ކަރަބައޯކަޕްގެ ސެމީފައިނަލުގައި ރޭ ޗެލްސީ ކައިރިން 1-0 ގެ ނަތީޖާއަކުން މޮޅުވެ ފާއިތުވި ހަ އަހަރު ދުވަހު ބޮޑު ފައިނަލަކަށް ފުރަތަމަ ފަހަރަށް އާސެނަލް ދަތުރުކޮށްފިއެވެ.
މިއީ މިކެލް އާޓެޓާގެ އިރުޝާދުގެ ދަށުން 2020 ވަނަ އަހަރުގެ ފަހުން ފައިނަލަކަށް އެޓީމު ދަތުރުކުރި ފުރަތަމަ ފަހަރުވެސްމެއެވެ. އެއަހަރު އެފް.އޭ ކަޕް ކާމިޔާބުކުރި ފަހުން އަދި ފައިނަލެއްގައި އާސެނަލް ކުޅެފައެއްނުވެއެވެ. އެހެންކަމުން މިއީ އާޓެޓާއާއެކު އާސެނަލް ފައިނަލެއްގައި ވާދަކުރާ ދެވަނަ ފަހަރުވެސްމެއެވެ.
ރޭގެ މެޗު އާސެނަލް 1-0 އިން ކާމިޔާބުކުރުމާއެކު ދެލެގުގެ ނަތީޖާ 4-2 އިން އެޓީމުވަނީ ކުރި ހޯދާ، ވެބްލީގައި ކުޅެވޭ ފައިނަލުން ޖާގަ ހޯދާފައެވެ. ފޯރިގަދަ އަދި ނޭވާ ހިފަހައްޓާލަން ޖެހުނު މި މެޗުގެ ހަމައެކަނި ލަނޑު ފެނިގެންދިޔައީ މެޗުގެ އިތުރު ވަގުތު ޑެކްލަން ރައިސް ފަހިކޮށްދިން ފުރުސަތެއްގައި ކައި ހަވާޓްޒް ޖަހައިދިން ލަނޑުންނެވެ. މިލަނޑު ޖަހާފައިވަނީ ލަނޑެއް ޖެހުމަށްޓަކައި ޗެލްސީ ކުޅުންތެރިން ކުރިއަށް އަރާފައިވާ ދަނޑިވަޅެއްގައި، މެދުރޮނގާ ހަމައިން ރައިސްއަށް ލިބުނު ބޯޅައެއް އަނެއް އަރިމަތިން ހުސްކޮށް ދުވެފައި އެރި ހަވާޓްޒްއަށް ދިނުމުން ހަމަޖެހިލާފައި ކީޕަރ ކައިރިންވެސް ނައްޓާލާފައި ހުސްގޯލަށް ފޮނުވާލައިގެންނެވެ.
ފައިނަލުގައި އާސެނަލް ކުޅޭ ޓީމެއް އެނގޭނީ މިރޭ މެންޗެސްޓަރ ސިޓީއާ ނިއުކާސަލް ޔުނައިޓެޑް ބައްދަލުކުރާ މެޗުގެ ނަތީޖާއިންނެވެ. މިރޭ ރާއްޖެގަޑިން 1 ޖަހާއިރު މި މެޗު ކުޅޭނީ ސިޓީގެ އިއްތިހާދު ސްޓޭޑިއަމްގައެވެ.