ދުނިޔޭގެ އެކި ކަންކޮޅުތަކުގައި އަނިޔާ ލިބޭ ކުޑަކުދިންގެ މަންޒަރުތައް ކޮންމެ ދުވަހަކުވެސް ފެންނަކަމަށާއި އެކަމާ ހިތަށް ވަރަށް ބޮޑަށް އަސަރުކުރާކަމަށް ދުނިޔެދުށް އެންމެ މޮޅު ކޯޗުންގެ ތެރޭގައި ހިމެނޭ މެންޗެސްޓަރ ސިޓީގެ ކޯޗު ޕެޕް ގާޑިއޯލާ ބުނެފިއެވެ.
ގާޑިއޯލާ މި މޭރުމުން ވާހަކަ ދައްކާފައިވަނީ މިރޭ ކުޅުމަށް ހަމަޖެހިފައިވާ ކަރަބައޯކަޕްގެ ސެމީ ފައިނަލުގައި ސިޓީއާއި ނިއުކާސަލް ބައްދަލުކުރާ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުންނެވެ. ގާޑިއޯލާ އިތުރަށް ބުނެފައިވާ ގޮތުގައި، މިއަދު އެންމެނަށް ފަސޭހަކަމާއެކު އެ މަންޒަރު ފެންނަކަމަށާއި ދުނިޔޭގެ އެކި ކަންކޮޅުތަކުގައި އެކިއެކި ކޯޅުންތަކާއި ހަނގުރާމަތަކުގައި ކުޑަކުދިން މަރާ، އަނިޔާކޮށް ގެދޮރު ގެއްލުވާލާ މަންޒަރު ފެނުމުން ހިތަށް ވަރަށްބޮޑަށް އަސަރުކުރާކަމަށެވެ. ޚާއްޞަކޮށް ފަލަސްތީނާއި ސޫދާނާއި ޔުކްރޭނާއި ދާދިފަހުން އެމެރިކާގައި ބަޑިޖެހި ހާދިސާ ފާހަގަކުރިއެވެ.
"އަހަންނަށް މާފުކުރާތި. އެކަހަލަ ހާދިސާތައް ފެނުމުން ވަރަށް އަސަރުކުރޭ. އަހަރެން އަބަދުވެސް އެކަންކަމާ ދެކޮޅަށް ތެދުވާނަން. އެފަދަ ކުދިންނާއެކު އަބަދުވެސް އަހަރެން ހުންނާނަން. އެއްވެސް ކުށެއްނެތް ކުދިންނާ މީހުން ހަމަ އެއްވެސް ޖެހިލުމެއްނެތި މަރާލަނީ؟ އެއީ އަހަރެން ހިތްދަތިވާކަމަކީ" ނޫސްވެރިންނާ ވާހަކަ ދައްކަމުން ގާޑިއޯލާ ބުނެފައިވެއެވެ.
މި ބައްދަލުވުމުގައި އެކަންކަމާ ގާޑިއޯލާ މާބޮޑަށް ވާހަކަ ދައްކަނީ ކީއްވެތޯ ނޫސްވެރިއަކު ސުވާލުކުރުމުން ބުނެފައިވަނީ އެ ސުވާލު ނޫސްވެރިއަކު މިވީ 10 އަހަރު ތެރޭ އަލަށް އެހީތީވެސް ޝުކުރުވެރިވާކަމަށާއި ނޫސްވެރިންނަށް ތިޔަކަހަލަ ސުވާލުކުރުން މަނާ ކުރެވިފައި އޮންނަނީ ކަމަށް ވެދާނެކަމަށާއި، އެކަން އެގޮތަށް އޮތަސް، ދުނިޔޭގެ މަޝްރަހުގައި ހިނގާ ހަނގުރާމަތަކާއި ނޭއްގާނީ ޢަމަލުތަކުގެ މަންޒަރުތައް ފެންނަ ބަޔަކު އެބަ ތިބިކަމަށާއި އެކަމާ އަސަރުކުރާ ބަޔަކުވެސް އެބަ ތިބިކަމަށެވެ.
މިދިޔަ ހުކުރުދުވަހު ސްޕެއިންގެ ބާސެލޯނާގައި ބޭއްވި ހަރަކާތެއްގައިވެސް ގާޑިއޯލާވަނީ ފަލަސްތީނުގެ ކުޑަކުދިންގެ ހައްގުގައި ވާހަކަ ދައްކާފައެވެ. އެ ހަރަކާތުގައި ގާޑިއޯލާ ފަލަސްތީނު ރަމްޒުކޮށްދޭ ފޮތިކޮޅެއް ބޭނުންކޮށްފައިވެއެވެ.