އެޓަލާންޓާއަށް ކުޅެމުން އައި ނައިޖީރިއާ ފޯވާޑް އަޑެމޯލާ ލުކްމާން ސްޕެއިންގެ އެތުލެޓިކޯ މެޑްރިޑަށް ބަދަލުވެއްޖެއެވެ.
އުމުރުން 28 އަހަރުގެ ލުކްމާން އެތުލެޓިކޯއަށް ބަދަލުވީ 30.3 މިލިއަން ޕައުންޑުގެ ފީއަކަށެވެ. މިއާއެކު އޭނާ ވެގެންދާނީ ޕްރިމިއަރލީގާއި، ބުންޑަސްލީގާއި، ސީރީއޭ އަދި ލަލީގާގައި ކުޅޭ އިނގިރޭސިވިލާތަށް އުފަން އެންމެ ފުރަތަމަ ކުޅުންތެރިޔާއަށެވެ. ލުކްމާންވަނީ 2022 ވަނަ އަހަރު ބުންޑަސްލީގުގެ އާރްބީ ލިޕްޒީގް އިން އެޓްލާންޓާއަށް ބަދަލުވުމަށްފަހު 55 ލަނޑުޖަހައި 27 ލަނޑެއް ޖެހުމަށް މަގުފަހިކޮށްދީފައެވެ. އެގޮތުން އެންމެ ފާހަގަކޮށްލެވެނީ 2024 ވަނަ އަހަރު ޔޫރޮޕާ ލީގުގެ ފައިނަލުގައި ބެޔަ ލެވަކޫސަންކޮޅަށް ހެދި ހެޓްރިކެވެ. އެ މުބާރާތް އެޓަލާންޓާއަށް ކާމިޔާބު ކޮށްދިނުމުގައި ލުކްމާންގެ ދައުރު ވަރަށްބޮޑެވެ. އެއާއެކު އެއަހަރު އެފްރިކާގެ އެންމެ މޮޅު ކުޅުންތެރިޔާގެ މަޤާމްވެސް އޭނާއަށް ލިބުނެވެ. އަދި އެއަހަރު ބެލަންޑިއޯ އަށް ޝޯޓްލިސްޓްކުރެވުނު އެފްރިކާއަށް ނިސްބަތްވާ ހަމައެކަނި ކުޅުންތެރިޔަކީވެސް ލުކްމާންއެވެ.
ޗާލްޓަން އެތުލެޓިކުން ފުޓްބޯޅަ ކެރިއަރު ފެށި ލުކްމާން 20 އަހަރުންދަށުގެ އިނގިރޭސި ގައުމީ ޓީމާއެކު 2017 ވަނަ އަހަރު 20 އަހަރުންދަށުގެ ވޯލްޑްކަޕް ކާމިޔާބުކުރިނަމަވެސް، 2022 ވަނައަހަރު އޭނާވަނީ ނައިޖީރިއާގެ ސީނިއަރ ޓީމަށް ކުޅެންފަށާފައެވެ.
ލުކްމާންގެ ސޮއި އެތުލެޓިކޯއިން ހޯދިއިރު، އެޓީމު މިވަގުތު އޮތީ އެއްވަނައިގައި އޮތް ބާސެލޯނާއަށްވުރެ 10 ޕޮއިންޓް ފަހަތުން ތާވަލުގެ 3 ވަނައިގައެވެ.