާ މަސައްކަތްތައް ކުރިއަށް ގެންދަވާނެ ކަމަށެވެ. މީގެ އިތުރުން އެމަނިކުފާނު ވަނީ އެންމެހާ ދިވެހި ރައްޔިތުންނަށް ވެސް ދުވަހުގެ ހެޔޮއެދުންތައް ފޮނުއްވާފައެވެ.

އިންޑިއާގެ 77 ވަނަ ޖުމްހޫރީ ދުވަސް ފާހަގަކޮށްފައިވަނީ އިއްޔެއެވެ. މި ދުވަހުގެ މުނާސަބަތުގައި ދުނިޔޭގެ އެކި ގައުމުތަކުގެ ލީޑަރުން ވަނީ އިންޑިއާގެ ސަރުކާރަށާއި ރައްޔިތުންނަށް ތަހުނިޔާ ފޮނުއްވާފައެވެ.