މިހާރު ކުރިޔަށްދާ އެޗްޑީ ހަޔުންޑާއީ ގޯލްޑެން ފުޓްސަލް ޗެލެންޖް 2026 ގެ ގަދަ ސޯޅަ ކަށަވަރުވެއްޖެއެވެ.
މުޅި ރާއްޖެއަށް ހުޅުވާލައިގެން ކޮންމެ އަހަރަކުވެސް ގޯލްޑެން ފުޓްސަލް އެސޯސިއޭޝަނުން ކުރިޔަށް ގެންދާ މި މުބާރާތުގެ ޒޯން ބުރު ރޭ ނިމިގެންދިޔައިރު، ގަދަ ސޯޅައަށް ދަތުރުކޮށްފައިވަނީ ރ. ދުވާފަރު، ސ. ހިތަދޫ، ބ. އޭދަފުށި، މައްޗަންގޮޅި، ހދ. ނައިވާދޫ، މ. ދިއްގަރު، އއ. މަތިވެރި، ލ. އިސްދޫ، ތ. ތިމަރަފުށި، ހއ. މާރަންދޫ، ގއ. ދެއްވަދޫ، ވ. ކެޔޮދޫ، ދ. ކުޑަހުވަދޫ، ށ.ކަނޑިތީމު، ވިލިމާލެ އަދި ކ.ގާފަރެވެ. ގަދަ 16 ގައި ވާދަކުރަނީ ޒޯނު ފައިނަލުގައި ވާދަކުރި ޓީމުތަކެވެ.
ގަދަ 16 ގެ މެޗުތައް ކުޅެވޭނީ 5 ފެބުރުވަރީ ވާ ބުރާސްފަތި ދުވަހުއެވެ. އެދުވަހު ހަވީރު ރ. ދުވާފަރާއި ސ. ހިތަދޫ ބައްދަލުކުރާއިރު ބ. އޭދަފުއްޓާ ކުޅޭނީ މައްޗަންގޮޅި ޓީމެވެ. އެރޭ 8 ޖަހާއިރު ކުޅޭ ހދ. ނައިވާދޫ އާއި މ. ދިއްގަރު ބައްދަލުކުރާއިރު، އއ. މަތިވެރި ކުޅޭނީ ލ. އިސްދޫއާއެވެ. އެރޭ 9:30 ގައި ކުޅޭ މެޗުތަކުގައި ބައްދަލުކުރާނީ ތ. ތިމަރަފުއްޓާއި ހއ. މާރަންދޫ އަދި ގއ. ދެއްވަދޫ އާއި ވ. ކެޔޮދޫއެވެ. ފަހު މެޗުތަކުގައި ދ. ކުޑަހުވަދޫ ށ. ކަނޑިތީމާ ބައްދަލު ކުރާއިރު ވިލިމާލެ ނުކުންނާނީ ކ. ގާފަރާ ދެކޮޅަށެވެ.
މި މުބާރާތުގެ މެޗުތައް މިހިސާބަށް އައިއިރު މަޝްހޫރު ގިނަ ޓީމުތަކެއްވަނީ މުބާރާތުން ވަކިވެގެން ގޮސްފައެވެ. އެގޮތުން އެންމެ ފާހަގަކޮށްލެވެނީ ލ.ގަމާއި، ގދ. ވާދޫ ފާހަގަކޮށްލެވެއެވެ. މެޗުތައް ކުޅެވެމުންދަނީ ހުޅުމާލެ ރެހެންދި ފުޓްސަލް ދަނޑުގައެވެ.