މިވަގުތު އެއްވެސް ޓީމެއްގެ ކޮންޓްރެކްޓެއްގެ ނެތް އާސެނަލްއާއި ލިވަޕޫލަށް ކުރިން ކުޅުނު އޮކްސްލޭންޑް ޗެމްބަލިން ސްކޮޓިޝް ޗެމްޕިއަން ސެލްޓިކަށް ބަދަލުވުމާ ގާތަށް ޖެހިލައިފިއެވެ.
އުމުރުން 32 އަހަރުގެ ޗެމްބަލިން މިދިޔަ އޯގަސްޓްމަހު ތުރުކީގެ ބެސިކްޓަސްއިން ވަކިވިފަހުން އެއްވެސް ޓީމަކާ ގުޅިފައެއްނުވެއެވެ. މިވަގުތު ޓްރާންސްފަރ މާކެޓް ބަންދުވެފައިވީނަމަވެސް، ފްރީ އެޖެންޓުންނަށް އަދިވެސް ޓީމުތަކަށް ސޮއި ކުރުމުގެ ފުރުޞަތު އޮންނާތީ ސެލްޓިކް ކޯޗު މާޓިން އޯނިލްވަނީ ޗެމްބަލިން ގެންދަން ބޭނުންވާކަމަށްބުނެފައެވެ. އޭނާ ބުނެފައިވާ ގޮތުގައި ޗެމްބަލިންއާއެކު މަޝްވަރާތައް ކުރެވިފައިވާކަމަށާއި، ޗެމްބަލިން ކަހަލަ ކުޅުންތެރިޔަކު އެއްވެސް ޓީމަކުން ބޭނުންނުވާތީ އެކަމާ ހައިރާންވާކަމަށެވެ. އަދި އޭނާގެ ހުށަހެޅުން ޗެމްބަލިން ބަލައިގަންނާނެކަމަށް ވަރަށް ބޮޑަށް ބެލެވޭކަމަށާއި އޭނާއަށް ސެލްޓިކް ވަރަށް ބޮޑަށް އެނގޭކަމަށާއި، އޭނާގެ ވަރަށް ގާތް ޖޯ ހާޓްވެސް ޗެމްބަލިން ސެލްޓިކަށް ބަދަލުވުމަށް ލަފާ ދީފައިވާކަމަށެވެ.
އިނގިރޭސިވިލާތުގެ ސަދަމްޓަންއިން ކެރިއަރ ފެށި ޗެމްބަލިން 2011 ގައި އާސެނަލްއަށް ބަދަލުވެ އެޓީމާއެކު ތިންފަހަރު އެފް.އޭކަޕް ވަނީ އުފުލާލާފައެވެ. އަދި 35 މިލިއަން ޕައުންޑްގެ ފީއަކަށް ލިވަޕޫލަށް ބަދަލުވެ، އެޓީމާއެކު ޗެމްޕިއަންސްލީގާއި، ޕްރިމިއަރ ލީގާއި، ލީގުކަޕާއި، ސުޕަކަޕާއި ކުލަބު ވޯލްޑްކަޕްވެސްވަނީ ހޯދާފައެވެ. އެހެންނަމަވެސް، ކައިރިކައިރީގައި ދިމާވި އަނިޔާގެ މައްސަލަތަކާހުރެ އޭގެފަހުން ރަނގަޅު ކުޅުމެއް ދެއްކޭގޮތެއްނުވެއެވެ.