އުމުރުން 105 އަހަރުގެ ފިރިހެނަކު ކޮވިޑް19 އިން ރަނގަޅުވެއްޖެއެވެ.
އިންޑިއާގެ އެ މީހާ ކޮވިޑަށް ފައްސިވެ، ފަރުވާދިނުމަށް ގޮހާޓީ މެޑިކަލް ކޮލެޖް އެންޑް ހޮސްޕިޓަލް (ޖީ.އެމް.ސީ.އެޗް) އަށް ގެންދެވުނެވެ. މި މަހުގެ ކުރީކޮޅު ހޮސްޕިޓަލަށް ގެންދެވުނު މި މީހާއަށް ފަރުވާ ދެމުން ދިޔައީ އެނދުމަތި ކޮށްގެންނެވެ.
މީދް އަލީ ނަމަކަށް ކިޔާ އެމީހާ ހޮސްޕިޓަލުން ދޫކޮށްލާފައިވަނީ ކޮވިޑް-19 އަށް ނައްސިވެ އަދި ބަލީގެ ހުރިހާ އަލާމާތެއް އޭނާގެ ކިބައިން ފިލާ ދިއުމުންނެވެ. އިންޑިޔާގެ ރިޕޯޓުތައް ބުނާގޮތުން އޭނާގެ ހާލު މިހާރު ރަނގަޅުކަމަށާއި އޭނާ މިހާރު އުޅެމުންދަނީ އޭނާގެ ގޭގައިކަމަށެވެ.
ކޮވިޑް-19 އަކީ ދުނިޔެއަށް ކުރިމަތިވެފައިވާ އާލަމީ ވަބާއެކެވެ. މުޅި ދުނިޔޭގައި މި ބަލި ފެތުރެމުންދާއިރު މި ބަލި ފުރަތަމަ ފެނިފައި ވަނީ 2019 ވަނަ އަހަރުގެ ޑިސެމްބަރު މަހުގެ ފަހުކޮޅުގައެވެ. ފުރަތަމަ ޗައިނާގެ ވުހާން ހިމެނޭ ހުބޭއި އިން މި ބަލި ފެނިފައިވާއިރު މިހާރު ދުނިޔޭގެ ހުރިހާ ކަންކޮޅުތަކަށް ވަނީ މި ބަލި ފެތުރިފައެވެ.
ކޮރޯނާ ވައިރަސް ނުވަތަ ކޮވިޑް-19 ޖެހި މިހާތަނަށް އެތައް މިލިއަން މީހުންގެ ފުރާނަ ގޮސްފައިވާ އިރު ބަލިން ރައްކާތެރިވުމަށް މިހާތަނަށް އެތައް ވެކްސިނެއް ވަނީ އުފައްދާ، އެތައް ބަޔަކަށް ދީފައެވެ.
ސިއްހީ މާހިރުން ބުނާގޮތުގައި ކޮވިޑް19 ޖެހޭ މީހުންގެ ތެރޭގައި ބޮޑެތި ބަލިތަކަށް ފަރުވާކުރާ ބަލިމީހުންނާއި ހަށިގަނޑުގެ ދިފާއީ ނިޒާމު ބަލިކަށި މީހުން ހިމެނެއެވެ. އަދި ކުޑަކުދިންނާއި އުމުރުން ދުވަސްވީ ފަރާތްތަކަށް މި ބަލި ޖެހުމުގެ ފުރުސަތު ބޮޑު އިރު 105 އަހަރުގެ މީހަކު ކޮވިޑް ބަލި ޖެހި ރަނގަޅު ވުމުން ގިނަ ބަޔަކު ވަނީ ހައިރާންވެފައެވެ.
މީގެ ކުރިންވެސް އުމުރުން ދުވަސްވީ މީހުން މިބަލިން ރަނގަޅުވެފައި އެބަހުއްޓެވެ. ނަމަވެސް މިއީ ބަލިން ރަނގަޅުވި މީހުންގެ ތެރެއިން ވަރަށްވެސް ކުޑަ އިންސައްތައެކެވެ.