ދުނިޔޭގެ ޞިއްޙަތު ޖަމްޢިއްޔާ ވޯލްޑް ހެލްތް އޯގަނައިޒޭޝަން އިން މައިގަނޑު ގޮތެއްގައި ޞިއްޙަތު މާނަކުރަނީ ހަމައެކަނި ބައްޔެއް ނެތުމަކުން ނޫނެވެ. ޞިއްޙަތަކީ ޖިސްމާނީ ގޮތުންނާއި، ނަފްސާނީ ގޮތުންނާއި، އަދި އިޖުތިމާޢީ ގޮތުން އިންސާނާއަށް ލިބިފައިވާ ފުރިހަމަ ދުޅަހެޔޮކަމެވެ. މި މާނަކުރުމުން އެނގިގެންދަނީ ޞިއްޙަތަށް ބާރުފޯރުވަނީ ހަމައެކަނި ބޭސްފަރުވާއިން ނޫން ކަމާއި، އިންސާނާ ދިރިއުޅޭ މާޙައުލާއި، އާދަކާދަތަކާއި، އަދި އެހެން މީހުންނާ އޮންނަ ގުޅުމަކީ ޞިއްޙަތަށް ނުހަނު އަސަރުކުރާ ކަންކަން ކަމެވެ.
ޖިސްމާނީ ދުޅަހެޔޮކަން ބިނާވެގެންވަނީ މައިގަނޑު ހަތަރު ކަމެއްގެ މައްޗަށެވެ. އެއީ ހަމަހަމަ ކާނާ ބޭނުންކުރުމާއި، ގަވާއިދުން ކަސްރަތު ކުރުމާއި، އަރާމު ނިދި ހޯދުމާއި، އަދި ބަލިތަކުން ރައްކާތެރިވުމަށް އަޅާ ފިޔަވަޅުތަކެވެ. ޞިއްޙަތަށް ފައިދާހުރި ކާނާ ބޭނުން ނުކުރުމާއި، ހަށިގަނޑުގެ ހަރަކާތްތެރިކަން ކުޑަވުމަކީ ހަކުރު ބައްޔާއި، ހިތުގެ ބަލިތަކާއި، އަދި މާބޮޑަށް ފަލަވުން ފަދަ ގައިންގަޔަށް ނާރާ ބަލިތަކަށް މަގުފަހިވާ މައިގަނޑު ސަބަބުތަކެވެ.
ޖިސްމާނީ ޞިއްޙަތާ އެއްވަރަށް ނަފްސާނީ ދުޅަހެޔޮކަމަކީ ވެސް މުހިންމު ކަމެކެވެ. ނުތަނަވަސްކަމާއި، މާޔޫސްވުމާއި، އަދި ދިގުލައިދާ ސްޓްރެސްގެ ސަބަބުން ކަންކަމަށް ސަމާލުކަންދޭ މިންވަރު ދަށްވެ، މަސައްކަތުގެ އުފެއްދުންތެރިކަން ކުޑަވެއެވެ. އަދި ނަފްސާނީ ދުޅަހެޔޮކަން ގެއްލުމަކީ ޖިސްމާނީ ބަލިތަކަށް މީހާ ހުށަހެޅޭ ކަމެއްވެސްމެއެވެ. ދުނިޔޭގެ ނިސްބަތުން ބަލާއިރު، ނަފްސާނީ ބަލިތަކަކީ އިންސާނުން ނުކުޅެދުންތެރިކަމަށް ހުށަހެޅޭ އެންމެ ބޮޑު އެއް ސަބަބެވެ. އެހެންކަމުން، ކުރީބައިގައި އެހީތެރިކަން ހޯދުމާއި ދުޅަހެޔޮ އާދަތައް އަށަގެންނެވުން މުހިންމެވެ.
ބަލިތަކުން ރައްކާތެރިވުމަށްޓަކައި ކުރެވޭ ކަންކަން ކަމަށްވާ ވެކްސިން ޖެހުމާއި، ސާފުތާހިރުކަން އިސްކުރުމާއި، އަދި ބަލީގެ ކުރީކޮޅު ފަރުވާ ހޯދުމަކީ ދިރިއުޅުމުގެ ފެންވަރު މަތިކޮށްދޭ ކަންކަމެވެ. ޞިއްޙަތަކީ ކުޑަ ދުވަސްކޮޅަކުން ބިނާކުރެވޭނެ އެއްޗެއް ނޫނެވެ. އެއީ ޢިލްމީ ހޯދުންތަކުގެ މައްޗަށް ބިނާވެފައިވާ ދުޅަހެޔޮ އާދަތަކެއް، ދާއިމީ ގޮތެއްގައި ހިފެހެއްޓުމުން ލިބޭ ނިޢުމަތެކެވެ.
މަޞްދަރު: ވޯލްޑް ހެލްތް އޮގަނައިޒޭޝަން:- ޞިއްޙަތުގެ މާނައާއި އޭގެ މައިގަނޑު އަސާސްތައް.