ދުނިޔޭގެ އެންމެ މަގުބޫލު އެއް ސޯޝަލް މީޑިއާ ތަރި، ސެނެގޯލްއަށް އުފަން ކަބީ ލޭމް، އޭނާގެ ކުންފުނި ކަމަށްވާ "ސްޓެޕް ޑިސްޓިންކްޓިވް ލިމިޓެޑް" 900 މިލިއަން އެމެރިކާ ޑޮލަރަށް ވިއްކާލައިފިއެވެ. މިއީ ޑިޖިޓަލް ކޮންޓެންޓް އުފައްދާ ފަރާތަކުން މިހާތަނަށް ހިންގި އެންމެ ބޮޑު އެއް ވިޔަފާރި މުޢާމަލާތެވެ.
ބިޒްނަސް އިންސައިޑަރ އެފްރިކާއިން ރިޕޯޓްކޮށްފައިވާ ގޮތުގައި، ކަބީ މި ކުންފުނި ވިއްކާލާފައިވަނީ އެމެރިކާގެ ހިއްސާގެ ބާޒާރުގައި ލިސްޓުކޮށްފައިވާ ކުންފުންޏެއް ކަމަށްވާ "ރިޗް ސްޕާކްލް ހޯލްޑިންގްސް" އަށެވެ. މި އެއްބަސްވުމުގެ ދަށުން، ކުރިއަށް އޮތް 36 މަސްދުވަހު ކަބީ ލޭމްގެ ދުނިޔޭގެ ހުރިހާ ވިޔަފާރި ހަރަކާތްތަކެއް ހިންގުމުގެ އެކްސްކްލޫސިވް ރައިޓްސް ނުވަތަ ޚާއްޞަ އިޚްތިޔާރު އޮންނާނީ އެ ކުންފުންޏަށެވެ. މިއީ އަމިއްލަ ކޮންޓެންޓް އުފައްދާ ފަރާތްތައް، ބޮޑެތި ވިޔަފާރި ނިޒާމުތަކަކަށް ބަދަލުވަމުންދާކަމުގެ ހެއްކެކެވެ.
މި މުޢާމަލާތުގެ އެންމެ ފާހަގަކޮށްލެވޭ އެއް ބަޔަކީ، އާޓިފިޝަލް އިންޓެލިޖެންސް (އޭއައި) ބޭނުންކޮށްގެން ކަބީ ލޭމްގެ "ޑިޖިޓަލް ޓްވިން" ނުވަތަ އޭއައި ނަފްސެެއް އުފެއްދުމަށް ނިންމާފައިވާ ނިންމުމެވެ. މީގެ ސަބަބުން އޭނާއަށް އެކި ބަސްބަހުން ކޮންޓެންޓް އުފެއްދުމާއި، 24 ގަޑިއިރު އޮންލައިންކޮށް ހަރަކާތްތެރިވެ، ވަޗުއަލް ލައިވް ސްޓްރީމްތައް ކުރިއަށް ގެންދިއުމުގެ ފުރުޞަތު ލިބޭނެއެވެ.
ރިޗް ސްޕާކްލް ހޯލްޑިންގްސްގެ އަމާޒަކީ ކަބީގެ ވިޔަފާރި ދުނިޔޭގެ އެކި ކަންކޮޅުތަކަށް ފުޅާކޮށް، އަހަރަކު 4 ބިލިއަން ޑޮލަރުގެ އާމްދަނީއެއް ހޯދާ ފެންވަރަށް ވިޔަފާރި ތަރައްޤީކުރުމެވެ. މީގެ ތެރޭގައި ރީތިވުމަށް ބޭނުންކުރާ ސާމާނާއި، ސެންޓު އަދި ފެޝަންގެ ދާއިރާއިން ޚާއްޞަ ބްރޭންޑްތައް އުފެއްދުން ހިމެނެއެވެ.
އުމުރުން 26 އަހަރުގެ ކަބީ ލޭމް މަޝްހޫރުވެފައިވަނީ އިންޓަނެޓުގައި މީހުން ކުރާ ބޭކާރު އަދި އުނދަގޫ ކަންކަމަށް، އެއްވެސް ވާހަކައެއް ނުދައްކައި ސަމާސާ ގޮތަކަށް ރައްދުދޭ ކުރު ވީޑިއޯތަކުންނެވެ. އޭނާގެ މި ސާދާ ހުނަރުގެ ސަބަބުން ދުނިޔޭގެ އެކި ބަސްބަހުން ވާހަކަދައްކާ މީހުންގެ މެދުގައި އޭނާ ވަނީ ބޮޑު މަގުބޫލުކަމެއް ހޯދާފައެވެ.
ކުންފުނި ވިއްކާލި ނަމަވެސް، ސޯޝަލް މީޑިއާގައި 360 މިލިއަނަށްވުރެ ގިނަ ފޮލޯވަރުން ތިބި ކަބީ އަކީ މިހާރު ރިޗް ސްޕާކްލް ހޯލްޑިންގްސްގެ ކޮންޓްރޯލިންގ ހިއްސާދާރެކެވެ. އެހެންކަމުން އޭނާއަކީ ހަމައެކަނި ބްރޭންޑްގެ މޫނުމަތީގެ އިތުރުން، ވިޔަފާރީގެ މުހިންމު ވެރިއެއްވެސްމެއެވެ.
މީގެ ދެ އަހަރު ކުރިން "00Khaby" ނަމަކަށް ކިޔާ އެކްޝަން-ކޮމެޑީ ފިލްމަކުން ހޮލީވުޑަށްވެސް ތަޢާރަފްވެފައިވާ ކަބީގެ މި ވިޔަފާރި މުޢާމަލާތާ ގުޅޭގޮތުން ކުންފުނިން ބުނީ، މިއީ ހަމައެކަނި ވިޔަފާރިއެއް ނޫން ކަމަށާއި، މިއީ ދުނިޔޭގެ ކޮންޓެންޓް އުފެއްދުމާއި އީ-ކޮމާސް މޮޑެލްއަށް އަންނާނެ އިންގިލާބެއް ކަމަށެވެ.