ރައީސުލް ޖުމްހޫރިއްޔާގެ ސްޕެޝަލް އެންވޯއީ ނުވަތަ ޚާއްޞަ މުޝީރުގެ މަޤާމުގައި ހުންނެވި ކުރީގެ ރައީސް ޑރ. މުޙައްމަދު ވަހީދު ހަސަން އެ މަޤާމުން އިސްތިއުފާ ދެއްވައިފިއެވެ.
ޑރ. މުޙައްމަދު ވަހީދު ހަސަން އެ މަޤާމުން އިސްތިއުފާ ދެއްވިކަން ރައީސް އޮފީހުންވަނީ ރަސްމީކޮށް އިޢުލާންކޮށްފައެވެ. އެ އޮފީހުން އާންމުކުރި ޚަބަރުގައިވާ ގޮތުގައި ޑރ. މުޙައްމަދު ވަހީދު ހަސަންގެ އިސްތިއުފާގެ ސިޓީ ހުށަހަޅުއްވާފައިވަނީ މިއަދު ހެނދުނުގެ ވަގުތެއްގައެވެ. އިތުރު ތަފްޞީލެއް ހިމަނާފައެއްނުވެއެވެ.
ކުރީގެ ރައީސް ޑރ. މުޙައްމަދު ވަހީދު ހަސަން މަނިކު އެ މަޤާމުން އިސްތިއުފާ ދީފައި މިވަނީ ރައީސުލްޖުމްހޫރިއްޔާގެ މަގާމުގައި ހުންނަވައިގެން ރާއްޖެއާ ގުޅޭ އެތައް ކަމެއް އެޕްސްޓީންއާ ހިއްސާކޮށް، އޭނާގެ ލަފާ ހޯއްދަވާފައިވާކަމުގެ އަޑުތައް ފެތުރިފައިވާ ދަނޑިވަޅެއްގައެވެ.
މިކަމާ ގުޅިގެން ޑރ. ވަހީދުގެ އޮފީހުން ނެރުނު ބަޔާނުގައި އެޕްސްޓީންއާ ދެމެދު ގުޅުމެއް ބޭއްވުނީތީ ހިތާމަކުރާކަމަށާއި ބޭއްވުނު ގުޅުމަކީ ރަސްމީ ހައިސިއްޔަތުން ރާއްޖެއަށް މާލީގޮތުން އެހީ ހޯދުމަށް ބޭއްވުނު ގުޅުމެއްކަމަށެވެ. އަދި އެޕްސްޓީންގެ ގޮތް އެނގުނުނަމަ، އެގުޅުން ނުބޭއްވީސްކަމަށާއި ބައްދަލު ކުރެވިފައިވާނީ ރަސްމީކޮށް އެކަނިކަމަށްވެސް އެ ބަޔާނުގައިވެއެވެ.