އެފްރިކާ ބައްރުގެ ކެންޔާގެ 'ގްރޭޓް ރިފްޓް ވެލީ' ގައި އޮންނަ 'ލޭކް ބޮގޯރިއާ' އަކީ ދުނިޔޭގެ އަޑިން އަންނަ ހޫނުގެ ސަބަބުން، އައްސޭރިފަށުން އާވި އަރައި، ފެންގަނޑު ކެކެމުންދާ ފަދަ މަންޒަރެއް ފެންނަ، އެ ބައްރުގައިވާ އެންމެ ފާހަގަކޮށްލެވޭ އެއް ގުދުރަތީ އަޖައިބެވެ. މި ސަރަހައްދަކީ ބިމުގެ އަޑީގެ ހަރަކާތްތައް ވަރުގަދަ ސަރަހައްދަކަށް ވުމާއެކު، ބިމުގެ އަޑިން އަންނަ ހޫނުގެ ސަބަބުން މި ފެންގަނޑުގެ ވަށައިގެން 200 އަށްވުރެ ގިނަ ހޫނުފެން އުފެދޭ އާރުތަކާއި މަދުވެގެން 18 ފެންވިދާ ހުރެއެވެ. މީގެ ތެރެއިން ބައެއް ތަންތަނުގެ ހޫނުމިން 98 ޑިގްރީ ސެލްސިއަސް (208 ޑިގްރީ ފަރަންހައިޓް) އަށް އަރައެވެ. މިއީ މަދު މިނެޓުކޮޅެއްގެ ތެރޭގައި ބިހެއް ކައްކާލެވޭހާ ހޫނު ގަދަ މިންވަރެކެވެ.
ލޭކް ބޮގޯރިއާގެ ބިމުގެ އޮނިގަނޑު ހުންނަ ގޮތުން، މިފަދަ ހޫނު އާރުތަކުގެ އިތުރުން، އެ ފެންގަނޑަކީ އާދަޔާ ހިލާފަށް ގިނަ އަދަދަކަށް ކެމިކަލާއި ލޮނު އެކުލެވިގެންވާ ތަނެކެވެ. މި ސަބަބަށްޓަކައި އެ ފެންގަނޑުގައި ގިނަ އަދަދަކަށް 'ބްލޫ-ގްރީން އެލްގޭ' އާލާވެއެވެ. މިއީ 'ލެސާ ފްލެމިންގޯ' ތަކުގެ މައިގަނޑު ކާނާއަށް ވުމުން، އެއްފަހަރާ މިލިއަނަކަށް ވުރެ ގިނަ ފްލެމިންގޯ އެ ސަރަހައްދަށް ޖަމާވެ، ފެންގަނޑުގެ އައްސޭރިފަށުން ފިޔާތޮށި ކުލައިގެ ހިތްގައިމު މަންޒަރެއް ފެނިގެންދެއެވެ.
ކެކިކެކި ހުންނަ އާރުތަކާއި، ފެންވިދާތަކުގެ އިތުރުން އެ ސަރަހައްދުގެ ދިރުންތަކުގެ ސަބަބުން ލޭކް ބޮގޯރިއާއަކީ ދުނިޔޭގެ އެކި ކޮޅުކޮޅުން ފަތުރުވެރިންނާއި، ފޮޓޯގްރާފަރުންގެ އިތުރުން ގުދުރަތީ ރީތިކަމަށް ލޯބިކުރާ މީހުން ޒިޔާރަތްކުރާ މުހިންމު މަންޒިލެކެވެ. ޒިޔާރަތްކުރާ މީހުންނަށް ރައްކާތެރިކަމާއެކު އާވި އަރާ ފެންގަނޑުތަކާއި ފެންވިދާތައް ބަލާލުމަށް ހާއްސަ މަގުތަކެއް ހަދާފައިވެއެވެ. މީގެ އިތުރުން، އެ ސަރަހައްދުގައި ދިރިއުޅޭ ރައްޔިތުން މިފަދަ ތަފާތު ގުދުރަތީ މާހައުލެއްގައި ދިރިއުޅޭ ގޮތާއި، އެމީހުންގެ ސަގާފީ ވާހަކަތައްވެސް ފަތުރުވެރިންނަށް ހިއްސާކުރެއެވެ.