މިހާރަކަށް އައިސް ދިވެހި މުޖުތަމަޢުގެ ތެރޭގައި ވެސް ކުޑަކުދިންނާއި ފުރާވަރުގެ ކުދިންގެ މެދުގައި 'ސްލީޕްއޯވަ' ނުވަތަ އެކުވެރިންގެ ގޭގޭގައި ރޭގަނޑު ނިދަން މަޑުކުރުމަކީ ވަރަށް އާންމުވަމުން އަންނަ ކަމެކެވެ. ބައެއް ބެލެނިވެރިންނަށް މިއީ ކުދިންގެ އިޖުތިމާޢީ ގުޅުން ބަދަހިވާނެ ކަމެއްގެ ގޮތުގައި ފެނުނު ކަމުގައިވިޔަސް، އިސްލާމީ ރީތި އުސޫލުތަކާއި ދިވެހި ސަގާފަތުގެ ނަޒަރުން ބަލާއިރު މީގައި ނުރައްކާތެރި އަނދިރި ފަރާތްތަކެއް އެކުލެވިގެންވެއެވެ.
މިކަމުގެ އެންމެ ބޮޑު އެއް ނުރައްކަލަކީ ބެލެނިވެރިންގެ ބެލުމުގެ ދަށުން ބޭރުގައި ކުދިން ހޭދަކުރާ ވަގުތުތަކުގައި ކުރިމަތިވެދާނެ އަޚްލާޤީ މައްސަލަތަކެވެ. އިސްލާމްދީން ބާރުއަޅަނީ ދަރިންނަކީ ބެލެނިވެރިންގެ އަމާނާތެއް ކަމުގައި ދެކި، އެކުދިންގެ އުޅުމާއި ގުޅުންތައް ގާތުން ބެލުމަށެވެ. އެހެން ގޭގޭގައި ރޭގަނޑު ނިދަން ހުންނަ ވަގުތުތަކަކީ ބޮޑެތި މީހުންގެ ބެލުމެއް ނެތި، އިންޓަރނެޓާއި ސޯޝަލް މީޑިއާގެ ނޭދެވޭ ވަސީލަތްތަކަށް ކުދިން ހުށަހެޅިގެންދާ ވަގުތުތަކެކެވެ. މީގެ ސަބަބުން ކުދިންގެ ސިކުނޑިތަކަށް ނުބައި ތަޞައްވުރުތައް ވަދެ، ދީނީ އަދި އަޚްލާޤީ މިންގަނޑުތަކުން ބޭރުވުމުގެ ފުރުޞަތު ބޮޑުވެއެވެ.
ދެވަނަ ކަމަކަށް، ރައްކާތެރިކަމުގެ ގޮތުން ބަލާއިރު 'ސްލީޕްއޯވަ' ތަކަކީ ކުދިންނަށް ޖިސްމާނީ އަދި ނަފްސާނީ ގޮތުން ލިބިދާނެ ގޯނާތަކަށް މަގުފަހިވާ ކަމެކެވެ. ކިތަންމެ ގާތް ރަޙުމަތްތެރިއެއްގެ ގެޔަކަށް ވީނަމަވެސް، އެ ގޭގެ އެހެން މީހުންނަކީ ނުވަތަ އެ ގެޔަށް ޒިޔާރަތްކުރާ މީހުންނަކީ ކޮންބައެއްކަން އަބަދު ދެނެގަތުމަކީ ދަތި ކަމެކެވެ. ތަފާތު ތަފާސްހިސާބުތަކުން ދައްކާ ގޮތުގައި، ކުޑަކުދިންނަށް ކުރިމަތިވާ ބައެއް ބާވަތުގެ ގޯނާތަކަކީ އެކުދިންނަށް އިތުބާރު ކުރެވޭ މާޙައުލުތަކުގައި ހިނގާ ކަންކަމެވެ. ބެލެނިވެރިންގެ ނެތް ތަނެއްގައި ކުއްޖާއަށް ދިމާވާ މައްސަލަތައް ބުނަން ނުކެރި، ނަފްސާނީ ބަލިމަޑުކަމެއްގެ ތެރެއަށް ކުއްޖާ ވެއްޓިގެންދިއުމަކީ އެކަށީގެންވާ ކަމެކެވެ. ދުނިޔޭގެ ސިއްޙަތު ޖަމްޢިއްޔާ (WHO) އާއި ކުޑަކުދިންގެ ޙައްޤުތަކަށް މަސައްކަތްކުރާ ބައިނަލްއަޤުވާމީ ޖަމްޢިއްޔާތަކުގެ ތަފާސްހިސާބުތަކުން ދައްކާގޮތުގައި، ކުޑަކުދިންނަށް ކުރިމަތިވާ ޖިސްމާނީ އަދި ޖިންސީ ގޯނާތަކުގެ ބޮޑު އިންސައްތައަކީ އެކުދިން ދަންނަ، އިތުބާރުކުރާ މާޙައުލުތަކުގައި ނުވަތަ ގާތް މީހުންގެ ފަރާތުން ކުރިމަތިވާ ކަންކަމެވެ. މީގެ ތެރޭގައި 'ސްލީޕްއޯވަ' ފަދަ، ބެލެނިވެރިންގެ ސީދާ ބެލުމެއް ނެތް ވަގުތުތައް ހިމެނެއެވެ.
މީގެ އިތުރުން، ސިއްޙީ ގޮތުންނާއި ދިރިއުޅުމުގެ އާދަކާދައަށް ބަލާއިރު ވެސް މީގެ ނޭދެވޭ އަސަރުތައް ފާހަގަކުރެވެއެވެ. ރޭގަނޑު ނުނިދާ ހޭލާ ތިބެގެން ކުޅިވަރު ކުޅުމާއި، ޞިއްޙަތަށް ނުރަނގަޅު ކާނާ ބޭނުންކުރުމަކީ ކުދިންގެ ނިދުމުގެ ތަރުތީބު ގެއްލި، ކިޔެވުމަށް ދޭ ސަމާލުކަން ކުޑަވާ ކަމެކެވެ. އަދި ބައެއް ފަހަރު މިފަދަ އެއްވުންތަކުގައި ދުންފަތުގެ އިސްތިޢުމާލު ކުރުމާއި، އެ ނޫންވެސް ނުރަނގަޅު އާދަތަކަށް ކުދިން ހޭނުމުގެ ފުރުޞަތު އޮވެއެވެ.އެމެރިކަން އެކަޑަމީ އޮފް ޗައިލްޑް އެންޑް އެޑޮލެސެންޓް ފްސައިކިއޭޓްރީ (AACAP) ފަދަ އިދާރާތަކުން ފާހަގަކުރާ ގޮތުގައި، ކުދިންގެ އުޅުމަށް އަންނަ ބަދަލުތަކާއި ނޭދެވޭ އާދަތަކަށް ހުށަހެޅުމުގައި އެކުދިން ހޭދަކުރާ މާޙައުލާއި އެކުވެރިންގެ ނުފޫޒު ވަރަށް ބޮޑެވެ. ޚާއްޞަކޮށް ރޭގަނޑު ދަންވަރު، ބޮޑެތި މީހުންގެ ބެލުމެއް ނެތި އިންޓަރނެޓް ބޭނުންކުރުމަކީ ކުދިން ސައިބަރ ބުލީންގް އަދި ނޭދެވޭ މަންޒަރުތަކަށް ހުށަހެޅޭ އެންމެ ބޮޑު އެއް ސަބަބެވެ.
ދަރިންނަށް އުފާވެރި މާޙައުލެއް ހޯދައިދިނުމަކީ މުހިންމު ކަމެއް ނަމަވެސް، އެކަން ކުރަންވާނީ އެކުދިންގެ ދީނާއި، އަޚްލާޤާއި، އަދި ރައްކާތެރިކަން ކަށަވަރުވާނެ ގޮތެއްގެ މަތިންނެވެ. 'ސްލީޕްއޯވަ' ފަދަ ކަންކަމަށް ހިތްވަރު ދިނުމުގެ ބަދަލުގައި، ދުވާލުގެ ވަގުތުތަކުގައި ބެލެނިވެރިންގެ ބެލުމުގެ ދަށުން ކުދިން އެކުގައި ވަގުތު ހޭދަކުރެވޭނެ އިންތިޒާމުތައް ހަމަޖެއްސުމަކީ މާ ރައްކާތެރި އަދި ފައިދާހުރި ގޮތެކެވެ. ދަރިންނަކީ މާދަމާގެ މުސްތަޤުބަލު ކަމަށްވާއިރު، އެކުދިން ހިމާޔަތްކުރުމަކީ ކޮންމެ ބެލެނިވެރިއެއްގެ އިސްލާމީ އަދި ޤައުމީ ވާޖިބެކެވެ.