ބެންކޮކަކީ ދިވެހިންގެ "ދެވަނަ ގެ" އެވެ. ޗުއްޓީއަށް ދިޔަޔަސް ނުވަތަ ވިޔަފާރި ދަތުރެއްގައި ދިޔަޔަސް، ޝޮޕިންގ ކޮށްނުލައި އެނބުރި އައުމަކީ ދިވެއްސަކަށް ވާނެ ކަމެއް ނޫނެވެ. ބެންކޮކްގެ ޝޮޕިންގ މައިދާނުގެ ހިތަކީ "ޕްރަތުނަމް" ސަރަހައްދެވެ.
ގިނަ މީހުންނަށް "ޕްލެޓިނަމް ފެޝަން މޯލް" އެނގުނަސް، ޕްރަތުނަމް މާކެޓުގެ ހަގީގީ ސިއްރުތަކެއް އެބަހުއްޓެވެ. ޖީބަށް ލުއިކޮށް، އެންމެ ފެންވަރު ރަނގަޅު ވިޔަފާރިއެއް ކުރަން ބޭނުންނަމަ ތިރީގައިމިވާ ކަންކަން ހަނދާން ބަހައްޓާށެވެ.
"މޯނިންގ މާކެޓް" ގެ ސިއްރު: ގިނަ މީހުން ޝޮޕިންގއަށް ނުކުންނަނީ ހެނދުނު 10:00 ގެ ފަހުންނެވެ. ނަމަވެސް، ޕްރަތުނަމްގެ އެންމެ އަގުހެޔޮ ވަގުތަކީ ފަތިހު 5:00 އިން ހެނދުނު 9:00 އަށް އޮންނަ ވަގުތެވެ. މި ވަގުތު ބައި ޔޯކް ސްކައި (Baiyoke Sky) ހޮޓެލް ވަށައިގެން މަގުމަތީގައި ޓެންޓުތަކުން ވިއްކާ ހެދުންތައް މޯލްތަކަށްވުރެ %30 ނުވަތަ %40 އަގުހެޔޮވާނެއެވެ. ވިޔަފާރިކުރަން ބޭނުންވާ މީހުންނަށް މިއީ ރަނުގެ ފުރުސަތކެވެ.
"ހޯލްސޭލް" އަގު:
މި މާކެޓުގައި އެއްޗެހި ވިއްކަނީ ދެ އަގެއްގައެވެ. އެއީ ރީޓެއިލް އަދި ހޯލްސޭލް އަގެވެ.
"ތްރީ ޕީސް" ގަވާއިދު: އެއް ފިހާރައަކުން މަދުވެގެން 3 އެތި ގަތުމުން "ހޯލްސޭލް" އަގު ލިބޭނެއެވެ. އެއީ އެއް ވައްތަރަކުން ތިނެތި ކަމަށް ވުން މަޖުބޫރެއް ނޫނެވެ. ކުލަ ނުވަތަ ޑިޒައިން ތަފާތު ވިޔަސް ހެވެއެވެ. އެކަނި ދާނަމަ، އެތަނުގައި ޝޮޕިންގ ކުރަން އުޅޭ އެހެން މީހަކާ ބައިވެރިވެގެން ތިނެތި ހަމަކޮށްލާށެވެ. އޭރުން ދެ މީހުންނަށް ވެސް އަގުހެޔޮވާނެއެވެ. ޕްރަތުނަމްގެ މަގުމަތީ ފިހާރަތަކާއި ޕްލެޓިނަމް މޯލްގައި ވެސް އާންމުކޮށް ހެދުން ލައިގެން ހެޔޮވަރު ކުރާނެ އިންތިޒާމެއް ނުހުންނާނެއެވެ.
ޓިޕް: ގޭން ނުކުތުމުގެ ކުރިން އަމިއްލަ މީހާގެ މިން ނަގާށެވެ. ނުވަތަ ރަނގަޅަށް ހެޔޮވަރުވާ ހެދުމެއް ގެންދާށެވެ. އަދި ފިހާރައިގައި އޮންނަ މިންފީތާ ބޭނުންކޮށްގެން ސައިޒު ޗެކްކޮށްލާށެވެ.
އަގު ކުޑަކުރުން: ޕްލެޓިނަމް މޯލްގައި އަގު ކުޑަކުރަން އުނދަގޫވެދާނެއެވެ. އެކަމަކު މަގުމަތީ މާކެޓުގައި ކޮންމެވެސް ވަރަކަށް އަގު ކުޑަކުރެވޭނެއެވެ.
ތައި ބަސް ނޭނގުނަސް ހާސްނުވާށެވެ. ހުރިހާ ފިހާރައެއްގައި ވެސް ކަލްކިއުލޭޓަރު އޮންނާނެއެވެ. ބޭނުންވާ އަގު ކަލްކިއުލޭޓަރުގައި ޖަހާލައިގެން މުއާމަލާތް ކުރާށެވެ.
ގަޔަށް ފަސޭހަ ހެދުމެއްގައި ދިއުން: މިއީ ވަރަށް ހޫނު ގަދަ، ތޮއްޖެހިފައިވާ ސަރަހައްދެކެވެ.
އުސް ފައިވާނަށް ނުވަތަ ބޫޓަށް ނާރާށެވެ. ހިނގަން ފަސޭހަ ބޫޓެއް އިހްތިޔާރުކުރާށެވެ.
ފެން ފުޅިއެއް ގެންގުޅޭށެވެ.
މުދާ އުފުލަން ފަސޭހަވާނެ ބޮޑު ކޮތަޅެއް ނުވަތަ ފުރޮޅުލީ ފޮއްޓެއް ގެންދާށެވެ.
ޕްރަތުނަމްއަކީ ކެތްތެރިކަމާއެކު ހިނގައިފިނަމަ، އަގުބޮޑު ބްރޭންޑްތަކާ ވާދަކުރެވޭ ފެންވަރުގެ ހެދުންތައް ކުުޑަ އަގެއްގައި ލިބޭނެ ތަނެކެވެ. ދެން ފަހަރަކުން ބެންކޮކަށް ދާއިރު، ފަތިހު ހޭލައިގެން މި ތަޖުރިބާ ކޮށްލަން ހަނދާންކުރާށެވެ!