އަލްބަސޭޓޭ އަތުން 2-1 އިން މޮޅުވެ ކޮޕަޑެލްރޭގެ ސެމީފައިނަލަށް ބާސެލޯނާ ދަތުރުކޮށްފިއެވެ.
ރޭ އަލްބަސޭޓޭގެ އަމިއްލަ ދަނޑުގައި ކުޅުނު މި މެޗުގައި ބާސެލޯނާއިން ޖެހި ލަނޑުތައް ކާމިޔާބުކޮށްދިނީ ލަމިން ޔަމާލްއާއި އަރައުޖޯއެވެ. އެއީ ފްރޭންކް ޑި ޖޮންގ އާއި މަކަސް ރަޝްފަޑް ފަހިކޮށްދިން ފުރުސަތުތަކުންނެވެ. މެޗު ނިމެންދަނިކޮށް އަލްބަސޭޓޭގެ ޖާވީ މޮރޯނީވަނީ ލަނޑެއްޖަހައި ފަރަގު ކުޑަކޮށްދީފައެވެ.
މިއީ މި ސީޒަނުގައި ކޮޕަޑެލްރޭ މެޗެއްގައި ޔަމާލް ޖެހި ފުރަތަމަ ލަނޑެވެ. ބާސާގެ މިމޮޅާއެކު ދެވަނަ ޑިވިޒަންގައި ވާދަކުރާ އަލްބަސޭޓޭ ކޮޕަޑެލްރޭގައި ހޯދަމުން އައި އާދަޔާ ޚިލާފު ކާމިޔާބީތަކަށް ނިމުންއައީއެވެ. މި މުބާރާތުގެ ކުއާޓާ ފައިނަލަށް އެޓީމު ދަތުރުކުރީ ގަދަފަދަ ރެއާލްމެޑްރިޑް ބަލިކުރުމަށްފަހުއެވެ.