ބޭވަފާތެރިވުމޭ ބުނުމުން ގިނަ މީހުންނަށް ހީވަނީ އެއީ އެހެން މީހަކާ އެކު ޖިސްމާނީ ގުޅުމެއް ހިންގުން ނުވަތަ ސިއްރުން "ލޯބީގެ" ގުޅުމެއް ބޭއްވުން ކަމަށެވެ. ނަމަވެސް ޒަމާނީ ޓެކްނޮލޮޖީއާ އެކު، ބޭވަފާތެރިވުމުގެ މާނަ މިހާރު ވަނީ ވަރަށް ބޮޑަށް ބަދަލުވެފައެވެ. ސޯޝަލް މީޑިއާގައި އެހެން މީހަކަށް "ހާޓް" ދިނުމާއި، ޑީއެމް ކުރުން ފަދަ ކުދިކުދި ކަންކަމަކީ މިހާރު ގުޅުންތައް ރޫޅެން މެދުވެރިވާ "މައިކްރޯ ޗީޓިންގ" ގެ ގޮތުގައި މާހިރުން ސިފަކުރެއެވެ.
ޔުނިވާސިޓީ އޮފް ސައުތު ވޭލްސްގެ ސައިކޮލޮޖިސްޓް ޑރ. މާޓިން ގްރަފް، މިކަން މާނަކުރައްވާ ގޮތުގައި މައިކްރޯ ޗީޓިންގ އަކީ "ބައިވެރިޔާ ނޫން އެހެން މީހަކަށް، ޖިސްމާނީ ނުވަތަ ނަފްސާނީ ގޮތުން ތިމާ ހުސްކޮށް ހުރިކަން ދޭހަވާ ގޮތަށް ކުރާ ކޮންމެ އަމަލެކެވެ." މިއީ ސީދާ ޗީޓިންގ އަށް ނުވިޔަސް، މިއީ އޭގެ ފެށުމެވެ.
ބައިވެރިޔާ މައިކްރޯ ޗީޓް ކުރާކަން ދެނެގަންނާނެ ގޮތްތަކުގެ ތެރޭގައި ތިރީގައިވާ ކަންކަން ހިމެނޭ ކަމަށް ރިލޭޝަންޝިޕް އެކްސްޕާޓް މެލަނީ ޝިލިންގ ފާހަގަކުރައްވައެވެ:
ފޯނު ފޮރުވުން: ބައިވެރިޔާ ކައިރީގައި އިންނައިރު ފޯނުގެ ސްކްރީން ބަންޑުން ބޭއްވުން ނުވަތަ ފޯނަށް މެސެޖެއް އައުމުން ހާސްވެގެން ފޯނު ނެގުން.
އެކަކަށް ހާއްސަ ސަމާލުކަމެއް ދިނުން: ވަކި މީހެއްގެ ފޮޓޯތަކަށް އަބަދު ލައިކް ދިނުން، ނުވަތަ އިންސްޓަގްރާމް ސްޓޯރީތަކަށް "ރިއެކްޓް" ކޮށް، ޕްރައިވެޓްކޮށް ޖޯކުތައް (މީމްސް) ފޮނުވުން.
އެކްސް (ކުރީގެ ލޯބިވެރިން) އާ ގުޅުން ބޭއްވުން: އުފަންދުވަހުގެ ތަހުނިޔާ ކިޔުމުގެ ނަމުގައި ނުވަތަ ހާލު ބެލުމުގެ ނަމުގައި ބޭނުމެއް ނެތި ކުރީގެ ބައިވެރިންނާ ޗެޓުކުރުން.
ވާހަކަތައް ސިއްރުކުރުން: އޮފީހުގައި އުޅޭ "ރަހުމަތްތެރިޔާ" ގެ ވާހަކަ ގޭތެރޭގައި ދެއްކުމަށް ފަސްޖެހުން ނުވަތަ އެއީ ކާކުކަން އޮޅުވާލުން.
ދިރާސާތަކުން ދައްކާ ގޮތުގައި މައިކްރޯ ޗީޓިންގގެ އެންމެ ނުރައްކާތެރި ކަމަކީ "އިމޯޝަނަލް އިންޓިމަސީ" ނުވަތަ ނަފްސާނީ ގާތްކަން އުފެދުމެވެ. ތިމާގެ އުފާތަކާއި ހިތާމަތައް ހިއްސާކުރަން އެންމެ ފުރަތަމަ ބައިވެރިޔާގެ ގާތަށް ދިއުމުގެ ބަދަލުގައި، ސޯޝަލް މީޑިއާގައި އިންނަ އެހެން މީހެއްގެ ގާތަށް ދިއުމަކީ ގުޅުމުގައި ރެނދުލާނެ ކަމެކެވެ.
މިކަން ހައްލުކުރުމަށްޓަކައި މާހިރުން ލަފާދެނީ، ޝައްކުވާ ނަމަ އެކަމާ ޒުވާބު ކުރުމުގެ ބަދަލުގައި ހުޅުވާލެވިފައިވާ ގޮތެއްގައި ވާހަކަ ދެއްކުމަށެވެ. ކޮންމެ ދެމަފިރިއެއްގެ ދެމެދުގައި ވެސް "އިން" ތަކެއް ކަނޑައެޅިފައި ހުރުން މުހިންމެވެ. އެކަކަށް އާދައިގެ ކަމެއް ކަމަށް ހީވާ ކަމަކީ އަނެކާއަށް ވަރަށް ބޮޑު ހިތާމައަކަށް ވެދާނެތީއެވެ.