ބާސެލޯނާއަށް މިހާރު ކުޅެމުން އަންނަ އިނގިރޭސި ތަރި މާކަސް ރަޝްފަޑް ބޭނުންވަނީ އެކުލަބުގައި މަޑުކުރަންކަމުގައި ޚަބަރުތައް ފެތުރިއްޖެއެވެ.
މެންޗެސްޓަރ ޔުނައިޓެޑުން ލޯނެއްގެ ދަށުން ބާސެލޯނާއަށް މިދިޔަ ހޫނު މޫސުމުގެ ޓްރާންސްފަރ މާކެޓުގައި ބަދަލުވި ރަޝްފަޑު ބުނެފައިވަނީ ފުޓްބޯޅަ މަތިން ފޫހިވެފައި ހުއްޓާ އެ ކުޅިވަރަށް އަލުން ލޯބި ޖެއްސުވީ ބާސާއިން ކަމަށާއި، ޔުނައިޓެޑަށް އެނބުރި ދިޔުމުގެ ވިސްނުމެއް ނެތްކަމަށެވެ. އަދި ކުރިޔަށް އޮތް ވޯލްޑްކަޕް ފެށުމުގެ ކުރިން ބާސާއަށް ދާއިމީ އެއްބަސްވުމެއްގެ ދަށުން ބަދަލުވާން ބޭނުންކަމަށްވެސް ބުނެފައިވެއެވެ.
ޔުނައިޓެޑުން ބާސާއަށް ރަޝްފަޑް ދޫކުރިއިރު ބާސާ ބޭނުންވެއްޖެނަމަ 26 މިލިއަން ޕައުންޑަށް ކުޅުންތެރިޔާގެ އެއްބަސްވުން ދާއިމީ ކުރެވޭގޮތަށްވަނީ ބާސާގެ އިސްވެރިން އެއްބަސްވެފައެވެ. ބެލެވޭ ގޮތުގައި ޔުނައިޓެޑާ މިހާރު ވަގުތީ ގޮތުން ހަވާލުވެފައި ހުރި ކޯޗު، މައިކަލް ކެރިކަށް އެޓީމުގެ ކޯޗުގެ މަގާމު ރަސްމީކޮށް ހަމަޖެހިއްޖެނަމަ، ރަޝްފަޑް އެޓީމަށް އަނބުރާ ގެނައުން ގާތެވެ.
އެހެންނަމަވެސް، ހިތްހަމަ ނުޖެހުންތަކާއެކު ރަޝްފަޑް ޔުނައިޓުން ފެއަށްޖެހި ބާސާއާއެކު ސްޕެއިންގައި މިހާރު ހޭދަކުރަމުންދަނީ އުފާވެރި ދުވަސްތަކެކެވެ. އެ ސަބަބާހުރެ މުސާރަ ދަށްކުރަން ޖެހިއްޖެނަމަ، އެކަންކޮށްގެންވެސް ބާސާގައި ރަޝްފަޑް މަޑުކުރާނެކަމަށް ބެލެވެއެވެ.
ޔުނައިޓެޑުގެ އެކަޑަމީއިން ވިދާލި ރަޝްފަޑު ޔުނައިޓެޑުގެ ސީނިއަރ ޓީމުގައިވެސް މޮޅު ކުޅުމެއް ދެއްކިއެވެ. ނަމަވެސް އެ ޓީމުގައި އެންމެފަހުން މަސައްކަތްކުރި ކޯޗު ރުބެން އަމޯރިމްއާ ދެމެދު ޖެހުނު މައްސަލަތަކެއްގެ ތެރެއިން ބާސާއަށް ބަދަލުވެ މިހާތަނަށް ކުޅުނު 33 މެޗުގައި 10 ލަނޑުޖަހައި 12 ލަނޑު ޖެހުމަށްވަނީ މަގުފަހިކޮށްދީފައެވެ.