ބޮލީވުޑް އަދި ސައުތު ސިނަމާގެ މަޝްހޫރު ބަތަލާ ޝްރުތީ ހަސަން، އޭނާއަށް ކުރިމަތިވި ނަފްސާނީ ބޮޑެތި ގޮންޖެހުންތަކާއި، އެކަންކަމުން އަރައިގަތުމަށް ކުރި މަސައްކަތްތަކުގެ ވާހަކަ ފުރަތަމަ ފަހަރަށް ހާމަކޮށްފިއެވެ.
"ދަ ހޮލީވުޑް ރިޕޯޓާ" އަށް ދިން އިންޓަވިއުއެއްގައި ޝްރުތީ ބުނި ގޮތުގައި، 2018 ވަނަ އަހަރު އޭނާ ފިލްމީ މަސައްކަތްތަކާ ދުރަށް ޖެހިލީ ނަފްސާނީ ދުޅަހެޔޮކަމަށް އިސްކަންދިނުމުގެ ގޮތުންނެވެ. އެ ދުވަސްވަރު އޭނާ ވަރަށް ބޮޑަށް "ކްރިޕްލިންގ އެންޒައިޓީ" ނުވަތަ އާދަޔާ ހިލާފަށް ބޮޑަށް ހާސްވުމުގެ ބަލި ތަހައްމަލު ކުރަމުންދިޔަ ކަމަށާއި، އޭގެ ސަބަބުން ދުވަހުން ދުވަހަށް ކުރަންޖެހޭ އާދައިގެ ކަންކަން ކުރުމަށްވެސް އުނދަގޫވި ކަމަށް އޭނާ ކިޔައިދިނެވެ.
ލަންޑަނުގައި ހޭދަކުރި އެ ދުވަސްވަރު، މިއުޒިކުގެ ތެރެއިން އަމިއްލަ ނަފްސު އަލުން ދެނެގަތުމަށް ފުރުސަތު ލިބުނު ކަމަށް ޝްރުތީ ފާހަގަކުރިއެވެ. އަދި އެއީ އޭނާގެ ހަޔާތުގައި ކޮންމެހެން ބޭނުންވި މުހިންމު ވަގުތުކޮޅެއް ކަމަށްވެސް ބުންޏެވެ.
މި އިންޓަވިއުގައި ޝްރުތީ ވަނީ އޭނާގެ ކުރީގެ ލޯބިވެރިޔާ މައިކަލް ކޯސޭލްއާ ވަކިވި ވާހަކައަށްވެސް އިޝާރާތްކޮށްފައެވެ. ނަމެއް ބޭނުން ނުކުރި ނަމަވެސް، އެ ގުޅުން ނިމުމަކަށް އައީ އޭނާ އެކަމަށް ބޭނުންވެގެން ކަމަށާއި، ނަމަވެސް އެ މުއްދަތަކީ އޭނާގެ ހަޔާތް އަލުން ތަރުތީބުކޮށްލަން ލިބުނު ރަނގަޅު ފުރުސަތެއް ކަމަށް އޭނާ ބުންޏެވެ. މައިކަލް އަކީ ޝްރުތީގެ ބައްޕަ ކަމަލް ހަސަންއާ އެކު އާއިލީ ބައެއް ހަފްލާތަކުންވެސް ފެނިފައިވާ މީހެކެވެ. މީގެ އިތުރުން، ފަހުން އޭނާ ލޯބީގެ ގޮތުން ގުޅުނު ސަންތަނޫ ހަޒާރިކާއާ ވެސް މިއަހަރުގެ ކުރީކޮޅު ވަނީ ވަކިވެފައެވެ.
މަސައްކަތުގެ މައިދާނަށް ބަލާއިރު، ޝްރުތީ މިހާރު އަންނަނީ ފޯރިއާއެކު މަސައްކަތް ކުރަމުންނެވެ. އޭނާގެ ކުރިއަށް ހުރި ފިލްމުތަކުގެ ތެރޭގައި ދުލްގަރް ސަލްމާންއާ އެކު ކުޅޭ "އާކާޝަމްލޯ އޮކާ ތާރާ" އާއި، ވިޖޭ ސެތުޕަތީއާ އެކު ފެންނާނެ "ޓްރެއިން" އަދި އުންމީދީ ފިލްމު "ސަލާރް: ޕާޓް 2" ހިމެނެއެވެ.