ޖާމަންކަޕް ނުވަތަ ޑީ.އެފް.ބީ ޕޮކަލް (ޖާމަން ފުޓްބޯޅަ އެސޯސިއޭސަން ކަޕް) ގެ ސެމީފައިނަލުން ބެޔާ ލެވަކޫސަން ޖާގަ ހޯދައިފިއެވެ.
އެ މުބާރާތުގެ ކުއާޓާ ފައިނަލުގައި ރޭ ސައިންޓް ޕައޮލި އާ ބައްދަލުކުރި މެޗު ބެޔާ ލެވަކޫސަން ކާމިޔާބުކުރީ 3-0 ންނެވެ. އެޓީމަށް ލަނޑުތައް ޖަހައިދީފައިވަނީ ޓީރިއަރ، ޝިކް އަދި ހޮފަމަންއެވެ. މެޗުގެ ފުރަތަމަ ނުރައްކާތެރި ހަމަލާ އުފެއްދީ ސައިންޓް ޕައޮލި އިންނެވެ. އެޓީމުގެ ފޯވަޑް ފޮނުވާލި ބޯޅަ ގޯލަށް ވަނުމުގެ ހުރަހަކަށްވީ ގޯލު ލައިން މަތީހުރި ޑިފެންޑަރެވެ. އޭގެ މާގިނަ އިރުތަކެއްނުވެ ހަމަ އެކަހަލަ ފުރުޞަތެއް ލެވަކޫސަންގެ ޝިކްއަށްވެސް ލިބި ބޭކާރުކޮށްލިއެވެ. މެޗުގައި ދެޓީމަށްވެސް ލަނޑު ޖަހާނެ ގިނަ ފުރުސަތުތަކެއް ލިބިގެންދިޔައެވެ.
މި މުބާރާތުގެ ކުއާޓާ ފައިނަލުގެ މެޗެއް މިރޭވެސް ކުޅެވޭނެއެވެ. ބައްދަލުކުރާނީ ހޮސްޓެއިން ކީލް އާއި ވީއެފްބީ ސްޓަޓްގާޑެވެ.