ކުޑަކުދިންގެ މެދުގައި މަގުބޫލު ލުއި ކާނާ، ހާއްސަކޮށް ޗިޕްސް، ސޮސެޖް އަދި އިންސްޓަންޓް ނޫޑްލިސް ފަދަ "އަލްޓްރާ ޕްރޮސެސްޑް" ކާނާއަކީ އެކުދިންގެ ނަފްސާނީ ދުޅަހެޔޮކަމަށް ހުރި ނުރައްކަލެއް ކަމަށާއި، މިފަދަ ކާނާގެ ސަބަބުން ކުދިންގެ އެންޒައިޓީ ނުވަތަ ހާސްކަން އިތުރުވާކަމަށް ފަހުގެ ދިރާސާތަކުން ދައްކައިފިއެވެ.
މިކަމާ ގުޅޭގޮތުން "ޕަބްލިކް ހެލްތު ނިއުޓްރިޝަން" ޖާނަލްގައި ޝާއިއުކޮށްފައިވާ ފުޅާ ދިރާސާއެއްގައި ބުނެފައިވަނީ، ދުވަހުގެ ކެއުމުގައި ޕްރޮސެސްކުރި ކާނާ ގިނައިން ހިމެނޭ ކުދިންގެ ކިބައިން އެންޒައިޓީއާއި ޑިޕްރެޝަންގެ އަލާމާތްތައް ފެންނަ މިންވަރު، ސިއްހަތަށް ފައިދާހުރި ކާނާ ކާ ކުދިންނަށްވުރެ މަތި ކަމަށެވެ.
މި ދިރާސާގައި ފާހަގަކޮށްފައިވާ ގޮތުގައި ޗިޕްސް، ސޮސެޖް، އަދި ބަންދުކޮށްފައި ހުންނަ ފޮނި ކާނާގައި އެކުލެވޭ އާޓިފިޝަލް ކުލައާއި، ރަހަ ޖައްސާ ކެމިކަލް އަދި ގިނަ އަދަދަކަށް ހިމެނޭ ހަކުރާއި ލޮނުގެ ސަބަބުން ކުއްޖާގެ ސިކުނޑީގެ މަސައްކަތަށް ނޭދެވޭ އަސަރު ކުރެއެވެ.
އޮސްޓްރޭލިއާގެ ޑީކން ޔުނިވާސިޓީގެ ފުޑް އެންޑް މޫޑް ސެންޓަރުގެ ޑިރެކްޓަރު، ޕްރޮފެސަރު ފެލިސް ޖެކާ މިކަމާ ގުޅޭގޮތުން ވިދާޅުވެފައިވަނީ ކާނާއާއި ސިކުނޑިއާ ދެމެދު ވަރަށް ބޮޑު ގުޅުމެއް ވާކަމަށެވެ.
"އަހަރެމެންގެ ބަނޑުގައި ހުންނަ ފައިދާހުރި ބެކްޓީރިއާތަކަކީ (ގަޓް މައިކްރޯބަޔޯމް) ސިކުނޑީގެ ދުޅަހެޔޮކަމަށް ވަރަށް މުހިންމު އެއްޗެއް. ޗިޕްސް ފަދަ ޕްރޮސެސްޑް ކާނާގެ ސަބަބުން މި ބެކްޓީރިއާތައް މަރުވެ، ބަނޑުތެރޭގައި އިންފްލެމޭޝަން އުފެދޭ. މިއީ ސީދާ ކުއްޖާގެ މޫޑަށާއި ނަފްސާނީ ހަމަޖެހުމަށް އަސަރުކުރާ ކަމެއް،" ޕްރޮފެސަރު ޖެކާ ވިދާޅުވިއެވެ.
ސިއްހީ މާހިރުން ވިދާޅުވާ ގޮތުގައި "ގަޓް-ބްރެއިން އެކްސިސް" ނުވަތަ ބަނޑާއި ސިކުނޑިއާ ދެމެދު އޮންނަ ގުޅުމުގެ ސަބަބުން، ކާ އެއްޗެހީގެ އަސަރު ކުއްޖާގެ އިހުސާސްތަކަށް ކުރެއެވެ. ސޮސެޖާއި ނަގެޓްސް ފަދަ ތަކެތީގައި ހަށިގަނޑަށް ބޭނުންވާ މުހިންމު މާއްދާތައް (މިސާލަކަށް އޮމެގާ-3 އާއި ވިޓަމިންސް) ނުހުންނާތީ، ސިކުނޑި ހެދިބޮޑުވުމަށާއި ޖަޒުބާތުތައް ކޮންޓްރޯލް ކުރުމަށް ހުރަސްއެޅެއެވެ.
ކުދިންނަށް ލުއި ކާނާގެ ގޮތުގައި ޕެކެޓް ކާތަކެތި ދިނުމުގެ ބަދަލުގައި މޭވާ، ޔޯގަޓް ނުވަތަ ގޭގައި ތައްޔާރުކުރާ ސިއްހަތަށް ފައިދާހުރި ތަކެތި ދިނުން މުހިންމެވެ. މިއީ ކުދިންގެ ޖިސްމާނީ ސިއްހަތުގެ އިތުރުން ނަފްސާނީ ދުޅަހެޔޮކަމަށްޓަކައި ވެސް ކޮންމެހެން ކުރަންޖެހޭ ކަމެކެވެ.