ނިދުމަކީ އިންސާނާގެ ހަށިގަނޑުގެ މަސައްކަތްތައް ފުރިހަމައަށް ކުރިއަށް ގެންދިއުމަށްޓަކައި ކޮންމެހެން ބޭނުންތެރި ބަޔޮލޮޖިކަލް މަރުހަލާއެކެވެ. މިއީ ހަމައެކަނި ވަގުތު އޮތީމާ ކޮށްލާ އަރާމެއް ނޫނެވެ. އާންމުގޮތެއްގައި ބޮޑެތި މީހުން ކޮންމެ ރެއަކު 7 ގަޑިއިރާއި 9 ގަޑިއިރާ ދެމެދުގެ ވަގުތަކަށް ނިދަން ބޭނުންވެއެވެ. ނިދީގެ ތެރޭގައި އިންސާނާގެ ސިކުނޑި އޮންނަނީ ވަރަށް ހަރަކާތްތެރިކޮށެވެ. މި ވަގުތަކީ ހަށިގަނޑު އަލުން އާބާދުވުމަށާއި، ހަނދާންތައް ވަރުގަދަކުރުމަށާއި، އިހުސާސްތައް ކޮންޓްރޯލްކުރުމަށް ވަރަށް މުހިންމު ވަގުތެކެވެ.
ނިދީގެ ސަބަބުން ސިކުނޑިއަށް ކުރާ އަސަރަކީ ފާހަގަކޮށްލަންޖެހޭ ކަމެކެވެ. އަހަރެމެން ނިދާފައި ތިބޭއިރު، ދުވާލު ދަސްކުރި މައުލޫމާތުތައް ސިކުނޑީގައި ރައްކާކޮށް، ބޭކާރު ތަކެތި ސިކުނޑިން ބޭރުކޮށްދެއެވެ. ދާއިމީކޮށް ނިދި މަދުވުމުގެ ސަބަބުން ސަމާލުކަން ދިނުމަށާއި، ގޮތްތައް ނިންމުމަށާއި، ކަންކަމަށް އިޖާބަދޭ ދުވެލި ދަށްވެ، އެކި ބާވަތުގެ އެކްސިޑެންޓްތަކަށް މަގުފަހިވެއެވެ.
ޖިސްމާނީ ސިއްހަތަށް ބަލާއިރު، ފުން ނިދީގެ ތެރޭގައި ހަށިގަނޑުގެ ސެލްތައް މަރާމާތުކޮށް، ހެދިބޮޑުވުމަށް ބޭނުންވާ ހޯރމޯންތައް ދޫކޮށް، ދިފާއީ ނިޒާމު ވަރުގަދަކޮށްދެއެވެ. ނިދި މަދުވުމަކީ ހިތުގެ ބަލިތަކާއި، ފަލަވުމާއި، ހަކުރުބަލި ފަދަ ނުރައްކާތެރި ބަލިތަކަށް މީހާ ހުށަހެޅޭ ކަމެކެވެ. އަދި ނިދި މަދު މީހުންގެ ހަށިގަނޑުގައި ސްޓްރެސް ހޯރމޯން އިތުރުވެ، ލޭގެ ޕްރެޝަރަށާއި މެޓަބޮލިޒަމަށް ނޭދެވޭ އަސަރުކުރެއެވެ.
ހޯރމޯންތަކުގެ ހަމަހަމަކަން ހިފެހެއްޓުމަށް ވެސް ނިދި މުހިންމެވެ. ނިދި މަދުވުމުން ބަނޑުހައިވުން ކޮންޓްރޯލްކުރާ ހޯރމޯންތަކަށް ބަދަލު އައިސް، ކާހިތްވުން އިތުރުވެ، ހަށިގަނޑަށް ނުރައްކާތެރި ކާނާއަށް އޮންނަ ޝައުގުވެރިކަން ބޮޑުވެއެވެ. މީގެ އިތުރުން ނިދި މަދުވުމަކީ ނަފްސާނީ ބަލިތަކާއި، ހާސްކަމާއި، މާޔޫސްކަމަށް މަގުފަހިވާ ކަމެކެވެ.
އަހަރެމެންގެ ހަށިގަނޑުގައި "ސާކޭޑިއަން ރިދަމް" ގެ ނަމުން ނިޒާމެއް ރޭވިފައިވެއެވެ. މިއީ އަލިކަމަށް ބިނާވެފައިވާ ގުދުރަތީ ގަޑިއެކެވެ. ރޭގަނޑު ވަގުތު ސްކްރީންތަކުން ފޮނުވާ މަސްނޫއީ އަލީގެ ސަބަބުން، ނިދަން އެހީތެރިވާ "މެލަޓޯނިން" އުފެއްދުމަށް ހުރަސްއެޅި، ނިދަން އުނދަގޫވެއެވެ.
ނިދުމަކީ އިޚްތިޔާރީ ކަމެއް ނޫނެވެ ނުވަތަ އެއީ ކަންނެތްކަމުގެ ނިޝާނެއް ވެސް ނޫނެވެ. އެއީ ދުޅަހެޔޮ ސިއްހަތަކަށާއި، ސިކުނޑީގެ ތޫނުފިލިކަމަށާއި، ނަފްސާނީ ދުޅަހެޔޮކަމަށްޓަކައި ކޮންމެހެން ފުރިހަމަ ކުރަންޖެހޭ ބަޔޮލޮޖިކަލް މަސައްކަތެކެވެ.
ރިފަރެންސް:ނޭޝަނަލް އިންސްޓިޓިއުޓް އޮފް ނިއުރޮލޮޖިކަލް ޑިސްއޯޑާސް އެންޑް ސްޓްރޯކް، ނިދި އަދި ނިދީގެ ބަލިތައް.