އިނގިރޭސި ޕްރިމިއަރ ލީގުގެ ކްރިސްޓަލް ޕެލަސްއަށް ކުޅެމުން އަންނަ ފޯވާޑް ޖިއަން-ފިލީޕޭ މަޓެޓާ އިޓަލީގެ އޭސީ މިލާނަށް ބަދަލުވާން ކުރަމުން އަންނަ މަސައްކަތަށް ހިޔަނި އެޅިއްޖެއެވެ.
ބީބީސީ އިން ރިޕޯޓުކޮށްފައިވާ ގޮތުގައި ކުލަބު ބަދަލުވުމުގެ މަރުހަލާގައި މިހާރުވަނީ ސުވާލު އުފެދިފައެވެ. މަޓެޓާގެ މެޑިކަލްއާ ހިސާބުގައި މިހާރު އުޅޭއިރު، މި ސީޒަން އެކީހެން އޭނާ ކުޅެފައިވަނީ ކަކުލަށް ލިބިފައިވާ އަނިޔާއަކާ އެކުގައެވެ. މެޑިކަލްއިން ފާސް ނުވެދާނެ ސަބަބެއްކަމަށް ރިޕޯޓުތައް ބުނަނީ މި ދެންނެވި ސަބަބާހުރެއެވެ.
އުމުރުން 28 އަހަރުގެ ފޯވާޑު، ކްރިސްޓަލް ޕެލަސް އިން ކުޅުނު އެންމެ ފަހު މެޗު ފިޔަވާ މި ސީޒަނުގައި ހުރިހާ މެޗެއްގައިވަނީ ކުޅެފައެވެ. މިދިޔަ ހަފްތާގައި ކްރިސްޓަލް ޕެލަސްއާއި ނޮޓިންހަމް ފޮރެސްޓް ބައްދަލުކޮށް 1-1 އިން އެއްވަރުވި މެޗުގައި މަޓެޓާ ކުޅެފައެއްނުވެއެވެ. ޕެލަސްގެ ކޯޗު ބުނެފައިވާ ގޮތުގައި އެ މެޗުން މަޓެޓާ ބާކީކުރީ މަޓެޓާގެ ވިސްނުން މިވަގުތު އެހެން ކަމަކަށް ހުސްވެފައިވާތީކަމަށެވެ.
އަނިޔާއާއެކުވެސް މަޓެޓާ އަންނަނީ ލީގުގައި ތަފާތު ދައްކަމުންނެވެ. ފްރާންސްއަށް އުފަން މިކުޅުންތެރިޔާ މި ސީޒަނުގައި މިހާތަނަށް 8 ގޯލު ޖަހައިދީފައިވެއެވެ.
މަޓެޓާގެ މި ކަންބޮޑުވުމާއެކު ޕެލަސްގައި މަޑުކުރުމުގެ ފުރުޞަތުވެސް މިހާރު އެބަ އޮތެވެ. އެހެން ވެއްޖެނަމަ، މަޓެޓާގެ ބަދަލުގައި ޕެލަސްއިން ގެންނަން މަސައްކަތްކުރާ ވުލްސްގެ ފޯވާޑު ޖޯގަން ސްޓްރޭންޑް ލާސަން ނުގެނެސް އެކުލަބުން މަޑު ޖައްސާލާނެކަމަށްވަނީ ބެލެވިފައެވެ.