ޔޫރޯ ފުޓްބޯޅަ މުބާރާތުގައި ރޭގެ މެޗުގެ ފަހު ހާފުގައި ކުޅެން ނިކުތް ކެވިން ޑިބްރޭނާ ވައްދާލި ލަނޑާއެކު ބެލްޖިއަމުން ފަހަތުންއަރައި 2-1 އިން ޑެންމާކް ބަލިކޮށް ދެވަނަ ބުރުން ޖާގަ ހޯދިއިރު، ގްރޫޕް ސީ ގައި ރޭ އޮސްޓްރިއާ އަތުން 2-0 އިން ހޯދީ މޮޅާއެކު ނެދަލެންޑްސް ވަނީ އެ ގްރޫޕުގެ އެއްވަނަ މަގާމް ކަށަވަރުކޮށް ދެވަނަ ބުރަށް ދަތުރުކޮށްފައެވެ.

މިއީ 13 އަހަރުގެ ތެރޭގައި ނެދަލެންޑްސް އިން ޔޫރޯގެ ދެވަނަ ބުރަށް ދަތުރުކުރި ފުރަތަމަ ފަހަރެވެ. އަދި ރޭގެ މެޗަކީ ޑެންމާކް އަތުން ބެލްޖިއަމުން ޖެހިޖެހިގެން މޮޅުވި ތިންވަނަ މެޗެވެ. މި ދެ ޓީމުން މިދިޔަ އަހަރުގެ ޔުއެފާ ނޭޝަންސް ލީގުގައި ބައްދަލުކުރި ދެ މެޗުން ވެސް ކުރިހޯދީ ބެލްޖިއަމުންނެވެ.

އެމްސްޓެޑަމްގެ ޔޯހަން ކްރައިފް އެރީނާގާއި އޮސްޓްރިއާ އާ ދެކޮޅަށް ނެދަލެންޑްސް ކުޅުނު މެޗުގައި އެ ޓީމުން ލީޑްނެގީ 11 ވަނަ މިނެޓުގައި ލިބުނު ޕެނަލްޓީއަކުންނެވެ. މިއީ ޕެނަލްޓީއޭރިޔާތެރެއިން ނެދަލެންޑްސްގެ ޑެންޒެލް ޑަމްފްރީސް އަށް އޮސްޓްރިއާގެ ކެޕްޓަން ޑޭވިޑް އަލަބާ ކުރި ފައުލަކަށް ރެފްރީ ދިން ޕެނަލްޓީއެކެވެ. މި ޕެނަލްޓީ ކާމިޔާބުކުރީ ނެދަލެންޑްސްގެ އިތުބާރު ފޯވާޑް މެމްފިސް ޑިޕާއީ އެވެ. މިއީ އެ ޓީމަށް އެންމެ ފަހުން ކުޅުނު ނުވަ މެޗުގައި އޭނާ ޖެހި 8 ވަނަ ލަނޑެވެ.

އޭގެފަހުން، ފުރަތަމަ ހާފު ނިމެން ފަސް މިނެޓަށްވެފައިވަނިކޮށް ނެދަލެންޑްސްގެ ލީޑް ފުޅާކުރުމަށް ޑިޕާއީ އަށް ލިބުނު ފުރުޞަތުގެ ބޭނުންހިފޭގޮތެއްނުވިއެވެ. އަދި ދެވަނަ ހާފުގެ ކުރީކޮޅު، އެ ޓީމުގެ ޑިފެންޑަރު ސްޓެފަން ޑިވްރާ ފޮނުވާލި ބޯޅަ އޮސްޓްރިއާގެ ކީޕަރު ޑެނިއެލް ބެކްމަން މަތަކުރިއެވެ.

މެޗުގެ 67 ވަނަ މިނެޓުގައި ނެދަލެންޑްސްގެ ދެވަނަ ލަނޑުޖަހައިދީ އެ ޓީމަށް ހިތްހަމަޖެހުން ގެނެސްދިނީ ޕީއެސްވީ އެއިންދޯވަން އަށް ކުޅެމުން އަންނަ ފުލްބެކް ޑަމްފްރީސް އެވެ. މިއީ ފަހު ހާފުގައި ކުޅެން ނިކުތް ޑޮންޔެލް މާލެން ތަނަވަސްކުރި ފުރުޞަތަކުން ޑަމްފްރީސް ކާމިޔާބުކުރި ގޯލެކެވެ. މިއީ މި މުބާރާތުގައި އޭނާ ޖެހި ދެވަނަ ލަނޑެވެ.

މި މުބާރާތުގައި ރޭ ކޯޕަންހޭގަންގެ ޕާކެން ސްޓޭޑިއަމްގައި ބެލްޖިއަމްއާ ދެކޮޅަށް ޑެންމާކް ކުޅުނު މެޗުގައި ހީކުރި ގޮތާއި ހިލާފަށް ކުރީން ލީޑްނެގީވެސް އެ ޓީމުންނެވެ. މެޗު ފެށިގެން އެއް މިނެޓާއި 39 ވަރަކަށް ސިކުންތުގެ ތެރޭގައި ޑެންމާކަށް މި ލަނޑުޖަހައިދިނީ ޔޫސުފް ޔުރާރީ ޕޯލްސަން އެވެ. މިއީ އެ ޓީމަށް ކުޅެމުން އަންނަ ޓޮޓެންހަމް ހޮސްޓްޕާގެ މިޑްފީލްޑަރު ޕިއޭ-އެމީލް ހޮއިބިއޭ ދިން ބޯޅައަކުން ޕޯލްސަން ކާމިޔާބުކުރި ގޯލެކެވެ.

މިއީ ޔޫރޯގެ ތާރީޚުގައި ފެނިގެންދިޔަ ދެވަނަ އަށް އެންމެ އަވަސް ގޯލެވެ. މި މުބާރާތުގައި ޖެހި އެންމެ އަވަސް ގޯލަކީ 2004 ވަނަ އަހަރު ޕޯޗުގަލްގައި ބޭއްވި މުބާރާތުގައި ގްރީސް ކޮޅަށް ރަޝިޔާގެ ޑިމިޓްރީ ކިރިޗެންކޯ ވައްދާލި ލަނޑެވެ. އޭނާ މި ގޯލްޖެހީ މެޗު ފެށިގެން އެއް މިނެޓާއި ހަތް ސިކުންތުންނެވެ.

މި މެޗުގެ ފުރަތަމަ ހާފުގައި ކުރިން ރޭވިފައި އޮތްގޮތަށް 10 ވަނަ މިނެޓުގައި ވަނީ ޑެންމާކުގެ ކްރިސްޓިއަން އެރިކްސަން އަށް އޮތް ސަޕޯޓް ދައްކައިދިނުމުގެ ގޮތުން ކުޅުން މެދުކަނޑާލާފައެވެ. އެކަމަކު، ކުރީ މެޗާއި ހިލާފަށް މި މެޗުގައި އެއް މިނެޓަށް ކުޅުން މެދުކަނޑާލިނަމަވެސް ފުރަތަމަ ހާފު ނިމުމުގެ ކުރީން ޑެންމާކުން ވަނީ ބެލްޖިއަމްގެ ގޯލަށް އަމާޒުކޮށް ގިނަ ހަމަލާތަކެއް ފޮނުވާލައިފައެވެ.

ޑެންމާކު ކުރިން ކުޅުނު މެޗުގައި ފިންލެންޑް އަތުން 1-0 އިން ބަލިވިއިރު، އެ ޓީމުގެ އެރިކްސަން އަށް ކުރިމަތިވި ހިތާމަވެރި ހާދިސާއާ ގުޅިގެން މެޗުގެ ކުޅުން ދެ ގަޑިއިރެއްހާއިރުގެ މެދުކެނޑުމަކުން ފެށިއިރު ފިންލެންޑުން ވަނީ މެޗުގެ ކޮންޓްރޯލް އަތުލާފައެވެ.

ބެލްޖިއަމުން ދެވަނަ ހާފު ފެށީ ބަދަލަކާއެކު އެވެ. އެ ޓީމުގެ ކޯޗު ރޮބާޓޯ މާޓިނޭޒް ވަނީ މެންޗެސްޓާ ސިޓީގެ އިތުބާރު މިޑްފީލްޑަރު ޑިބްރޭނާ ކުޅެން ނެރެފައެވެ. މިއީ ޔުއެފާ ޗެމްޕިއަންސް ލީގުގެ ފައިނަލްގައި ޗެލްސީއާ ދެކޮޅަށް ކުޅުނު މެޗުގައި ޑިބްރޭނާގެ މޫނު މައްޗަށް ލިބުނު އަނިޔާއަށް ފަހު ބެލްޖިއަމަށް ކުޅެދިން ފުރަތަމަ މެޗެވެ. އޭގެނަތީޖާއެއްގެ ގޮތުން، އެ ޓީމުން އެއްވަރުކުރި ލަނޑު، މެޗުގެ 55 ވަނަ މިނެޓުގައި ތޯގަން ހަޒާޑް ކާމިޔާބުކުރީ ވެސް ޑިބްރޭނާ ދިން ޕާހަކުންނެވެ.

އަދި އޭގެ 15 މިނެޓުފަހުން، ބެލްޖިއަމަށް މި މެޗުގައި ފުރަތަމަ ފަހަރަށް ލީޑްނަގައިދިނީ ވެސް ޑިބްރޭނާ އެވެ. މިއީ ފަހު ހާފުގައި ކުޅެން ނިކުތް އެ ޓީމުގެ ކެޕްޓަން އެޑެން ހަޒާޑް ދިން ބޯޅައަކުން ޑިބްރޭނާ ކާމިޔާބުކުރި ގޯލެކެވެ. މި ދެ ގޯލްޖެހުމަށް ތަނަވަސްކުރި ފުރުޞަތުގައި ވެސް ބެލްޖިއަމްގެ ފޯވާޑް ރޮމެލޫ ލުކާކޫގެ ދައުރު ބޮޑެވެ.

ޑެންމާކުން އެއްވަރުކުރުމަށް ކުރި މަސައްކަތުގައި ބާސެލޯނާގެ ފޯވާޑް މާޓިން ބްރެއިތުވެއިޓް ބޮލުން ފޮނުވާލި ބޯޅަ ގޯލްގެ ހުރަސްދަނޑިއަށް އަމާޒުވެފައިވާއިރު ބަދަލު ކުޅުންތެރިއެއްގެ ގޮތުގައި ކުޅެން ނިކުތް މަތިއަސް ޔެންސަން ފޮނުވާލި ބާރު ހަމަލާ ދިޔައީ ގޯލްގެ ހުރަސްދަނޑިމަތިންނެވެ.

މި ފަހަރުގެ ޔޫރޯ ފުޓްބޯޅަ މުބާރާތުގައި ރޭ ކުޅުނު އަނެއް މެޗުގައި ރޫމޭނިއާގެ ބުކަރެސްޓްގައި ޔޫކްރޭނުން ވަނީ 2-1 ގެ ނަތީޖާއަކުން ނޯތު މެސެޑޯނިއާ ބަލިކޮށް މި މުބާރާތުގައި ކުރިއަށް ދިއުމުގެ އުއްމީދު އާކޮށްފައެވެ. މި މެޗުގައި ޔޫކްރޭނުން ކާމިޔާބުކުރި ދެލަނޑުވެސް ފުރަތަމަ ހާފުގައި ޖަހައިދިނީ ކެޕްޓަން އެންޑީ ޔާމޮލެންކޯ އާއި ރޯމަން ޔަރެމްޗުކް އެވެ. ނޯތު މެސެޑޯނިއާގެ ހަމައެކަނި ލަނޑު، ދެވަނަ ހާފުގެ ކުރީކޮޅު ލިބުނު ޕެނަލްޓީއަކުން ކާމިޔާބުކޮށްދިނީ ލީޑްސް ޔުނައިޓެޑަށް ކުޅެމުން އަންނަ ފުލްބެކް އެޒްޔަން އަލިއޯސްކީ އެވެ.