ސައުދީ ޕްރޯ ލީގުގެ އަލް އިއްތިހާދަށް ކުޅެމުން އައި ފްރާންސްގެ ފޯވާޑް ކަރިމް ބެންޒެމާ އަލް ހިލާލަށް ބަދަލުވުމާއެކު ރޮނާލްޑޯގެ ކަންބޮޑުވުންތައް ބަންޑުންކޮށްލައިފިއެވެ.
ބެންޒެމާ އަލް އިއްތިހާދުން އަލް ހިލާލަށް ބަދަލުވީ 25 މިލިއަން ޔޫރޯސްގެ ފީއަކަށްކަމަށް ޚަބަރުތައް ބުނެއެވެ. މިއާއެކު ރޮނާލްޑޯ ހާމަކޮށްފައިވާ ގޮތުގައި މިހާރުވެސް ލީގުގެ އެއްވަނައިގައި އޮތް އަލް ހިލާލަށް އަނެއްކާ ބެންޒެމާފަދަ މޮޅު ކުޅުންތެރިއެއް ގެންދިޔުމުން ޓީމުތަކުގައި ވާދަވެރިކަމަށް އަސަރުކުރާނެކަމަށާއި، ނަހަމަގޮތުގައި ޕަބްލިކް އިންވެސްޓްމަންޓް ފަންޑްގެ ބޭނުން ވާދަވެރި ޓީމުތަކުން ކުރާކަމުގެ ޝަކުވާ ރޮނާލްޑޯވަނީ ކޮށްފައެވެ.
ބެންޒެމާ އަލް ހިލާލަށް ބަދަލުވުމުގެ ކަންތަކުގެ ތެރެއަށް ރޮނާލްޑޯ ވަނުމުގެ ސަބަބުން އެންގޯލޯ ކާންޓޭ ފެނަބާޗޭއަށް ބަދަލުވުމާއި ޔޫސެފް އެން ނެސީރީ އަލް އިއްތިހާދަށް ބަދަލުވުމުގެ ކަންތަކަށްވެސްވަނީ އަސަރުކޮށްފައެވެ. ނަމަވެސް ރިޕޯޓުތައް މިހާރު ބުނާގޮތުން ބެންޒެމާގެ ނިންމުން ޔަގީންވުމާއެކު ކާންޓޭއާއި އެން ނެސޭރީގެ ކުލަބު ބަދަލުވުމުގެ ކަންކަންވެސް ދެން ކުރިޔަށްދާނެކަމަށެވެ.
ކްރިސްޓިއާނޯ ރޮނާލްޑޯ ސައުދީގެ އަލް ނަސްރަށް ބަދަލުވުމާއެކު ދަނޑުމަތީގައާއި ދަނޑުން ބޭރުގައިވެސް އެ ލީގުގެ ނުފޫޒުގަދަ މީހަކަށް އޭނާވަނީވެފައެވެ. އެގޮތުން ސައޫދީ ޕްރޯ ލީގަށް މޮޅެތި ކުޅުންތެރިން ގެނައުމާއި، ލީގު ވަރުގަދަ ކުރުމަށް ކުރަމުންދާ މަސައްކަތުގައި ރޮނާލްޑޯގެ ނުފޫޒު ވަރަށްގަދައެވެ.